5 Снежня
05.12.2020

Чаму немагчыма падняць руку і як пазбегнуць кантрактуры? Адказвае траўматолаг-артапед

logo
Адказваюць спецыялісты
0 046
Памер шрыфта:
  • A
  • A
  • A

Чаму баляць кісці і шыя ў офісных работнікаў? Як лячыць плоскаступнёвасць у дарослых? Калі ў тазасцегнавы сустаў устаноўлены пратэз, праз які час пратэзаваць другую нагу і ці трэба гэта? Да якіх урачоў звяртацца пры болю ў спіне, шыі і хвасцу? На пытанні чытачоў парталаў Здаровыя людзі і TUT.BY адказаў Алег Кезля, загадчык кафедры траўматалогіі і артапедыі БелМАПА, доктар медыцынскіх навук, прафесар.

Алег Кезля-1

Пераломы, расцяжэнні, прыпухласці

Мне 28 гадоў. Дыягназ: закрыты косапрадольны пералом асноўнай фалангі 4-га пальца кісці з ссоўваннем. Які тэрмін аднаўлення (зрастання) пералому са спіцамі? Якая верагоднасць паўторнага ссоўвання пасля зняцця спіцаў? Як уплывае перыяд абмежавання рухаў сустава на поўнае аднаўленне яго функцый? Якія могуць быць рызыкі пры доўгім/паўторным лячэнні пералому?

Тэрмін аднаўлення дадзенага пералому – 6 тыдняў. Верагоднасць паўторнага ссоўвання пасля зняцця спіцаў роўная нулю. Перыяд абмежавання рухаў сустава на поўнае выздараўленне ўплывае неістотна – праз 2-3 тыдні ўсе рухі адновяцца. Адзіная рызыка для сустава пры працяглым лячэнні пералому – развіццё кантрактуры (абмежаванне рухомасці сустава).

Мне 37 гадоў. У дзяцінстве быў пералом у перадплеччы. У перыяд зрастання, калі рука была ў гіпсе, атрымаў удар у вобласць пералому. Косць зраслася, але на месцы пералому засталася падскурная пухліна, якая баліць пры націсканні, дотыку, перапрацаванасці рукі, змене надвор'я. Каб нармальна спаць, штоночы даводзіцца карыстацца кампрэсійнай павязкай. Што параіце рабіць з такой хваробай?

Існуе такі дыягназ, як тугі падманны сустаў – ускладненне пасля пералому косці, калі няма правільнага зрашчэння, але пры гэтым няма і вялікіх ссоўванняў. Рэкамендую звярнуцца да траўматолага для ўдакладнення дыягназу. Калі гэта сапраўды будзе падманны тугі сустаў, тады неабходнае аператыўнае лячэнне.

Паўтара месяца таму расцягнуў звязкі ступні. Зараз у вобласці костачкі невялікая прыпухласць. Пройдзе альбо звяртацца да ўрача? У мяне няма левай рукі па локаць. Пратэз не нашу. Ці трэба рабіць зарадку для куксы? З 2002 года яна мяне не турбавала, зараз перыядычна ўзнікае цяжар і паколванне, часам хваравітае торганне.

Прыпухласць у вобласці костачкі пройдзе, да ўрача звяртацца неабавязкова. Для куксы зарадку рабіць не трэба. З нагоды цяжару, паколвання, хваравітага торгання рэкамендую звярнуцца да неўролага, магчымы астэахандроз шыйнага аддзела.

Мне 49 гадоў. Каля 4 гадоў таму выдалілі кантрактуру Дзюпюітрэна на правай далоні (быў сагнуты мезенец). Практычна адразу пасля аперацыі на далоні побач са швом з'явіўся шчыльны вузельчык, які пакрысе расце. Рэгулярна размінаю яго, далонь пакуль роўная, але ў ёй пачаўся боль пры апоры на руку (у раёне запясця з боку мезенца). Гэта рэцыдыў? У апошні час адчуваю дыскамфорт у левым мезенцы (баліць пры растапырванні пальцаў). Мяркую, што з'явіцца кантрактура, як калісьці на правай далоні. Парайце якія-небудзь практыкаванні/медыкаменты, каб не дапусціць развіцця кантрактуры.

Так, гэта рэцыдыў. Каб не дапусціць развіцця кантрактуры, рэкамендую расціраць далоні з выкарыстаннем сагравальнай мазі. Таксама можна рабіць фізіяпрацэдуры: да прыкладу, фонафарэз з лідазай – прэпаратам, які спрыяе рассмоктванню.

Ужо каля двух гадоў баліць кісць пасля ўдару (упала ў галалёд, пералому не было). Неаднаразова звярталася да ўрачоў, прычыну не вызначылі, сказалі, што болевы сіндром можа захоўвацца працяглы час. Улічваючы, што я офісны работнік і практычна поўны працоўны дзень рукі задзейнічаныя (камп'ютар, калькулятар), боль нагадвае пра сябе ўвесь час, у тым ліку ноччу. Што трэба зрабіць, каб высветліць прычыну болю для прызначэння адэкватнага лячэння?

Для пачатку трэба высветліць: баліць кісць альбо кісцевы сустаў. У кісцевым суставе можа быць краёвы пералом, падвывіх адной з костачак. Для гэтага трэба зрабіць МРТ кісцевага сустава і звярнуцца да траўматолага. Калі вышэйназваных парушэнняў не выявіцца, магчыма, прычына ў так званай хваробе офісных работнікаў: калі кісць увесь час знаходзіцца пад пэўным вуглом на мышцы камп'ютара, развіваецца яе хваравітасць. Рэкамендую памяняць становішча кісці: пакласці пад яе пракладку на стол, каб кісць была на адным узроўні з мышкай.

Мне 35 гадоў. Скрывіўся сустаў на мезенцы рукі. Затым пачало балець плячо, не магу падняць руку ўверх, балюча апусціць. Зараз пачало балець другое плячо. Што гэта можа быць?

Плячо можа балець з-за пашкоджання рататарнай манжэты – групы мышцаў, якія кіруюць верхняй канечнасцю. Яны могуць запаляцца, ірвацца, у выніку чаго пацыент не можа рухаць рукой. Пры скрыўленні сустава на мезенцы, калі не было траўмы, трэба абследаваць стан перыферычнай нервовай сістэмы. Да такой кантрактуры можа прывесці пашкоджанне сярэдняга альбо локцевага нерва. Рэкамендую ў першую чаргу звярнуцца да траўматолага.

Алег Кезля-2

Упаў. Здымак паказаў ганартроз 2 стадыі левага каленнага сустава. МРТ: пералом надкаленніка і пералом галоўкі малой галёначнай косці. Кіста Бекера. Сінавіт. Праз месяц выйшаў на працу, ацякае калена, не магу сагнуць да заканчэння працоўнай змены. Чым лячыць? Як зняць азызласць? Урачы выпісваюць толькі мазі (індавазін і ліятон).

Пералом надкаленніка, галоўкі малагалёначнай косці не можа зрасціся за месяц, на гэта патрабуецца больш працяглы перыяд. Гэта значыць, дыягназ не адпавядае апісанаму стану (праз месяц выйсці на працу пры такіх пераломах немагчыма). А вось калі маецца ўдар і дыягнаставаны ганартроз, дык прызначэнне названых мазяў абгрунтаванае, яны павінны дапамагчы зняць азызласць.

Мне 48 гадоў. Паўгода таму з'явіліся непрыемныя адчуванні ў левай руцэ. Звярнула ўвагу на невялікую прыпухласць каля костачак указальнага і сярэдняга пальцаў, якая праз некаторы час знікла. Траўмаў не было. Цяпер левай рукой не магу нічога падняць вагой больш за 1-2 кг, наліць ваду з чайніка ў кубак праблематычна. У становішчы лежачы на спіне руку над галавой не магу пакласці. Праз некаторы час яна нямее. Якое ў мяне захворванне можа быць?

Існуюць так званыя вузельчыкі Гебердэна. Гэта клінічная прыкмета хранічнага рэўматоіднага захворвання. Таму рэкамендую звярнуцца па кансультацыю да рэўматолага.

Лячэнне артрозаў: пратэзаванне, гіялуронавая кіслата

Сыну 38 гадоў, дыягназ: асептычны некроз галоўкі левага сцягна 3 ст., правага сцягна 1-2 ст. Астэаартрыт левага тазасцегнавога сустава, сінавіт. Ізаляваны паяснічны астэахандроз у сегменце L5-S1 з дыфузнай пратрузіяй міжпазваночнага дыска. Змешаная кантрактура левага тазасцегнавога сустава. Асноўны боль пры руху ў левым тазасцегнавым суставе. Зрабілі тры ін'екцыі аўтаплазмы з гіялуронавай кіслатой. Спадзяемся дацягнуць з эндапратэзаваннем да заканчэння каранціну ў бальніцы. Які тэрмін службы імпартнага пратэза? Колькі часу спатрэбіцца на аднаўленне пасля аперацыі на левым тазасцегнавым суставе? Калі можна будзе аперыраваць правы тазасцегнавы сустаў?

Тэрмін службы імпартных і айчынных пратэзаў аднолькавы. Але справа не ў тэрміне, а ў тым, як арганізм прымае 300 грамаў металу, пластмасы і керамікі. Калі прыме, тады пратэз можа працаваць і 20-30 гадоў. Але арганізм можа і адштурхнуць пратэз як «стрэмку» праз год пасля аперацыі. На паўнавартаснае аднаўленне пасля эндапратэзавання звычайна патрабуецца 3-4 месяцы.

Не трэба адразу ставіць на мэце аперыраваць і другі (правы) тазасцегнавы сустаў. На сёння магчымыя органазахавальныя аперацыі: тунэлізацыя, ратацыйная астэатамія і інш.

На якой стадыі артрозу неабходнае эндапратэзаванне сустава і ці магчымая альтэрнатыва аперацыі? У мяне 4 стадыя коксартрозу тазасцегнавога сустава. Важу 70 кг, хадзіць яшчэ магу, але адчуваю, што боль узмацняецца.

Эндапратэзаванне сустава – гэта «аперацыя адчаю», калі ўжо няма іншага выйсця. Выканаць яе – не праблема, праблема – колькі будзе працаваць канструкцыя і як арганізм адрэагуе на яе. Таму пакуль можаце хадзіць – хадзіце, лепей адтэрмінаваць гэтую аперацыю.

Ці могуць тазасцегнавыя суставы аднавіцца пры коксартрозе 1-2 ступені?

Суставы не могуць аднавіцца, але магчыма запаволіць паталагічны працэс з дапамогай хондрапратэктараў. Медыкаментознае лячэнне ў дадзеным выпадку доўгае – да паўгода.

У мамы (61 год) поліастэаартроз. Месяц турбуе моцны боль у назе і спіне (без абязбольвальных не можа ступіць на нагу і спаць). Няма апетыту. УГД брушной поласці паказала камяні ў нырках. Ёсць праблема па гінекалогіі. Па аналізах, прызначаных рэўматолагам, запаленчага працэсу ў суставах няма. Ці можа быць такі боль ад камянёў альбо гінекалагічных праблемаў, наступствам каранавіруса? Як палегчыць боль, акрамя абязбольвальных?

Поліастэаартроз – гэта адначасовае паражэнне некалькіх суставаў. Пры дадзеным захворванні ў запаленчы працэс можа быць уцягнуты і пазваночнік, што будзе выклікаць боль. Поліастэаартроз неабходна лячыць. Камяні ў нырках і гінекалагічныя праблемы таксама могуць быць прычынай болю. Болевы сіндром можа быць і пры спондылаартрозе (кансультацыя неўролага). Ці можа боль у назе і спіне быць наступствам каранавіруснай інфекцыі, на дадзены момант цяжка сказаць, паколькі гэтае пытанне ў стадыі вывучэння. Але відавочна, што COVID-19 уплывае на ўсе сістэмы арганізма.

Алег Кезля-3

Якія з'явіліся новыя метады лячэння артрозу сустава вялікага пальца нагі? Хто ў краіне займаецца фундаментальнымі даследаваннямі гэтай праблемы? Якія працэсы адбываюцца пры фарміраванні нарастаў на суставе і які іх хімічны склад? Ці можна выдаліць нарасты і дзе гэта можна зрабіць?

Думаю, што фундаментальна гэтым пытаннем ніхто не займаецца, бо для лячэння артрозу вялікага пальца ступні на дадзены момант існуе звыш 100 аператыўных методык. Нарасты – гэта касцяная тканка. Выдаляць іх можна. Але гэта вырашаецца індывідуальна, часам неабходна не выдаленне, а аперацыя на самім пальцы. Можаце звярнуцца па кансультацыю ў бальніцу да траўматолагаў-клініцыстаў, у тым ліку ў наш стацыянар – Мінскую абласную клінічную бальніцу.

Ці ёсць у Беларусі досвед лячэння суставаў ін'екцыямі гіялуронавай кіслаты?

У Беларусі назапашаны значны станоўчы вопыт прымянення гіялуронавай кіслаты для лячэння суставаў. Але гэта не ўніверсальная методыка, а па пэўных паказаннях.

Плоскаступнёвасць і пастава

Мне 48 гадоў. Дыягнаставалі плоскаступнёвасць падоўжную і папярочную, вельмі моцна вытыркаецца і баліць костачка на назе. Купіла артапедычныя вусцілкі. Якія вашыя рэкамендацыі ў дадзенай сітуацыі?

Вусцілкі трэба не купляць, а рабіць індывідуальныя на замову ў дыягнастычных цэнтрах. Сёння існуюць падлогавыя камп'ютары, якія будуюць мадэль вусцілкі канкрэтна пад пацыента. Прамысловыя вусцілкі – гэта як сярэдняя тэмпература па бальніцы, не вырашаюць праблемаў з плоскаступнёвасцю.

 Мне 37 гадоў. Плоскаступнёвасць 4-й ступені. Чытаў, што за мяжой гэта выпраўляюць ужыўленнем тытанавага валіка ў ступню. Ці праводзяцца падобныя аперацыі ў Беларусі? Калі не, дык якая альтэрнатыва?

Не заўсёды плоскаступнёвасць трэба аперыраваць. Лепей за ўсё замовіць індывідуальныя артапедычныя вусцілкі і насіць добры абутак. У Беларусі аперацыі па ўжыўленні тытанавага валіка я не сустракаў.

Мне 50 гадоў, вальгусная плоскаступнёвасць ног, ужо пачынаюць балець калені, тазасцегнавая косць, на левай назе з'явілася пятачная шпора. Што вы параіце?

Неабходна вырабіць індывідуальныя артапедычныя вусцілкі і насіць пастаянна ва ўсіх відах абутку, ад хатніх тапачак да зімовых ботаў. Лячэбны эфект будзе не адразу, а праз 4-6 месяцаў.

Пры пятачнай шпоры неабходнае кансерватыўнае лячэнне нестэроіднымі прэпаратамі, фізіятэрапія (магніт, фонафарэз з гідракартызонам, лазер). Турбуе не шпора, а запаленне надкосніцы над шпорай, што і выклікае болевыя адчуванні.

Мне 37 гадоў. Ці можна выправіць паставу з дапамогай практыкаванняў і з дапамогай гарсэта?

Выправіць паставу можна з дапамогай гарсэта і практыкаванняў. Але трэба дакладна ведаць: гарсэт – гэта часовая дапамога. Як толькі мы апранулі гарсэт, нашыя мышцы адпачываюць. І калі пацыент пастаянна яго носіць, гэта пагаршае сітуацыю. Нашэнне гарсэта неабходнае пры выкананні фізічных нагрузак, на адзін-тры гадзіны ў дзень.

Алег Кезля-4

Шыйны астэахандроз, хрусценне ў суставах

Пастаянна хрусціць шыя, пры намаганнях, бывае, цягне мышцы, шчоўкне – лягчэй робіцца. Якая можа быць прычына і куды звяртацца?

Гэта можа быць шыйны астэахандроз. Неабходна звярнуцца да неўролага.

Мне 32 гады. Пастаяннае хрусценне ў каленях, ступнях, плечавых суставах – гэта норма?

Гэта не норма, але прапанаваць медыкаментознае лячэнне альбо фізіятэрапію ў дадзенай сітуацыі цяжка. Гэта такая асаблівасць пацыента, якая з часам павінна прайсці.

У мяне шыйны астэахандроз некалькі гадоў. Які орган цела пачаў працаваць няправільна і чаму? Якую прафілактыку трэба рабіць? Што катэгарычна нельга? Ці можна неяк размінаць шыю раніцай? Ці трэба хадзіць на масаж, праграванне, у лазню? Нядаўна праходзіў даследаванне на хуткасць кровазвароту ў шыйных артэрыях. Яно выявіла, што ў левай артэрыі кроваток павольней, чым у правай. Ці можа гэта быць з-за астэахандрозу шыйнага аддзела?

Вобразна шыйны астэахандроз можна апісаць так: у падшыпнік, дзе павінна быць слізка і гладка, трапіў пясок. У шыйных пазванках пачынаецца развіццё адкладаў касцяной тканкі. У 50-60 гадоў – гэта натуральны ўзроставы астэахандроз. Калі ж ён развіваецца ў 20-30 гадоў, трэба шукаць прычыну. Гэта можа быць генетычна няправільнае развіццё шыйнага аддзела пазваночніка, залішнія фізічныя нагрузкі не па ўзросце, наступствы траўмаў, прафесійныя ўскладненні.

Я не раю займацца мануальнай тэрапіяй, каб «штосьці ўправіць» альбо «штосьці падцягнуць». Мы перыядычна сустракаем пацыентаў, якія пасля такіх упраўленняў маюць вялікія праблемы. Масаж, праграванне, лазня, гімнастыка для шыі раніцай – усё гэта дапушчальна. Зніжэнне кровазвароту ў шыйных артэрыях можа быць з-за астэахандрозу, што суправаджаецца, як правіла, галаўным болем, шумам у вушах.

Ці магчыма павярнуць астэахандроз шыйнага аддзела пазваночніка 2/3 ступені, калі рабіць гімнастыку, масаж і піць калаген 2-га тыпу? Апісаныя выпадкі, калі міжпазваночныя дыскі аднаўляліся пры павелічэнні фізічнай нагрузкі за кошт стымуляцыі кровазабеспячэння. Гэта праўдападобна?

Павярнуць назад астэахандроз немагчыма. Шкоды ад масажу і прыёму калагену 2-га тыпу не будзе. Сітуацыі, калі міжпазваночныя дыскі аднаўляліся за кошт паляпшэння кровазабеспячэння, непраўдападобныя.

Як вы ставіцеся да лячэння і кантролю астэахандрозу з дапамогай прэпаратаў АМЕГА-3, у тым ліку з дапамогай дозаў, вышэйшых за сярэднясутачную патрэбу? Ці рэальна аднавіць храстковую тканку і вярнуць здароўе пазваночніку? Як вы ставіцеся да лячэння шыйнага астэахандрозу з дапамогай мануальнай тэрапіі, у тым ліку пры дапамозе вяртання пазванкоў на месца, фарміравання правільнага лардозу? Якія апошнія даследаванні па тэме лячэння астэахандрозу ў замежных спецыялістаў?

Прэпараты АМЕГА-3 не лечаць астэахандроз, з дапамогай іх аднавіць храстковую тканку і вярнуць здароўе пазваночніку немагчыма. Таксама немагчыма з дапамогай мануальнай тэрапіі сфарміраваць правільны лардоз, а вось зрабіць пацыента паралізаваным за кошт гвалтоўнага выпраўлення пазванкоў можна. Шыйны астэахандроз – невычарпальная тэма ў медыцынскай навуцы, ідзе пастаянны пошук эфектыўных медыкаментаў і фізіяпрацэдураў, але цуду пакуль няма.

Ці ёсць магчымасць не адмаўляцца ад бегу пры шыйным астэахандрозе?

Лепей ад бегу адмовіцца, бо ўдар ступняў па зямлі негатыўна адбіваецца на шыйных пазванках. Лепей заняцца скандынаўскай хадой.

Як вы ставіцеся да хондрапратэктараў? Калі станоўча, якая схема лячэння і прафілактыкі пры астэахандрозе і пратрузіях?

Асабіста я стаўлюся да хондрапратэктараў вельмі добра. Гэтыя прэпараты дазваляюць затрымаць развіццё паталагічнага працэсу. Агульнай схемы лячэння няма, у кожнага пацыента яна індывідуальная. У Беларусі дастаткова замежных і айчынных эфектыўных прэпаратаў, якія з поспехам дапамагаюць пры гэтай праблеме. Падабраць правільную схему дапаможа траўматолаг.

Алег Кезля-5

Шыйны астэахандроз турбуе пару гадоў, з кожным годам сітуацыя пагаршаецца. Спрабавала іголкаўколванне, масажы, але боль вяртаецца праз два тыдні, з кожным разам на больш доўгі час. Падкажыце шэраг дзейсных прафілактычных мераў пры шыйным астэахандрозе.

Не набіраць лішнюю вагу, займацца гімнастыкай, рабіць аздараўленчы масаж надплеччаў і шыйнага аддзела, прымаць хондрапратэктары – прэпараты не спыняць захворванне, але будуць падтрымліваць храсток у пазваночніку.

Мне 42 гады. Што рабіць пры шыйным астэахандрозе пачатковай стадыі? З нязручнасцяў толькі хрусценне ў шыі і стамляльнасць. Ці дапамагае ўжыванне амінакіслаты глюказамін?

Аднаго глюказаміну недастаткова. Неабходна таксама прымаць хондраітын сульфат. Магчыма, паляпшэнне будзе.

Мне 42 гады. Ад болю ў шыі пакутую ўжо 10 гадоў. Грыжу дыска, якая паступова расце, зарабіў пры адчыненні цяжкага люка на гарышча галавой. Балець пачынала практычна заўсёды пасля сну. Месяц таму пасля сну прачнуўся з жудасным болем у шыі, правым плячы, здранцвеннем пальцаў правай рукі. Па выніках МРТ прызначылі медыкаментознае лячэнне. Боль сышоў, шыя цяпер не баліць, але здранцвенне пальцаў засталося. Штодня па 1-1,5 гадзіны нашу мяккі гарсэт для шыі. Але з рэгулярнасцю ў 1,5-2 месяцы боль усё роўна з'яўляецца, у асноўным, пасля нязручнага сну. Нейрахірургі кажуць пра аперацыю на шыі ў выпадку рэцыдыву: «Знікне сіла ў руцэ альбо фізічныя магчымасці – прыходзьце». Пакуль малады, можа ўсё ж такі зрабіць аперацыю? Калі не, дык як лячыцца і жыць без аперацыі?

Гэтае пытанне лепей вырашаць з нейрахірургам, у якога вы назіраліся. На мой погляд, калі боль перыядычна вяртаецца, аперацыю па выдаленні грыжы дыска неабходна выканаць не адкладваючы.

Ноччу моцна нямеюць рукі. Што рабіць?

Гэта прыкмета астэахандрозу. Рэкамендую рабіць звычайную зарадку з абавязковымі кругавымі рухамі галавой. Сэнс зарадкі – размяць мышцы. Мы спім у вызначаным становішчы, з-за гэтага мышцы зацякаюць. Таму неабходна іх увесь час размінаць пасля сну, прыводзіць у тонус. Гэта дзейсная прафілактыка.

Боль у спіне, паясніцы, шыі, пальцах, хвасцы: да каго звяртацца

Займаюся цяжкай атлетыкай. З'явіўся боль у спіне ў раёне 4-5 пазванка і цягне злева. Калі ўстаю з ложка раніцай, адчуваю боль. Што гэта можа быць і да каго звярнуцца?

Магчыма, варта абмежаваць заняткі гэтым відам спорту. Для цяжкаатлетаў характэрны карэньчыкавы сіндром, калі ў выніку вялікіх нагрузак утвараецца грыжа, якая цісне на карэньчык і выклікае боль. Неабходна звярнуцца да неўролага.

Што рабіць пры болю ў паясніцы пры астэахандрозе? Масаж якіх аддзелаў неабходна рабіць?

Трэба масажыраваць паяснічны аддзел пазваночніка, спаць на цвёрдым. Але для пачатку неабходна наведаць тэрапеўта і прайсці абследаванне, каб высветліць прычыну болю. Яго могуць выклікаць пухліны, гінекалагічныя захворванні.

Алег Кезля-6

Мне 41 год. Амаль штодня «ламае» шыю, гэта суправаджаецца галаўным болем. Пачалося з паступовага нарастальнага болю каля 8 месяцаў таму. Пакруціўшы направа-налева і па крузе галавой з хрусценнем, адчуваю, што боль памяншаецца. Часты ранішні моцны галаўны боль, які змяншаецца праз 10-15 хвілін пасля ўздыму. З якіх мераў пачаць? Масажы, МРТ, чыстка сасудаў?

Пачаць трэба з наведвання неўролага-клініцыста.

Мне 40 гадоў. Турбуе боль у шыі і ў раёне хвасца. Зрабіла рэнтген хвасца – усё нармальна. Наведала гінеколага, таксама няма пытанняў. Зрабіла УГД малога таза – праблемаў не выяўлена. Не ўдаралася і не падала. Праца сядзячая. Баліць, калі саджуся і ўстаю. Калі сяджу, прывыкаю, і боль не адчуваецца. Шыя цягне і пачуццё заціснутасці, калі сплю – баліць. Што гэта і куды звяртацца?

Боль у шыі можа быць звязаны з шыйным астэахандрозам. Таму неабходная кансультацыя неўролага. Боль хвасца можа быць выкліканы яго запаленнем. Па гэтым пытанні рэкамендую звяртацца да спецыялістаў у РНПЦ траўматалогіі і артапедыі.

У мужа (37 гадоў) трэці тыдзень баліць вялікі палец на назе. Артапед пасля здымка паставіў дыягназ: абвастрэнне старога пералому і артрыт. Пасля тыдня лячэння (хатні рэжым, мазь з ібупрафенам, ванны бішафіт) зрабілася лепей. У сувязі з працай (нагрузка на палец) боль вярнуўся. Як вылечыцца?

Гэта можа быць прыкметай падагры. Таму ў першую чаргу рэкамендую звярнуцца да тэрапеўта альбо рэўматолага, здаць аналізы на мачавую кіслату і разабрацца, гэта проста нагрузка на палец альбо парушэнне абменных працэсаў. У апошнім выпадку трэба лячыць агульнае захворванне.

Працую за камп'ютарам па 8-12 гадзін у суткі. Перыядычна ўзнікае жудасны боль у шыі, прычым з самай раніцы пасля сну. Калі спрабуеш нахіліць галаву наперад, назад, быццам канат напружваецца альбо ў шыі кол забіты. Часам нават проста роўна сядзець і спаць немагчыма, як быццам напружанне ў цемянной вобласці. Урачы адпраўляюць на масаж і рэкамендуюць сірдалуд. Але боль вяртаецца ўсё часцей: раней раз у паўгода, зараз кожныя 2 тыдні, аддае ў лапатку. Якое абследаванне парэкамендуеце?

Праца за камп'ютарам па 8-12 гадзін у суткі ў адным і тым жа становішчы якраз і прыводзіць да такіх болевых адчуванняў. Рэкамендую праз кожную гадзіну-паўтары рабіць перапынак у працы і займацца гімнастыкай: круціць галавой, рукамі, тулавам, прайсціся. Магчыма, тады ніякага абследавання і лячэння не спатрэбіцца.

Фасцыіт, дэфармацыя ног

Мне 45 гадоў. 25 гадоў таму быў пералом сцягна, пасля чаго нага зрабілася карацейшай на 1,5-2 см. Ці магчыма гэта цяпер выправіць з дапамогай аперацыі?

Праз 25 гадоў падоўжыць нагу магчыма, але лячэнне зойме не менш за паўгода. У той жа час розніцу ў 2 сантыметры можна кампенсаваць абцасікам альбо вусцілкай у абутак.

Мне 63 гады, асаблівых нагрузак не адчуваю, шмат за рулём. З апорна-рухальных хваробаў - меніскэктомія левая, вены на нагах выразаліся 30 гадоў таму. Ужо паўгода вельмі моцна баліць правая пятка, асабліва пасля становішча супакою (сну). Ці можа гэта быць фасцыіт? Якія абследаванні прайсці?

Гэта можа быць фасцыіт. Неабходна зрабіць рэнтгенаграму прамой і бакавой праекцыі пятачнай косці. Калі выявіцца пятачная шпора, прызначаюцца фармакалагічнае лячэнне і фізіятэрапія.

Алег Кезля-7

Маю вызначаную дэфармацыю левага галёнкаступнёвага сустава 3-й ступені (пятка моцна сышла вонкі, сярэдні аддзел з'ехаў унутр). Больш за год пакутую з-за пастаяннага знясільваючага болю. З-за нестабільнасці сустава падаю на роўным месцы, даводзіцца лячыць калені, локці. Гімнастыка, басейн, спецыяльныя вусцілкі, НПВП унутр і вонкава, хондрапратэктары – усё ў арсенале. Аднак стан сустава за апошні год значна пагоршыўся. Што можна зрабіць у маім выпадку?

Трэба звярнуцца да траўматолага, зрабіць аперацыю, якая адновіць ступню, – і боль пройдзе. У Беларусі такія аперацыі (артрадэз галёнкаступнёвага сустава) паспяхова практыкуюцца.

Дысплазія, скаліёз, боль у пятцы ў дзяцей

Майму дзіцяці 2 гады, у 3,5 месяца паставілі дысплазію тазасцегнавых суставаў, было нашэнне падушкі фрэйка, кансерватыўнае лячэнне. У выніку паставілі рэшткавую дысплазію. Што рабіць далей?

Неабходна назірацца ў артапеда раз на год. Дысплазія можа застацца неістотнай, але можа і павялічыцца, тады спатрэбіцца аператыўнае ўмяшанне.

Дачцэ 6 гадоў, розніца даўжыні ног да 1 см, як следства – S-падобны скаліёз I, II ст. Ці ёсць у краіне рэабілітацыйныя цэнтры, у якіх займаюцца з дзецьмі са скаліёзам? Хто і дзе зможа па здымку разлічыць неабходную нагрузку на групы мышцаў для далейшых заняткаў з інструктарам ЛФК?

З-за розніцы ў 1 см развіцця S-падобнага скаліёзу II ступені не будзе. Трэба знайсці рэальную прычыну скаліёзу. Рэкамендую звярнуцца ў РНПЦ траўматалогіі і артапедыі, дзе працуе вядучы навуковы супрацоўнік Дзмітрый Цесакоў, які займаецца скаліёзам на працягу многіх гадоў. Па здымку неабходную нагрузку на групу мышцаў не разлічваюць. Гэта робяць пасля ацэнкі стану пацыента.

Сыну 14 гадоў, займаецца хакеем. Часам пасля трэніровак (бег, скачкі) баляць пяткі, не можа наступіць. У чым прычына? Ці можа гэта быць плоскаступнёвасць альбо стрэсавы пералом?

Гэта не стрэсавы пералом. А вось плоскаступнёвасць выклікаць боль у пятках можа. Яшчэ адна прычына – перагрузкі па зонах росту. У 14 гадоў зона росту пятачнай косці яшчэ не зачыненая, і залішняя нагрузка можа правакаваць боль. У такім выпадку неабходна будзе яе паменшыць. На рэнтгенаграме незачыненне зоны росту можа выглядаць як шчыліна, пералом. Але гэта не пералом. Рэкамендую звярнуцца да траўматолага.

Фота Таццяна Сталярова і з адкрытых інтэрнэт-крыніц.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 46

Журналіст і медыятар. У журналістыцы каля 20 гадоў. Асноўная цікавасць – сацыяльныя праблемы. Скончыла журфак БДУ. Да партала «Здаровыя людзі» і газеты «Медыцынскі веснік» працавала ў рэдакцыі «Аргументы і факты» ў Беларусі, штотыднёвіках «СССР: постфактум», «Маскоўскі камсамолец ў Беларусі», нацыянальнай грамадска-асветніцкай газеце «Культура», інтэрнэт-выданні Оpen.by. Сябра Беларускай асацыяцыі журналістаў. Матэрыялы Ганны выдзяляюцца выразнай структурай, глыбінёй раскрыцця тэмы і сваёй аналітычнасцю. Хобі: літаратура, напісанне дзіцячых кніг. Аўтар праектаў: ТэДДзі (Трыбуна для дзяцей) – нацыянальная пляцоўка для выказвання меркаванняў і пазіцый дзяцей па хвалюючых праблемах (сумесны праект штотыднёвіка «Аргументы і факты» ў Беларусі, РГА «Беларуская Асацыяцыя клубаў ЮНЕСКА», Прадстаўніцтва Дзіцячага фонду ААН у Рэспубліцы Беларусь (ЮНІСЕФ) . «Урачы – таксама людзі» (24health.by), «Хатні догляд цяжкахворых» (сумесна з Беларускім таварыствам Чырвонага Крыжа) (24health.by), «Урачэбныя анлайн-канферэнцыі» (24health.by сумесна з tut.by).