22 Лістапада
22.11.2018

А ўлюбёны колер – сонечны!

logo
Думкі ўслых
114 0 37
Памер шрыфта:
  • A
  • A
  • A

Колькі розных парад мы чуем з усіх бакоў! Прычым такіх... даволі настойлівых. Дапамажы сабе сам. Будзь чараўніком – стварай цуды. Зрабіце свята самі. Зрэшты, калі пачаць разважаць, дык штосьці ў гэтым ёсць, ці не так?!

І сапраўды, таго свята ці цуду, прынца на белым кані, пярсцёнка з дыяментам чакаць можна до-о-о-оўга... Але нічога не спраўдзіцца. А як вынік – крыўды, раздражнёнасць з-за дробязяў, панылы настрой... Няспраўджаныя чаканні – яны такія, зусім не аптымістычныя.

Але не будзем больш пра сумнае! А пра стварэнне свята пагаворым бліжэй да Калядаў, добра?! Я ж сёння пра тое, што настрой таксама можна сабе стварыць – з дапамогай улюбёных колераў.

Калі прыгадваць іх у дачыненні да вопраткі, дык мой любімы – зялёны. Бо пасуе рыжым валасам. Не, не рудым – рыжым! Праўда, прызнаюся, але па сакрэту: ён не мой натуральны!

Апошнім часам штосьці палюбіла чырвоны. Кажуць, дадае агрэсіўнасці. Ну-у-уу... Можа, у добрым сэнсе. А ўпэўненасці – дык дакладна! Усяго гэтага мне сапраўды не хапала ажно цэлы год! І не верце таму, што ў пакоі, дзе шмат што – усіх адценняў чырвонага, госці адчуваюць агрэсію. Ёсць у нашай кватэры такі. І яшчэ ніхто мяне там не пабіў!

Калі гаварыць пра колер кветак, прадметаў, дык мой улюбёны – сонечны! Жоўты! І пры гэтым я б зусім не назвала б сябе стопрацэнтнай аптымісткай... Вось так неадназначна.

Вельмі люблю жоўтыя кветкі. Хаця як там у добра ўжо прызабытай песні? Пра жоўтыя цюльпаны... Вестуны расстання? Ніколі не глядзела на іх з гэтага боку. Люблю, калі дораць жоўтыя хрызантэмы, вырошчваю шмат гатункаў кветак на дачы менавіта сонечнага колеру. Зірну на іх – і настрой узнімаецца!

Менавіта з-за сонечнасці, а не толькі з-за водару і смаку, люблю плады айвы японскай. Адзін яе шарык ляжыць ля настольнай лямпы... Ага... І яна таго ж колеру. Прыемна карыстацца жоўтай туркай для кавы, якая зроблена пад мармур.

Цікава, што псіхолагі пра жоўты колер таксама кажуць неадназначна. Маўляў, людзі, якія яго абіраюць, валодаюць як станоўчымі, так і адмоўнымі якасцямі. Прачытала. Прымерала на сябе. Не-а... Далёка не ўсё супала. Насамрэч усё індывідуальна.

Да таго ж, жоўтых рэчаў у мяне ў гардэробе зусім мала. Праўда, памятаю, як аднойчы літаральна завісла ля ярка-жоўтага вязанага швэдара. Можна сказаць, зрабіла на яго стойку, як паляўнічы сабака! Але адразу ж пачула свой унутраны голас: “А ну-ка, адыдзіся ад яго! Ты ж сама можаш такі звязаць! Яшчэ і лепшы!” Ага, магу... Ну, не сварыся на мяне, пайшла!

А які ваш любімы колер па жыцці? І чаму?

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

114 0 37

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.