30.12.2018
30.12.2018

Тры вытанчаныя гарачыя стравы да навагодняга стала з ялавічыны, птушкі і рыбы

logo
Рэцэпты
0 27
Памер шрыфта:
  • A
  • A
  • A

Асноўная страва таму так і называецца, што ёй адведзена галоўная роля на любым стале. Правільна падабраная страва здольная нават звычайную вячэру ператварыць у маленькае свята. А вось промах апусціць у ранг будзённых самую доўгачаканую ўрачыстасць, напрыклад, святкаванне Новага года і Раства.

Таму мы падабралі для нашых чытачоў тройку вытанчаных і арыгінальных гарачых страў для навагодняга застолля. Яны задаволяць густы самых патрабавальных гурманаў і без сумневу ўзначаляць рэйтынг вашых асабістых кулінарных пераваг. А галоўнае, мы не забыліся аддаць даніну павагі Усходняму календару: галоўнымі стравамі на навагоднім стале будуць ялавічына, птушка і рыба.

Ростбіф з соусам з чырвонай цыбулі

Далікатнае сакавітае мяса ў спалучэнні з соусам на аснове карамелізаванай цыбулі літаральна растае ў роце.

Ростбіф з соусам з чырвонай цыбулі

Інгрэдыенты:

  • мармуровая ялавічына без лішняга тлушчу – 1 кг;
  • аліўкавы алей – 2 ст.л.;
  • свежая морква невялікіх памераў – 8 шт.;
  • сельдэрэй – 1 шт.;
  • белае віно – 200 мл;
  • ялавічны булён – 500 мл;
  • лаўровы ліст – 2 шт.;
  • цыбуля – 500 г;
  • галінка чабору;
  • сметанковае масла – 2 ч.л.;
  • цукар – 1 ч. л.;
  • мука – 2 ч. л.;
  • соль, спецыі па густу.

Спосаб прыгатавання

Разагрэйце духоўку да 160°С.

Кавалак ялавічыны добра натрыце 1 ст.л. аліўкавага алею з соллю і спецыямі. Вазьміце вялікую каструлю (качачніца падыдзе ідэальна), нагрэйце яе і на сярэднім агні абсмажце мяса з усіх бакоў на працягу 10 хвілін.

Спадарожна на асобнай патэльні ў сметанковым масле абсмажце да залацістага колеру цэлую моркву і здробненае сцябло сельдэрэю.

Мяса выкладзіце на талерку. У каструлю, дзе яно абсмажвалася, уліце белае віно і праварыце на працягу дзвюх хвілін. Затым туды ж дадайце ялавічны булён, акуратна апусціце ў яго мяса, зверху пакладзіце абсмажаныя моркву і сельдэрэй, лаўровы ліст. Сачыце за тым, каб морква была не занадта пагружаная ў булён. Накрыйце каструлю накрыўкай і адпраўце ў разагрэтую духоўку на 3 гадзіны (праз 1,5 гадзіны ад пачатку тушэння мяса пры жаданні можна акуратна перавярнуць).

Калі ростбіф будзе амаль гатовы, займіцеся цыбульным соусам. У разагрэты на патэльні аліўкавы алей апусціце нарэзаную тонкімі колцамі цыбулю, галінку чабору, трохі спецый. Накрыйце накрыўкай і гатуйце на павольным агні 10-15 хвілін, пакуль цыбуля ні стане мяккай. Затым павялічце агонь, дадайце лыжку сметанковага масла, цукар і, часта памешваючы, дайце цыбулі карамелізавацца да цёмна-залацістага колеру. Галінку чабору можна выдаліць.

Гатовае мяса і моркву дастаньце з духоўкі, выкладзіце на страву. У каструлю з сокам, які застаўся пасля тушэння ялавічыны, апусціце карамелізаваную цыбулю, дадайце муку і на сярэднім агні, старанна вымешваючы, варыце 1-2 хвіліны пасля закіпання, каб атрымаўся густы цыбульны соус. Да гатовага ростбіфа яго падаюць у асобным кубку. У якасці гарніру ідэальна падыдзе запечаная гародніна.

Вострая мядовая гусь з печанай бульбай

Дастойная альтэрнатыва індычцы – гусь, глазураваная мёдам і спецыямі. Не горш па гэтым рэцэпце атрымліваюцца курыца і качка. Але трэба ўлічваць, што колькасць інгрэдыентаў у арыгінальным рэцэпце разлічана на гусь вагой 5 кг.

Вострая мядовая гусь з печанай бульбай

Інгрэдыенты:

  • тушка птушкі – 5 кг;
  • невялікія цыбуліны – 3 шт.;
  • часнок – 4-5 зубчыкаў;
  • апельсін – 1 шт.;
  • бульба – 1,5 кг;
  • суквецці гваздзікі – 2 шт.;
  • галінка размарыну;
  • пучок свежай пятрушкі;
  • раслінны алей – 2 ст.л.;
  • соль па густу.

Для глазуры:

  • мёд  – 3 ст.л.;
  • карыца молатая – 0,5 ч. л.;
  • гваздзіка молатая – 0,5 ч.л.;
  • чорны молаты перац  – па густу.

Спосаб прыгатавання

Нагрэйце духоўку да 180°С.

Для глазуры змяшайце мёд з карыцай, гваздзікай, перцам і пакуль адстаўце ўбок.

Выдаліце з тушкі гусі рэшткі трыбухоў і тлушч. Затым, выкарыстоўваючы нож ці востры відэлец, часта праткніце скуру птушкі, надаючы асаблівую ўвагу вобласці пад крыламі і вакол ножак.

Пакладзіце тушку ў вялікую каструлю. У асобнай ёмістасці ўскіпяціце 6 літраў вады. Павольна і асцярожна паліце гусь кіпнем. Скура птушкі стане шчыльнай і глянцавай. Дайце гусі астыць, затым дастаньце з вады і прасушыце папяровымі ручнікамі.

Затым натрыце гусь раслінным алеем і соллю, начыніце разрэзанымі напалову цыбулінамі, апельсінам, зубчыкамі часнаку і размарынам. Шчыльна абгарніце тушку фольгой і змясціце на духавую рашотку, папярэдне паставіўшы на дно духоўкі бляху, куды будуць сцякаць тлушч і сок птушкі. Запякайце 2 гадзіны.

У гэты час ачысціце бульбу, нарэжце тонкімі кружкамі. Злёгку пасаліце, дадайце трохі расліннага алею і змяшайце.

Праз вызначаны час дастаньце гусь, выдаліце фольгу. З бляхі зліце ў асобную ёмістасць сок, які сабраўся. На гэтую ж бляху пакладзіце роўным слоем падрыхтаваную бульбу, зверху змясціце гусь, накрыйце ўсю канструкцыю фольгой. Адпраўляйце ў духоўку яшчэ на 1 гадзіну.

І нарэшце – фінальны этап. Дастаньце бляху з бульбай і гуссю з духоўкі, выдаліце фольгу. Не здымаючы гусь з бляхі, пры дапамозе пэндзліка пакрыйце яе мядовай глазурай і вярніце ў духоўку яшчэ на 20-30 хвілін.

Перакладзіце гусь на вялікую талерку і, нічым не накрываючы, пакіньце хвілін на 30. Падавайце да стала з запечанай бульбай, упрыгожыўшы галінкамі свежай пятрушкі.

Стэйк з ласося з соусам з кінзы

Стэйк з ласося – адназначна бяспройгрышны варыянт для любога святочнага меню. А наш рэцэпт мае яшчэ і відавочныя перавагі: яго практычна немагчыма сапсаваць, а страва рыхтуецца ў імгненне вока – менш чым за 20 хвілін.

Стэйк з ласося з соусам з кінзы

Інгрэдыенты:

  • стэйкі з ласося – 2-4 шт.;
  • раслінны алей для смажання;
  • буйная соль;
  • свежамолаты чорны перац;
  • сок лайма (або лімона) па густу.

Для соуса:

  • грэчаскі ёгурт без дадаткаў – 250 мл;
  • лімон (ці лайм) – 1,5 шт. (1 – для цэдры і ½ – для соку);
  • свежая кінза – 1 пучок;
  • соль і свежамолаты чорны перац па густу;
  • молаты чырвоны перац або папрыка (па жаданні).

Спосаб прыгатавання

Для пачатку прыгатуем соус. Змяшайце ёгурт, цэдру лімона і лімонны сок, дробна пасечаную зеляніну кінзы, соль і перац. Запраўце соус на свой густ. Больш лімона, больш кінзы, больш перцу! Рэгулюйце густ соуса да таго часу, пакуль не захочаце есці яго лыжкай!

Затым прыступайце непасрэдна да стэйкаў. На сярэднім агні разагрэйце патэльню або сатэйнік. Змажце стэйкі з абодвух бакоў маслам, пасыпце буйной соллю і чорным перцам.

Абсмажце рыбу да залацістага колеру – прыкладна 4-5 хвілін з кожнага боку. Перакладзіце стэйкі на талерку, апырскайце лімонным сокам. Зверху пакладзіце 1-2 сталовыя лыжкі соусу з ёгурта і кінзы, прыцерушыце чорным перцам грубага памолу. Падавайце да стала адразу ж з чвэртачкамі лімона.

І няхай ваша свята будзе самым смачным!

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 27

Журналіст. Вышэйшая адукацыя. Сябра Беларускага саюза журналістаў. Стаж працы ў прафесіі – 20 гадоў. Беларуска. Нарадзілася ў г.Ганцавічы Брэсцкай вобласці. У 2001 годзе скончыла факультэт журналістыкі Беларускага дзяржаўнага ўніверсітэта па спецыяльнасці «Журналістыка». Працавала спецыяльным карэспандэнтам аддзела эканомікі газеты «Беларуская ніва», аглядальнікам аддзела пісьмаў, аглядальнікам аддзела сацыяльных праблемаў газеты «Савецкая Беларусь» (зараз – «Выдавецкі дом «Беларусь сёння»). З 2016 года – карэспандэнт уласны аддзела інтэрнэт-праектаў РУП «Рэдакцыя газеты «Медыцынскі веснік». З 2000 года з'яўляецца сябрам Беларускага саюза журналістаў (БСЖ). У 2002 годзе стала лаўрэатам прэміі БСЖ за лепшую журналісцкую працу. У 2017 годзе – лаўрэатам прэміі БСЖ «Залатое пяро».