14.05.2021
14.05.2021

Пагроза для гісторыі, альбо Чаму здараюцца пажары?!

logo
Думкі ўслых
0 035
Памер шрыфта:
  • A
  • A
  • A

Так, гэта не Нотр-Дам-дэ-Пары – у сусветным, так бы мовіць, маштабе… Але для вернікаў Беларусі, магчыма, яшчэ большы па значнасці. Старажытны Будслаўскі касцёл… Пажар на светлае свята Радаўніцы. Знак? Выпрабаванне? Альбо чарговая ахвяра людской неабачлівасці?

Будслаўскі касцёл. Пажар 11 мая 2021 года.

І зноўку гарэў дах. Як калісьці на Нясвіжскім палацы. І зноўку пажар у святыні. Як спапялілася ад яго ўшчэнт колькі гадоў таму ў ноч напярэдадні Раства Хрыстова драўляная царква Пакроваў Прасвятой Багародзіцы ў Хатлянах, што на Уздзеншчыне.

Як яшчэ больш пацярпелі (ужо ад падпалу) у ноч з 6 на 7 лістапада 1987 года руіны касцёла Святога Антонія, што ў вёсцы Раванічы Чэрвеньскага раёна. І гэты журботны спіс, на жаль, можна працягваць.

І я ў чарговы раз з вялікім жалем заўважаю: ну што мы робім з нашай гісторыяй?! Бо не наканаванне Боскае тут праглядаецца, а якраз-такі след чалавечага ўмяшальніцтва. Дзе – наўмысны, дзе – ненаўмысны… Але хіба ад апошняга лягчэй?!

Агнём бязлітасна знішчаецца старажытнасць, памяць, еднасць з продкамі… І не толькі ж вялікія выдаткі патрабуюцца на аднаўленне. Новае ніколі ўжо не будзе старым, старажытным, каштоўным з пункту гледжання гісторыі… І ад гэтага таксама вельмі скрушна. Ці не дойдзем мы праз колькі гадоў ці іх дзясяткаў да суцэльных навадзелаў?!

Але вернемся да Будслаўскага касцёла. Людзі ўсцешаныя (калі можна ўжыць гэтае слова ў такой сітуацыі), што многае атрымалася выратаваць. У тым ліку – і дзякуючы зладжанай працы выратавальнікаў з МНС.

Хаця, як і заўсёды, знаходзяцца тыя, хто лепей ведае, як што рабіць. У тым ліку і тушыць пажары. Але, як вядома, збоку ўсё бачыцца лёгкім і простым… І тут мне цалкам зразумелая крыўда афіцыйнага прадстаўніка МНС Беларусі Віталя Навіцкага ў адрас «актыўных сеткавых экспертаў». Хаця на гэты раз, па яго прызнанні, нават іх было зусім мала.

А пра зробленае – практычна з першых вуснаў, ад яго ж. Выкладзенае ў вольным доступе на старонцы Віталя Навіцкага ў ФБ. Дазволю сабе працытаваць (пераклад на беларускую мову мой).

Віталь Навіцкі.

«Вельмі спрошчана лічыць, што пры такіх пажарах ёсць дзве тактыкі. Першая – лей і не шкадуй. Можна і пенай, можна і верталётамі, усё залежыць ад тэхнічных магчымасцяў. Але ўжо першыя работнікі МНС, якія прыбылі на месца праз чатыры хвіліны пасля паведамлення, зразумелі: тут ёсць за што пазмагацца. І вырашылі дзейнічаць інакш.

Адразу ж былі запытаныя дадатковыя людзі і тэхніка. Акрамя выратавальнікаў з суседніх раёнаў, прыехалі хлопцы з Мінскага гарадскога ўпраўлення МНС. На выезд пад’ёмнай тэхнікі са сталіцы пайшло пару хвілін. Іх досвед таксама спатрэбіўся ў Будславе.

А далей была «кропкавая» падача вады. Паблізу алтара, паблізу аргана, які нельга было вынесці, але трэба было выратаваць, у схаваных поласцях канструкцый даху.

Вядома, малюнак атрымаўся не такі яркі: 12 лафетных ствалоў выглядалі б куды больш эпічна. З агнём справіліся б хутчэй, але дахам, які абрынуўся б, дакладна не абышліся па наступствах. Не кажучы ўжо пра ваду, якая яшчэ больш бы змыла/ размыла/знішчыла ўслед за агнём.

Пасля лакалізацыі (гэта калі полымя не распаўсюджваецца, не наносіць дадатковай шкоды), калі агонь знік і дыму стала значна меней, некаторыя СМІ нават паспяшаліся напісаць, што пажар ліквідаваны. Але ў рэальнасці хлопцы працягвалі абследаванне ўсіх нішаў і ўсіх элементаў даху. У 15:21 бітва за касцёл была скончаная, а цяпер пачынаецца карпатлівая праца па яго аднаўленні...»

Будслаўскі касцёл. Унутры пасля пажару.

Патрэбныя грошы… Патрэбныя рукі… Майстры… Неабыякавыя людзі… Думаю, такіх знойдзецца дастаткова. У многіх сітуацыях беларусы яднаюцца, а ўжо ў такіх…

Вядома ж, лепей, каб падобнага не здаралася. Але, на жаль, гісторыя сапраўды ў большасці выпадкаў не вучыць. Чамусьці… І нават калі (раптам!) знойдуць вінаватых у пажары… Што, ад гэтага Будслаўскі касцёл вокамгненна ўзновіцца? Вернецца да свайго першапачатковага стану???

Лепей бы зараз распачаць маштабнае абследаванне стану ўсіх гістарычных і рэлігійных пабудоваў. Каб папярэдзіць, наколькі гэта магчыма, падобнае… Але, на жаль, і гэта не гарантуе паўтарэння сумных падзей. Пра што сведчыць нават невялікае пералічэнне на пачатку матэрыялу…

І колькі, колькі яшчэ патрэбна пажараў, каб мы нарэшце гэта ўсвядомілі?! А Будслаўскаму касцёлу – быць! Я ў гэтым упэўненая…

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 35

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.