Штогод 26 чэрвеня ў свеце адзначаецца Міжнародны дзень барацьбы са злоўжываннем наркатычнымі сродкамі і іх незаконным абаротам. Пра сітуацыю ў Беларусі і метады лячэння асоб, якія ўжываюць псіхатропныя рэчывы, а таксама пра новыя спосабы рэабілітацыі ў Нацыянальным прэс-цэнтры распавялі:
- Вячаслаў Гранькоў, каардынатар праграм па інфекцыйных захворваннях краінавага офіса СААЗ у Рэспубліцы Беларусь;
- Генадзь Казакевіч, начальнік галоўнага ўпраўлення па наркакантролі і супрацьдзеянні гандлю людзьмі Міністэрства ўнутраных спраў Рэспублікі Беларусь;
- Іна Белаец, загадчыца сектара наркалогіі арганізацыйна-метадычнага аддзела Рэспубліканскага навукова-практычнага цэнтра псіхічнага здароўя.
СААЗ: Чалавек павінен быць упэўнены ў ананімнасці на 100%
Па словах Вячаслава Гранькова, пазіцыя СААЗ, як і Упраўлення ААН па наркотыках і злачыннасці, заключаецца ў тым, што кожны чалавек, які пакутуе ад залежнасці, павінен атрымліваць поўны комплекс медыцынскіх паслуг. Эксперт распавёў пра важныя прынцыпы аказання дапамогі асобам, якія пакутуюць ад наркатычнай залежнасці. І ў ліку першых ён назваў даступнасць лячэння і яго «прывабнасць», або, іншымі словамі, забеспячэнне канфідэнцыяльнасці звароту ў медыцынскую ўстанову.
Новы цэнтр працяглай рэабілітацыі і сайт для дзяцей
Як адзначыў Генадзь Казакевіч, нягледзячы на тое, што ўзровень наркапагрозы ў краіне захоўваецца (па дадзеных МУС, рэальная колькасць наркаспажыўцоў у Беларусі складае не менш за 88,5 тысячы чалавек), праца праваахоўных органаў дае свае станоўчыя вынікі.
Дарэчы, яшчэ адна ініцыятыва, якую прапанавала МУС, тычыцца прафілактыкі наркаманіі сярод падлеткаў. На інфармацыйным рэсурсе https://pomogut.by/ з’явіцца інфармацыя і для дзяцей.
Стацыянарнае лячэнне і замяшчальная тэрапія
Як патлумачыла Іна Белаец, лячэнне нарказалежных у нашай краіне ажыццяўляецца на бясплатнай і платнай аснове. Рэабілітацыйныя праграмы ў стацыянарах разлічаныя на 21-28 дзён.
Для наркаманаў, якія ўжываюць ін’екцыйныя наркотыкі, дзейнічаюць праграмы замяшчальнай тэрапіі (метадонам). Зараз у Міністэрстве аховы здароўя разглядаецца магчымасць правядзення замяшчальнай тэрапіі іншымі прэпаратамі. Усяго ў Беларусі дзейнічае 19 кабінетаў, у якіх ажыццяўляецца праграма замяшчальнай тэрапіі метадонам.
