28.05.2017
28.05.2017

Дрэс-код: вымушаная неабходнасць ці адметная асаблівасць?

logo
Прыгажосць і догляд
0 629
Памер шрыфта:
  • A
  • A
  • A

Сёння паняцце «дрэс-код» усё больш на слыху, і кожная сур’ёзная кампанія лічыць сваім абавязкам прымусіць супрацоўнікаў выконваць яго строгія правілы.

Дык што ж такое дрэс-код? Па сутнасці, гэта паняцце ўключае ў сябе як пэўную форму адзення, так і правілы, прынцыпы яе нашэння, што неабходна выконваць пры наведванні розных устаноў, мерапрыемстваў ці падзей. У перакладзе з англійскай мовы дрэс-код абазначае «кодэкс адзення», што само па сабе дапускае сувязь гэтага паняцця не толькі з працай. Свае палажэнні пра дрэс-код могуць мець людзі рознага роду заняткаў, нацыянальнасці, рэлігіі.понятие дресс-кода

Варта адрозніваць паняцці дрэс-кода і ўніформы. Галоўнае адрозненне ў тым, што ўніформа прадугледжвае нашэнне аднолькавага, уніфікаванага адзення, а дрэс-код – неабходнасць захавання пэўных правілаў у нашэнні вопраткі.

Кожная кампанія імкнецца распрацаваць свае правілы дрэс-кода, што адказваюць яе патрэбам, ўражанню, якое яна хоча зрабіць на патэнцыйных пакупнікоў альбо партнёраў.

Трэба адзначыць: у нашай свядомасці сфарміраваўся шаблон таго, што дзелавы дрэс-код – гэта афіцыйны, строгі стыль адзення, па сутнасці, такім не з'яўляецца. Так, напрыклад, касметычная фірма М.А.С. дазваляе сваім супрацоўнікам насіць абсалютна любую вопратку, у тым ліку вельмі крэатыўную. Але патрабуе ад іх, каб яна абавязкова была чорнага колеру!

Навошта прытрымлівацца дрэс-кода на працоўным месцы?

Мы можам шмат і ўпарта гаварыць пра віды дрэс-кода, пра дапушчальнасць асобных элементаў гардэроба, але нават не здагадвацца пры гэтым, што дрэс-код, як і нашэнне ўніформы, мае пад сабой псіхалагічную падаплёку. 

Псіхалагічны аспект увядзення дрэс-кода

  • Кожная фірма, кожная праца мае вострую патрэбу ў тым, каб вакол стваралі пэўны арэол, што вылучае яе з мноства іншых і прыцягвае да яе спажыўцоў.
  • Гэтак жа і супрацоўнік фірмы ці прадпрыемства хоча адчуваць сябе прыналежным да яе, што дапамагае ў тым ліку вылучыцца сярод іншых людзей. А гэта, у сваю чаргу, спрыяе аб'яднанню і згуртаванню калектыву. Заўважана, што на тых фірмах, дзе прыняты дрэс-код, значна зніжаецца адток кадраў.
  • Акрамя таго, наяўнасць дрэс-кода спрыяе больш хуткай адаптацыі новых супрацоўнікаў, бо навічка будуць успрымаць як свайго, і ён не будзе вылучацца з натоўпу, адчуваць няёмкасць.
  • А кіраўнік кампаніі, які патрабуе захавання дрэс-кода, без сумненняў, зверне ўвагу на тое, як Вы апранутыя на сумоўі і ці гатовыя прыняць правілы карпаратыўнай культуры. Гэта і тэст на гнуткасць, здольнасць падстройвацца пад абставіны, і патрабаванне захавання наяўных правілаў. Таму вельмі важна правільна падбіраць гардэроб, ідучы на сумоўе. І загадзя вызначыцца для сябе, ці гатовыя Вы да штодзённага нашэння дзелавога касцюма ці выканання іншых правілаў офіснага дрэс-кода, прынятых у арганізацыі.

Варта адзначыць, што дрэс-код з'яўляецца неад'емнай часткай стварэння працоўнай атмасферы ў калектыве.

Пэўны, някідкі знешні выгляд не будзе адцягваць супрацоўнікаў ад працы, а кліентаў – ад мэты іх наведвання.

Як дрэс-код уплывае на ўспрыманне супрацоўнікаў кампаніі?

Дзелавы стыль адзення робіць Вас у вачах кліентаў больш адказным, надзейным прафесіяналам, якому можна даверыцца.

Уявіце на хвілінку, што Вы прыйшлі ў паліклініку, і замест урача ў белым халаце ўбачылі мужчыну ў ірваных джынсах і расцягнутай футболцы. Ці адчуеце Вы давер да такога прафесіянала? Хутчэй за ўсё не. Бо той жа белы халат дорыць адчуванне чысціні, надзеі на дапамогу і давер.

Альбо, да прыкладу, афіцыянт у рэстаране. Калі б ён быў апрануты, як большасць наведвальнікаў, мы, па-першае, з цяжкасцю змаглі б вызначыцца, да каго можам звярнуцца па дапамогу, а па-другое – верагодна патрапілі б у няёмкую сітуацыю, прыняўшы за афіцыянта такога ж наведвальніка.

Карпаратыўны стыль – гэта момант найвялікшага даверу да кампаніі.

Як хутка адключыцца ад працы, калі прыйшлі дамоў? Проста здыміце пінжак!

Яшчэ адзін важны нюанс наяўнасці спецыяльнага працоўнага адзення: зняўшы яго, Вы зможаце псіхалагічна адключыцца ад працоўных заняткаў, пакінуўшы іх да наступнага дня. Вы як бы даеце сабе знак, што ўсё, можна расслабіцца і адпачыць, заняцца асабістымі справамі, сям'ёй. Гэта неверагодна настройвае на адпачынак, так неабходны для прадуктыўнай працы.

Такім чынам, галоўная функцыя дзелавога дрэс-кода – паказаць Вас з лепшага боку, як адказнага, акуратнага, уважлівага супрацоўніка. 

Віды офіснага дрэс-кода

Звычайна вылучаюць два асноўныя віды офіснага дрэс-кода: жаночы і мужчынскі.

Правілы класічнага жаночага дрэс-кода

  • Галоўная ўмова захавання жаночага дрэс-кода – някідкае, неэкстравагантнае, няяркае адзенне. Ні ў якім разе нельга насіць у офісах са строгім дрэс-кодам празрыстыя блузы, глыбокае дэкальтэ, шлёпанцы, спартыўныя касцюмы, міні-спадніцы і кароткія топы, штаны з нізкай таліяй.
  • Аптымальныя колеры адзення для офіса – класічныя чорны і белы, а таксама шэры, бэжавы, цёмны сіні і зялёны.
  • Пры выбары абутку перавагу варта аддаць закрытым туфлям на невысокіх абцасах. Ні ў якім разе недапушчальная высокая платформа і занадта высокія шпількі.
  • Не забывайцеся на тое, што панчохі – важны атрыбут офіснага стылю. Нават у спякотнае надвор'е! Прычым яны павінны быць класічныя, аднатонныя, без малюнкаў.
  • Штаны, што гладка прыстаюць ці наадварот вельмі шырокія, таксама не лічацца дапушчальнымі.
  • Ідэальны варыянт для класічнага працоўнага дрэс-кода – касцюм са штанамі ці спадніцай. Прычым у другім варыянце спадніца павінна быць да сярэдзіны калена.
  • Асцярожнымі трэба быць таксама з біжутэрыяй. Недапушчальнае выкарыстанне кідкіх, масіўных упрыгажэнняў.

Правілы мужчынскага дрэс-кода

  • Мужчынскі дрэс-код прадугледжвае нашэнне касцюма. І гэта бадай усё, што мужчыны могуць сабе дазволіць. Тут дапушчальныя толькі варыяцыі з тканінай і колерам адпаведным сезону.
  • Безумоўна, залішняе нагадваць, што кашуля павінна быць дбайна папрасаванай і мець прэзентабельны выгляд.
  • Што тычыцца гальштука, ён павінен быць цямнейшым за кашулю і на 2 сантыметры прыкрываць рэмень штаноў.
  • Недапушчальна апранаць у офіс кароткія штаны, шорты, белыя шкарпэткі, сандалі.
  • Згодна з правіламі дрэс-кода, адзінымі аксэсуарамі, што можа сабе дазволіць мужчына, які працуе ў офісе, з'яўляюцца запінкі, гадзінік, заручальны пярсцёнак і шпілька для гальштука.
  • У выбары дзелавога адзення ёсць такая хітрасць: калі Вы хочаце, каб кіраўнік Вам давяраў, станьце падобным да яго. Калі хочаце прасунуцца па кар'ернай лесвіцы, скапіруйце некаторыя элементы гардэроба Вашага начальніка. Не забывайцеся на тое, што людзі схільныя давяраць падобным да іх людзям.
  • Акрамя таго, не варта забывацца на кошт. Ёсць такое негалоснае правіла – кошт Вашага ўбрання павінен складаць палову Вашай зарплаты. Таму ні ў якім разе не апранайцеся больш дорага, чым начальнік, калі хочаце атрымаць павышэнне. А калі доўгачаканае павышэнне ўжо атрымалі, варта апранацца больш дорага, чым падначаленыя.

А калі Вы з'яўляецеся новым супрацоўнікам і з Вамі не падзяліліся нюансамі дрэс-кода на новым працоўным месцы, проста прыгледзьцеся да тых, хто побач. Калі яны апранаюцца строга, аддаючы перавагу класіцы, то і Вам варта апранацца ў офісе падобным чынам. А ў першы працоўны дзень, каб не парушыць правілы дрэс-кода, лепш за ўсё апрануцца сціпла, строга і з густам.

Як на нас уплывае ўніформа?

Хочам мы гэтага ці не, але ўніформа ці спецвопратка ўплываюць на нас з-за пэўных стэрэатыпаў. Прычым гэты ўплыў адчуваецца як у той момант, калі яна надзета на Вас, так і тады, калі Вы бачыце чалавека ва ўніформе.

І тут няма адрозненняў паміж карпаратыўным адзеннем буйной фірмы альбо белым медыцынскім халатам. Такая форма прымушае нас паводзіць сябе пэўным чынам.

І калі на працоўным месцы Вам даводзіцца насіць уніформу, і Вам здаецца, што яна робіць Вас безаблічным, такім, як усе, задумайцеся на хвілінку, як Вы змяняецеся ў той момант, калі апранаеце ўніформу.

У 2012 годзе ў Паўночна-Заходнім універсітэце правялі такі эксперымент. Удзельнікам выдалі белыя халаты, абсалютна аднолькавыя, і даручылі выкананне аднолькавага задання. Але перад пачаткам людзей падзялілі на 2 групы: першай сказалі, што гэта медыцынская спецвопратка, а другой – што гэта працоўнае адзенне мастака. Атрыманыя вынікі сведчылі пра тое, што першая група, падышла да выканання задання больш адказна і больш уважліва.

А вось яшчэ адзін прыклад. Як паказалі вынікі даследавання Frank і Gilovich, накіраванага на вывучэнне ўніформы каманд Нацыянальнай футбольнай лігі і Нацыянальнай хакейнай лігі, каманды, апранутыя ў чорную ўніформу, былі лідарамі па колькасці атрыманых штрафных удараў. Прычым тыя каманды, якія носяць форму іншых колераў, але, у якасці эксперыменту, апранулі чорную вопратку, таксама сталі атрымліваць больш штрафных. На думку даследчыкаў гэта звязана з тым, што гульцы ў чорнай форме, пачынаюць успрымаць самі сябе больш агрэсіўна. Прычым за адзін раз суддзі пачынаюць іх ўспрымаць гэтак жа! І ў выніку – большая колькасць пенальці.

Асобнай увагі заслугоўвае школьны дрэс-код, які трэба выконваць у нашай краіне. Адным з пунктаў за ўвядзенне школьнай формы з'яўляецца меркаванне пра тое, што яна здольная змяніць самаацэнку вучня і спрыяльна паўплываць на яго паводзіны. Яшчэ ў 1998 годзе Brunsma і Rockquemore правялі даследаванне з нагоды ўплыву школьнай формы на паводзіны школьнікаў старэйшых класаў. Вынікі іх даследавання не выявілі ніякай сувязі паміж нашэннем школьнай формы і паводзінамі, паспяховасцю, а таксама ужываннем вучнямі наркотыкаў і алкаголю.

Для некаторых школьнікаў, безумоўна, школьная форма з'яўляецца сімвалам адзінства, сталення, адказнасці, дзейнічае на іх як мера дысцыпліны і кантролю, але тут важны, хутчэй, момант выхавання. Само па сабе ўвядзенне школьнай формы – занадта малая мера для ўзмацнення дысцыпліны. Тут неабходна прыкласці пэўныя намаганні як бацькам, так і школе, і, безумоўна, самому вучню.

Апранацца ў офіс трэба не так, як Вы сябе адчуваеце, а так, як вы хацелі б сябе адчуваць! Адзенне – гэта свайго роду message, які Вы пасылаеце не толькі людзям побач, але і сабе. А дрэс-код – гэта пасланне кампаніі, кліентам і партнёрам. Таму захаванне дрэс-кода патрэбна для таго, каб тыя, з кім вы ўзаемадзейнічаеце, правільна расшыфравалі Вашы пасланні.

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 629

Глядзіце таксама