8 Снежня
08.12.2018

Адлік пайшоў?!

logo
Думкі ўслых
112 0 29
Памер шрыфта:
  • A
  • A
  • A

У кожнага з нас свая кропка адліку часу да надыходу Новага года. На адным з парталаў гэта – першага снежня, у маёй знаёмай – ад першага снегу, у дачкі сяброўкі – з таго часу, як яна напісала ліст Дзеду Марозу і пачала нецярпліва чакаць падарункаў... А ў нас у Чэрвені адлік можна пачынаць з таго дня, як на плошчы з’яўляецца галоўная ёлка горада.

Калісьці гэта былі дні снежня, бліжэй да 25-га, да каталіцкіх Калядаў. Ёлку тады адразу ж і ўпрыгожвалі, і запальвалі ў цёмны час сутак на ёй зорку ды агеньчыкі. А прадчуванне свята проста ўрывалася ў нашы сэрцы і душы, як свежы павеў ветрыку...

Цяпер ёлка да нас урачыста прыбывае на вялізным прычэпе ў суправаджэнні іншай грувасткай тэхнікі ўжо бліжэй да пачатку першага зімовага месяца. Былі гады, калі нават 1-га снежня яе ўжо ўсталёўвалі. І жыхары горада ледзь не ў заклад ішлі: паабсыпаюцца зялёныя іголачкі да Новага года ці ўсё ж застануцца?! Але ёлкі штораз здзіўлялі сваёй трываласцю.

Хаця надвор’е традыцыйна не песціла навагоднія дрэвы. І вятры імкнуліся паскідаць убранства, а то і паваліць лясную госцю. І дажджы старанна намочвалі зялёныя махнатыя лапы – так, каб яны апускаліся ўніз і цацкі з іх саслізгвалі самі...

Сёлета фота ёлкі, якую ўстанаўлівалі на плошчы ў Чэрвені, брат даслаў мне 3-га снежня. Адразу штосьці яна мне не дужа спадабалася... Але калі яе трохі «папушысцілі» штучна, прывязаўшы дадатковыя галіны... Наколькі я ўчора змагла разгледзець у не дужа яркім святле зблізку, нармалёвая атрымалася.

Ставілі яе на снег. Пастаяла яна пад снегам. Здаецца, пашанцавала з надвор’ем нашай сёлетняй навагодняй прыгажуні. Але не! Вось ужо абяцаюць вятры і дажджы. Мабыць, Снежань прыгадаў, што Лістапад яшчэ не адпрацаваў усю сваю праграму. Пускае пагаспадарыць... Будзем спадзявацца, што і гэтая ёлка з годнасцю вытрымае выпрабаванні і шчыра парадуе дзяцей ды дарослых на калядныя і навагоднія святы.

Што датычыцца самай прыгожай чэрвеньскай ёлкі, дык асабіста мне прыгадваецца пачатак дзевяностых гадоў мінулага ўжо стагоддзя. У той год было шмат шышак на ялінках. Ніколі больш ні да, ні пасля столькі не бачыла! Дык вось гарадская ёлка паўстала адразу натуральна ўпрыгожанай – уласнымі шышкамі! І шырокая яна была, і пушыстая... Штосьці неверагоднае!

Шкада толькі, што не засталося з таго часу яе фотаздымкаў.  На гэтым, падабраным, толькі падобны маленькі фрагмент... Затое дома захоўваюцца здымкі сямейнікаў на той жа Новы год з букетамі яловых лапак якраз-такі з шышкамі ў вазах. Чорна-белыя фота, вядома ж. Каляровыя з’явіліся трохі пазней. Родныя здымаліся па аднаму, па двое і ўсе разам. Яшчэ была жывая наша бабуля Ксенія, якой ужо амаль 25 гадоў няма з намі...

...Едуць па гарадах вялікіх і малых ёлкі. Натуральныя і штучныя, высокія і шырокія. І разам з імі едзе радасць ад прадчування свята. А дзесьці ўнутры нас уключаецца кропка адліку. Да Новага года засталося 23 дні...

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

112 0 29

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.