15 Верасня
15.09.2017

1 кастрычніка ў Беларусі пачынаецца масавая вакцынацыя супраць грыпу

logo
Навiны
80 019
Памер шрыфта:
  • A
  • A
  • A

Не за гарамі сезон прастуд, АРВІ і грыпу. Таму вельмі важна падрыхтаваць сябе і сваіх родных да таго, каб перажыць гэты перыяд без сур'ёзных праблем са здароўем.

Па словах намесніка начальніка аддзела гігіены, эпідэміялогіі і прафілактыкі Міністэрства аховы здароўя Іны Карабан, звычайна з кастрычніка колькасць выпадкаў АРВІ пачынае расці: у структуры агульнага захворвання на долю вострых рэспіраторных вірусаў прыходзіцца 97%. Прычым 50-60% хворых – гэта дзеці.

Не захварэць альбо перанесці хваробу ў лёгкай форме, асабліва такую сур'ёзную як грып, дапамагае прышчэпка. І з 1 кастрычніка ў рэспубліцы стартуе кампанія па вакцынацыі насельніцтва супраць грыпу.

З 2012 года вакцынацыя супраць грыпу ўключана ў Нацыянальны каляндар прафілактычных прышчэпак.  

У першую чаргу бясплатна будуць рабіць прышчэпку:

  • малым ад 6 месяцаў да 3 гадоў;
  • дзецям ад 3-х гадоў і дарослым, якія маюць хранічныя захворванні;
  • людзям, старэйшым за 65 гадоў;
  • людзям, чыя прафесія звязана з высокай рызыкай «падчапіць» інфекцыю: медыцынскіх работнікаў, фармацэўтаў, педагогаў, а таксама спецыялістаў у сферы абслугоўвання і інш;
  • людзям з імунасупрэсіяй;
  • дзецям, якія наведваюць садкі, школы, установы з кругласутачным рэжымам знаходжання, а таксама навучэнцам і студэнтам.

У апошнія гады прыкладна 40% жыхароў Беларусі зрабілі прафілактычныя прышчэпкі супраць грыпу. Дзякуючы чаму ў рэспубліцы не рэгіструюцца эпідэміі. Сярод вакцынаваных хварэюць на грып толькі 2-3%, астатнія – гэта тыя, хто прышчэпку не зрабіў. Разам з тым, падкрэсліла Іна Карабан, вакцынацыя супраць грыпу накіравана ў першую чаргу на прадухіленне развіцця цяжкіх ускладненняў. 

Прафесар кафедры інфекцыйных хвароб БДМУ Сяргей Жаваранак упэўнены, што з грыпам можа сутыкнуцца кожны. Пытанне ў тым, як ён перанясе такую «сустрэчу». Імунітэт пасля прышчэпкі выпрацоўваецца ўжо праз 2-3 тыдні і працуе на працягу паўгода. Менавіта таму рабіць прышчэпку варта штогод.

Ну, і вядома, не варта забываць пра простыя меры прафілактыкі:

  • падчас сезона АРВІ пажадана пазбягаць месцаў вялікага збору людзей;
  • рэгулярна праветрываць жылое памяшканне. Пажадана, каб тэмпература паветра ў пакоях не перавышала 22 ° С, вільготнасць – 40-70%;
  • не забываць пра вільготную прыборку;
  • мыць рукі. Калі няма магчымасці памыць рукі, карыстайцеся вільготнымі сурвэткамі альбо адмысловымі спіртазмяшчальнымі гелямі;
  • у грамадскім транспарце трымацца за поручань лепш у пальчатках;
  • у вашай сям'і хтосьці захварэў? Паспрабуйце вылучыць яму асобны пакой і посуд. Калі такой магчымасці няма, выкарыстоўвайце медыцынскую маску. Перыядычна мяняйце яе.

Памятаеце, што калі хворы чалавек чхае, вірус распаўсюджваецца на адлегласць да 5 метраў, пры кашлі – да 2-х метраў.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

80 0 19

Нарадзілася і жыву ў Мінску. У 1995 годзе скончыла сталічную сярэднюю школу №168, затым паступіла ў Беларускі дзяржаўны ўніверсітэт на факультэт журналістыкі. Пасля заканчэння вучобы ў 2000 годзе была размеркаваная ў Беларускае тэлеграфнае агенцтва (БелТА), дзе 8 гадоў прапрацавала спецыяльным карэспандэнтам аддзела палітычнай і сацыяльнай інфармацыі. У розныя гады асвятляла падзеі ў сферы навукі, культуры, адукацыі і аховы здароўя. У 2011 годзе перайшла ў прэс-службу Міністэрства аховы здароўя. Кола маіх абавязкаў уключала, у тым ліку арганізацыю сустрэчаў спецыялістаў са СМІ, складанне прэс-рэлізаў, забеспячэнне журналістаў інфармацыяй пра дзейнасць сферы аховы здароўя, а таксама падрыхтоўку аператыўных каментароў экспертаў і фарміраванне стужкі навінаў афіцыйнага сайта міністэрства. З 2017 года працую ўласным карэспандэнтам аддзела інтэрнэт-праектаў рэдакцыі газеты «Медыцынскі веснік». З'яўляюся аўтарам публікацый на інфармацыйным партале «Здаровыя людзі» і сайце для падлеткаў «Teenage.by».