04.06.2021
04.06.2021

Піфагор, дапамажы! :) Паляпшаем… памяць

logo
Навiны
0 050
Памер шрыфта:
  • A
  • A
  • A

Такое можа напаткаць у любым узросце. Спачатку не атрымліваецца прыгадаць прозвішча суседа па лецішчы… Затым – назву любімай кнігі… Надоўга задумваемся, перш чым у памяці ўсплыве назоў элементарнага, здаецца, прадмета… «Гэта склероз?!» – пужаемся мы. Ды ў большасці выпадкаў – проста памяць трэба трэніраваць. І дапаможа нам у гэтым… Піфагор!

Памяць. Пры чым тут Піфагор.

Так, той самы старажытнагрэчаскі філосаф і матэматык, які жыў каля 570-490 гадоў да н.э. Ці была гэтая методыка сапраўды прыдуманая ім, нам цяпер ужо не даведацца. Затое можна скарыстацца ёю і, па меркаванні тых, хто праверыў, добра палепшыць сваю памяць. А гэта, у сваю чаргу, палепшыць і якасць жыцця.

І нічога складанага (на першы погляд)! Ніякіх тэарэмаў! 🙂 Проста перад сном трэба прыгадаць усё, што адбылося з вамі за дзень, што вы рабілі – з падрабязнасцямі і па парадку, не пераскокваючы.

Пачынаем з самага пачатку. У колькі вы прачнуліся, па званку будзільніка з мабільнага альбо самі, зараней? Што адразу ўбачылі? Пра што падумалі? З якой нагі ўсталі – з правай ці левай? А можа, апусцілі на падлогу адразу абедзьве? Ці, яшчэ лежачы ў ложку, пачалі выконваць спецыяльны комплекс ранішняй гімнастыкі?

Памяць. Прыгадваем свой дзень да драбніц.

І так прыгадваем цэлы свой дзень. Калі на пачатку думкі ўсё ж будуць скакаць – не злуйцеся і не кідайце прыгадваць, што і як вы рабілі. Напачатку так бывае ва ўсіх. А паляпшэнне нам абяцаюць ужо на трэці дзень. І ведаеце, чаму? Таксама ніякіх сакрэтаў няма.

Проста калі вы будзеце памятаць пра тое, што ўвечары трэба будзе ўсё-ўсё прыгадаць… Вы мімаволі будзеце старацца зафіксаваць кожны момант у памяці. А гэта, уласна кажучы, і вырашае праблемы з запамінаннем. Сапраўды, усё геніяльнае – проста.

Увогуле-то, кажуць, што Піфагор і яго вучні прымянялі гэтую методыку раніцай. Але дзе ж у нас знойдзецца час яшчэ і на гэта?! Таму ўвечары – самае тое! І нават рэкамендуецца. Бо – вы здзівіцеся! – дапамагае, апроч іншага, заснуць. Паколькі такое прыгадванне адносіцца да цяжкай працы мозгу.

Памяць. Прыгадваць дзень дапамагае пры бяссонніцы.

Так што больш не трэба аднастайна лічыць авечак! А тут жа яшчэ і бонусам – добры настрой, калі штосьці ўдзень вас натхніла, уразіла, парадавала. Можна яшчэ раз перажыць прыемныя хвіліны. А калі было штосьці непрыемнае… Вы ўспомніце пра яго – і адпусціце… Каб больш не прыгадваць.

Калі такая трэніроўка ўвойдзе ў штодзённую практыку, нам абяцаюць лепшае запамінанне нумароў тэлефонаў, датаў, прозвішчаў, спісаў прадуктаў, якія трэба набыць у краме, і г.д. Плюс перад вамі паўстане малюнак дня і тыя справы ці заняткі, без якіх цалкам можна было б абысціся і тым самым зэканоміць каштоўны час для чагосьці больш патрэбнага.

Гэта ўсё роўна як запісваць усе справы ў штодзённік, а затым іх аналізаваць. Толькі лепей. Бо памяць жа трэніруецца!

А ў каго хапае часу з раніцы, можаце паспрабаваць патрэніраваць памяць і ўранні. А затым параўнаць, калі больш зручна і вынікова атрымліваецца.

Памяць. Трэніруем раніцай ці ўвечары.

Ну, і самае галоўнае. Памяць можна (і трэба!) трэніраваць у любым узросце. Таму методыка Піфагора падыходзіць абсалютна для ўсіх. І, я ўпэўненая, у многіх з вас, шаноўныя сябры, ёсць і іншыя методыкі ды прыёмы для запамінання, спосабы трэніроўкі памяці.

Гэта вельмі важна – не запускаць працэс. Як толькі злавілі сябе на думцы, што не можаце хутка ўспомніць тое і тое, дык адразу ж – наперад! Памяць трэніраваць. І не варта адразу ж кідацца ў медыкаментознае лячэнне. Усё ж лішняя хімія ў арганізме ў выглядзе таблетак можа і пачакаць. Ці яшчэ доўга не спатрэбіцца. Альбо не спатрэбіцца ўвогуле.

Я ўчора паспрабавала прымяніць методыку Піфагора. І – так. Незаўважна заснула недзе на пералічэнні спраў у раёне абеду. 🙂 Ну, хоць такая карысць. А працягваць, вядома ж, буду. Бо сапраўды, часцяком не магу прыгадаць прозвішча кагосьці, хаця, здаецца, круціцца на языку. І нават памятаю, колькі літар у прозвішчы…

Памяць. Калі забываюцца прозвішчы.

Тады пачынаю перабіраць алфавіт. Падалася пачатковая літара знаёмай?! Далей падстаўляю па парадку другую. І ў абсалютнай большасці выпадкаў сапраўды ўспамінаю. Але ж часу займае…

Так што давайце скарыстоўвацца парадамі Піфагора! Поспехаў усім! 🙂

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 50

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.