12.03.2021
12.03.2021

А хтосьці ў сакавіку збірае… ананасы! :)

logo
Думкі ўслых
0 030
Памер шрыфта:
  • A
  • A
  • A

Ну вось мімаволі зайздросціш, бывае, тым, у каго ўвесь год – лета! 🙂 Хаця і разумееш, што вечнае лета таксама надакучвала б. Асабліва, калі з дзяцінства зведалі, што такое снежныя зімы. Але-але… То зайздросна (ха-ха!) тым, у каго мімоза на 8 Сакавіка расце проста на вуліцы… Ірві – не хачу. А то тым, хто ў сакавіку збірае… ананасы! 🙂 Тым больш, што сёння – Сусветны дзень ананаса! Хачу ў Бразілію! 🙂

Ананас. Карысць ананаса для арганізма.

Насамрэч гэта жарт, і ў Бразілію, на радзіму ананасаў, я не хачу дакладна. Што ж тычыцца самога ананаса… Даўней, калі гэтая экзотыка толькі-толькі з’явілася, набывалі яго да святаў. Ананас на Новы год?! Круцяк! Між іншым, кажуць, што ў Кітаі сям’я не садзіцца на Новы год (кітайскі, вядома ж!) за стол, пакуль на ім не будзе ананаса.

А ў нас было і тут сваё «але»… Часцяком фрукт трапляўся недаспелым, салодкасці ў яго практычна не мелася (а гэта быў час трох лыжак цукру ў гарбату! Ну, вы разумееце…). І асаблівага задавальнення ад спажывання – таксама. Таму зараз да ананаса асабіста я дыхаю роўна. 🙂 А вось марынаваны – люблю. Асабліва ў салаце.

Першае ж знаёмства з ананасам адбылося яшчэ падчас майго шчаслівага дзяцінства ў Савецкім Саюзе, калі ў кіёск, што гандляваў марозівам і размяшчаўся акурат насупраць школы, завезлі ананасы, замарожаныя кавалачкамі. Вось адразу смак спадабаўся! А пра карысць ананаса, вядома ж, даведаліся значна пазней.

Ананас. Вітаміны і мінералы.

А ці ведаеце вы, што ў Расіі ў свой час ананас… тушылі, варылі і гатавалі з яго першую страву?! 🙂 Асабіста ў мяне і думкі зараз такой не ўзнікае. А ў вас?! Экзатычны фрукт, і ўсё на гэтым. Спажываць – адпаведна.

Думаю, многія ўжо шмат гадоў ведаюць, што ўжыванне ананаса, соку з яго (толькі натуральнага!) спрыяе пазбаўленню ад лішняй вагі. Хаця, вядома ж, на адных ананасах не пахудзееш. Ды яшчэ ў тых месцах, у якіх хочаш… 🙂 А чым жа яшчэ ён карысны для нас?

У ім утрымліваюцца практычна ўсе вітаміны групы В, вітамін С. Ёсць фермент брамелайн, які спрыяе расшчапленню бялку. У ананаса нізкі глікемічны індэкс. Яго могуць спажываць хворыя на цукровы дыябет.

Ананас. Хворым на цукровы дыябет таксама можна.

Марганец і магній, фосфар і натрый, жалеза, калій і кальцый – усё гэта, па сцвярджэнню даследчыкаў, у ананасе маецца. Плюс клятчатка, якая дапамагае пазбавіцца ад запораў.

А што тычыцца нормы… Урачы раяць спажываць не больш за 200 грамаў ананаса ў дзень. І гэта, між іншым, цэлая сутачная норма аскарбінкі.

Але! Толькі не людзям з гастрытам, павышанай кіслотнасцю і язвай страўніка. Забаронена! Паводле некаторых даследаванняў, не варта есці гэты фрукт і цяжарным. Астатнім, як заўсёды, асцярожна і прыслухоўваючыся да рэакцыі ўласнага арганізма. Бо магчымыя праявы алергічных рэакцый.

Ананас. Каму ўжываць з асцярогай.

«Ну вось, так добра ўсё пачыналася, – могуць закапрызіць некаторыя, – а цяпер суцэльныя абмежаванні і папярэджанні». Ну, нічога не зробіш. У такі час мы жывем…

А вы любіце смузі?! Тады гэты рэцэпт – для вас!

Інгрэдыенты:

  • Свежы ананас – 200 г.
  • Банан – 1 шт.
  • Шпінат – 300 г.
  • Вада – 300 мл.

Прыгатаванне:

  1. Парэзаць ананас і банан кубікамі.
  2. Пакласці ў блэндар.
  3. Дадаць шпінат і ваду.
  4. Здрабніць-перамяшаць да аднароднай масы.

Смачна піць! 🙂

Хаця я, па шчырасці, абышлася б тут без шпінату… 🙂 Ды і не так часта ён з’яўляецца ў крамах нашага гарадка…

Ананас. Смузі са шпінатам.

Цікава было б паспрабаваць вырасціць ананас дома – з хвосціка. Ведаю, што ў некаторых умельцаў гэта атрымліваецца. Уяўляю сабе, як цікава назіраць да ростам і развіццём пасаджанага! Але там столькі ўмоў трэба захаваць… Прычым для пасадкі падыдзе хвосцік толькі са спелага ананаса.

Я б, мабыць, паспрабавала б вырасціць ананас з насення. Гэта неяк мне бліжэй. Але пакуль што не бачыла ў продажы такога экзатычнага насення. А можа, проста не прыглядалася?! 🙂 А вы?!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 30

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.