У апошнія дзесяцігоддзі, адзначаюць спецыялісты, інстытут сям’і ў Беларусі перажывае змены. Мужчыны і жанчыны ўступаюць у шлюб у больш дарослым узросце (сярэдні ўзрост, калі прымаецца рашэнне аб стварэнні сям’і ў нашай краіне, набліжаецца да 30 гадоў). Як вынік гэтага, пазней нараджаецца і першае дзіця.
Зараз у нашай краіне пражывае больш за 2,7 млн.сем’яў. Сёння, 15 мая, яны адзначаюць сваё «прафесійнае» свята – Міжнародны дзень сям’і. Напярэдадні гэтай даты пра тое, навошта ў Беларусі патрэбная ідэалогія моцнай сям’і, праблему позніх родаў, работу службы ранняга ўмяшання і многае іншае распавялі журналістам у Нацыянальным прэс-цэнтры:
- намеснік міністра працы і сацыяльнай абароны Валерый Кавалькоў;
- начальнік Галоўнага ўпраўлення арганізацыі медыцынскай дапамогі і экспертызы Міністэрства аховы здароўя Алена Богдан;
- галоўны спецыяліст Галоўнага ўпраўлення выхаваўчай работы і маладзёжнай палітыкі Міністэрства адукацыі Алена Сімакова.
Сацыяльная падтрымка
Па словах Валерыя Кавалькова, сёння ў краіне створаны самыя спрыяльныя ўмовы для мацярынства, нараджэння і выхавання дзяцей. Прававыя гарантыі прадастаўляюцца жанчыне яшчэ да нараджэння дзіцяці. Гэта адпачынак па цяжарнасці і родах з выплатай дапамог, бясплатнае медыцынскае абслугоўванне. Пасля нараджэння дзіцяці прадастаўляецца адпачынак па яго догляду на 3 гады з выплатай дапамогі.
Пільная ўвага надаецца таксама пытанням забеспячэння бяспекі маленькіх жыхароў краіны. З гэтай мэтай для мам і татаў ствараюцца цэнтры па навучанні ўмовам бяспечнага пражывання дзяцей. Падобныя ўжо працуюць у 10 родадапаможных установах краіны (Раддом Мінскай вобласці, РНПЦ «Маці і дзіця», а таксама ў Барысаве, Салігорску, Гомелі, Гродне, Брэсце і Мінску).
