10 Снежня
10.12.2018

Чорная котка… з пустым вядром

logo
Думкі ўслых
18 0 38
Памер шрыфта:
  • A
  • A
  • A

Што зробіць большасць (ну добра-добра, не большасць, а частка) з нас, калі ўбачыць, што дарогу хуценька так (каб не спынілі!!!) перабягае чорная котка?! А калі насустрач ідзе жанчына з пустым вядром?! Альбо пачакаем, альбо зробім пэўныя рытуальныя дзеянні, альбо хаця б падумаем аб прымхах… Ці не так?!

Можна тыя прымхі-прыкметы прымаць ці не прымаць, лічыць супадзеннямі… І нават ставіцца да іх з гумарам. Бо невыпадкова ў сеціве з’явілася такое: «А што рабіць, калі сустрэнеш чорную котку з пустым вядром?!» Уявілі?! Я таксама! І ўсміхнулася… А значыць, усё не так ужо і безнадзейна.

Вось як вы ставіцеся, сябры,напрыклад, да пятніцы, 13-га?! Не-не ды і ёкне штосьці ўнутры пры думцы пра такое супадзенне, праўда?! Нават калі зусім, ну вось цалкам – рэаліст ды матэрыяліст… А яшчэ ж калі што і насамрэч здарыцца… Вось і тлумачэнне гатовае. Ад якога хаця б крыху, але лягчэй.

Зразумела ж, я таксама – не выключэнне. Але вось ужо больш за 15 гадоў, наадварот, думаю: «Якое шчаслівае гэтае супадзенне для мяне…» І сапраўды, цяпер звычайна нават здараецца штосьці прыемнае ў пятніцу, 13-га. А памяняліся адносіны на пачатку 2000-х – пасля шчырай гутаркі з народным паэтам Беларусі Рыгорам Барадуліным. Светлая яму памяць…

Тады я яшчэ працавала ў чэрвеньскай  школе выкладчыцай беларускай мовы і літаратуры. І адначасова была няштатным аўтарам нашай мясцовай «раёнкі». Калі мне прапанавалі ўзяць інтэрв’ю ў слыннага паэта, які прыязджае да нас у Чэрвень, я, вядома ж, вельмі ўзрадавалася. Бо яго вершы сапраўды адны з самых любімых.

Да інтэрв’ю давялося рыхтавацца, шукаючы публікацыі пра Рыгора Барадуліна ў бібліятэцы. Там, апрача іншага, знайшла ўзгадкі пра яго хатняга гадаванца – ката Мірона, чорнага колеру, але з белымі лапкамі і манішкай. А сустрэча наша адбылася… Ну, так! У пятніцу, 13-га.

… Калі папыталася ў паэта, як ён ставіцца да такога супадзення, дык мой суразмоўца адказаў, што няма такога ліку – «13», а ёсць «1+3=4». А чацвёрка для яго сімвалізуе трываласць, грунтоўнасць, спакой. Што датычыцца ката Мірона, дык белы колер у яго поўсці, па меркаванні гаспадара, пераважвае чорны. Не па колькасці, а па якасці…

І так гэтае тлумачэнне лягло мне на душу, што з таго часу і я перастала баяцца пятніцы, 13-га. Ужо амаль пяць гадоў прайшло, як Рыгора Барадуліна няма з намі, а ў мяне да гэтага часу перад вачыма тая сустрэча… І нават голас яго, здаецца, чую…

Думаю, кожны здольны сам знайсці тлумачэнні прымхам і прыкметам, якія, можа, будуць зусім не містычнымі, але дапамогуць захаваць душэўную раўнавагу. Ці пачуць іх ад іншых і гэтак жа пранікнуцца.

І ўсё ў нас будзе добра! І чорная котка з пустым вядром памахае пры сустрэчы вольнай лапкай і пажадае: «Выдатнага дня!» А ў пятніцу, 13-га, адбудзецца штосьці надзвычай прыемнае. І гэтае супадзенне станецца самым шчаслівым!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

18 0 38

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.