19 Красавіка
19.04.2019

Дапаможам паправіцца... жабе сваёй?!:)

logo
Думкі ўслых
4 0 14
Памер шрыфта:
  • A
  • A
  • A

«Жаба душыць (давіць)... Белая і пушыстая...» Колькі разоў мы чулі, а то і ўжывалі такі выраз?! Маючы на ўвазе абсалютна рознае. Хтосьці так казаў пра ўласную сквапнасць, нежаданне аддаваць шмат грошай за штосьці нават пры іх наяўнасці... Іншыя ж – пра зайздрасць, якую часцяком падзяляюць на белую і чорную.

А вам даводзілася станавіцца аб’ектам зайздрасці?! Непрыемнае, скажу я вам, адчуванне. Асабліва калі ўзнікае ў кагосьці без дай прычыны. А ты доўгі час нават не здагадваешся, чаму да цябе змяніліся адносіны.

І мэту ж якую маюць людзі! Каб таму, каму пазайздросціў, дрэнна зрабілася... Так і хочацца працытаваць фразу з вядомага фільма: «Высокія, высокія адносіны!» Хаця на справе дрэнна якраз робіцца таму, хто не можа задушыць у сабе жабу зайздрасці, а корміць яе, корміць...

У такім выпадку прыходзяць на розум і іншыя выразы. Напрыклад, гэты, які прыпісваюць сусветна вядомаму скрыпачу Паганіні: «Здольным зайздросцяць, таленавітым шкодзяць, а геніяльным помсцяць». І каму, як не яму, пра гэта ведаць пэўна?!

Адкуль жа ўвогуле тая жаба з’яўляецца? Чаму менавіта яна душыць ці давіць чалавека? Паводле меркаванняў адных, даўней стэнакардыю называлі «грудной жабай». І калі насамрэч надыходзіў прыступ, прыхоплівала сэрца, адчуваўся недахоп паветра, многія апісвалі свой стан так: «Жаба давіць». І тагачасныя лекары разумелі, пра што ідзе размова. Той, хто адчуваў чорную зайздрасць, думаю, ведае, што сімптомы падобныя?!

А паводле меркаванняў іншых, жабы здаўна былі патрэбныя варажэям, калдунам, ведзьмам. Так, для злых спраў. І ў зеллі, на якое рабілі злую замову, адно з цэнтральных месцаў займалі лапкі жабы ці самі высахлыя істоты... Бр-р-р-р-р-рр! Было ж такое... А можа, і яшчэ дзесьці пануе?! Свят-свят-свят!

Цікава, чаму зусім нямногія ўмеюць радавацца тваёй радасці, прычым сапраўды шчыра і адкрыта, ад усяго сэрца? Чаму нам лепей паспачуваць чалавеку, чым парадавацца за яго і з ім?! Альбо зрабіць выгляд, што ніякага дасягнення няма... Можа, таму, што ў кожнага з нас дзесьці ўнутры сядзіць тая жабка... То зялёная, то чорная, а то і насамрэч белая і пушыстая. І толькі чакае свайго часу, свайго выхаду на сцэну?! Каб квакнуць ужо дык квакнуць!

Існуе меркаванне, што падзел зайздрасці на белую і чорную ўбачыў яшчэ Арыстоцель. Тут, як кажуць, асаблівых тлумачэнняў не трэба, праўда?! Калі кажуць: «Зайздрошчу табе белай зайздрасцю», быццам бы нічога благога для таго, на каго накіравана сказанае, і няма. А для таго, хто адчувае белую зайздрасць, яна часцяком з’яўляецца кіраўніцтвам да дзеяння, падставай для руху наперад. Больш за тое! Існуе меркаванне, што зайздрасць у кожным закладзена ад прыроды. А вось яе актыўнасць і колер ужо залежаць ад нас.

Ну і, вядома ж, наўрад ці сам зайздроснік дужа рады свайму пачуццю. Проста не ўсе ўмеюць, вобразна кажучы, адчуць і задушыць актыўнасць уласнай жабы. І вось ужо хтосьці ў дэпрэсіі, і здароўе пагаршаецца. І хутка зайздросніка пачынае шкадаваць нават той, каму ён зайздросціць. Такі вось парадокс!

Дык можа лепей не параўноўваць сябе з некім, а радавацца найперш сваім удачам і дасягненням, няхай самым маленькім?! Не рабіць камусьці «западлянку», бо закон бумерангу яшчэ ніхто не адмяняў (усё вернецца назад), а паспрабаваць ацаніць чалавека вышэй, чым прывыклі дагэтуль?! Пераступіць праз сябе – так цяжка, але як дзейсна!

Памятаеце анекдот, чаму жаба зялёная?! Насамрэч-то яна белая і пушыстая, проста хварэе... Дык давайце дапаможам ёй паправіцца!:)

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

4 0 14

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.