07.04.2021
07.04.2021

Чакаем буслоў і… турбуемся пра здароўе!

logo
Думкі ўслых
0 035
Памер шрыфта:
  • A
  • A
  • A

Сёння ў праваслаўных вернікаў вялікае рэлігійнае свята – Дабравешчанне (Благавешчанне, Звеставанне). У народзе звычайна чакаюць прылёту буслоў. Свой дзень народзінаў святкуе Сусветная арганізацыя аховы здароўя (СААЗ), чый краінавы офіс ёсць і ў Беларусі. І ўсе разам мы адзначаем Сусветны дзень здароўя!

Дабравешчанне. Сусветны дзень здароўя.

Бадай, самае вядомае, так бы мовіць, кіраўніцтва да дзеяння 7-га красавіка – «На Благавешчанне дзеўка касу не пляце, птушка гнязда не ў'е». То бок, працаваць не раяць. «На Благавешчанне нават і птушка пярынкі не занясе на гняздо – такое важнае свята» – прыкмячалі нашыя продкі.

Вядома, шмат чаго змянілася з таго часу. Той, хто далёкі ад рэлігіі, увогуле не звяртае ўвагі на такія забароны. У набожнай (у меру) сям’і маёй мамачкі на Смаленшчыне, колішняй беларускай яе частцы, прытрымліваліся наступнага. Працаваць браліся ўдзень дзесьці а першай, калі служба ў царкве заканчвалася. Як па мне, вельмі разумнае рашэнне. Ім таксама стараюся кіравацца.

Даўней лічылася, што менавіта на Дабравешчанне ў Беларусь вяртаюцца буслы. Але паколькі апошнім часам літаральна ўсе поры года самі на сябе не падобныя… Дык буслоў сёлета ўжо ў некаторых абласцях згледзелі.

Дабравешчанне. У народзе лічыцца, што ў гэты дзень вяртаюцца буслы.

Дарэчы, а ці ведаеце вы, што згледзець бусла на Дабравешчанне – сапраўды добрая прыкмета?! Асабліва – птушку ў палёце. Лічылася, што тады і справы будуць у парадку цэлы год, і ногі ў таго, хто ўбачыць, балець не будуць. А калі пабачыць першы раз у годзе бусла, які стаіць… Так што лепей няхай лётаюць, няхай кружаць над намі! 🙂 Гэта такое захапляльнае відовішча!

Памятаю, як колькі гадоў таму ўлетку старалася падняцца а пятай ці а палове шостай раніцы, каб выправіцца на прагулку даўжынёй у 3-5 кіламетраў. І вось аднойчы, шпацыруючы па адной з ціхіх вулачак Чэрвеня, я згледзела бусла… проста ў сябе над галавой! Прычым ён ляцеў так нізка, што, здаецца, можна было ўхапіцца за яго лапы і выправіцца ў падарожжа, як казачны Нільс з дзікімі гусямі! 🙂

Звычайна мы гэтую прыкмету – убачыць бусла ў палёце – не звязваем з Дабравешчаннем. Проста імкнемся ўбачыць такога першы раз у годзе. І атрымлівалася! Неаднойчы. Так што пазіраем у неба, сябры! Магчыма, менавіта над вамі буслы пралятуць сёння!

Дабравешчанне. Вяртанне буслоў.

Марачы пра лёгкія ногі, плаўна пераходзім да тэмы здароўя. А гэта і харчаванне, і кантроль сваіх асноўных параметраў, і фізічная актыўнасць…

Дарэчы, а вы ведаеце, што фізічная актыўнасць – гэта не толькі ранішняя гімнастыка і не толькі заняткі спортам?! Якраз-такі СААЗ вызначае яе як любы рух, які патрабуе скарачэння мышцаў і выдаткавання энергіі. Больш падрабязна пра фізічную актыўнасць мы паразмаўлялі з беларуска-расійскім герантолагам Кірылам Прашчаевым.

І даведаліся, што не трэба арыентавацца на такую распаўсюджаную норму, як 10 тысяч крокаў. Што мы з задавальненнем кантралюем пры дапамозе нашых фітнэс-бранзалетаў. Хада – гэта яшчэ не ўсё. Хаця, вядома ж, лепей, чым нічога… Асабліва, калі ўся праца – за камп’ютарам.

«Ну вось даперакладаю гэтую старонку – і ўстаю, расхадзіцца…», «Зараз давярстаю толькі – і пайду, пахаджу…», «Дапішу блог да кропкі – і 10 прысяданняў…» Гэта ўсё я. А тады… «Ой-ёй-ёй, на ногі не ўстаць…», «Я думала – 5 хвілін прайшло, а насамрэч – паўтары гадзіны…»

Дабравешчанне. Сусветны дзень здароўя. Перапынкі ў працы.

Так яно звычайна і бывае. Таму калі няма каму даць чароўнага пендаля, трэба добра кантраляваць сябе самастойна. А з гэтым – праблема… 🙁 А ў вас?!

Мімаволі прыгадваецца… Не, не вытворчая гімнастыка на якім-небудзь месцы працы, а абавязковыя рухомыя перапынкі ў школе – і падчас маёй уласнай вучобы, і падчас працы настаўніцай. Вось здаецца – драбяза… Але ж – рух… Такі нам неабходны…

Паколькі з выпіваннем нормы вады ўжо больш-менш у мяне наладзілася, трэба брацца за перапынкі ў працы. Актыўныя. Хто са мной?! 🙂 І нагода ж добрая ёсць сёння – Сусветны дзень здароўя. Вось здароўя я вам усім і жадаю! 🙂

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 35

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.