9 Снежня
09.12.2018

Душэўнай цеплыні...

logo
Думкі ўслых
100 0 36
Памер шрыфта:
  • A
  • A
  • A

Што рабіць, калі на календары – снежаньскі выхадны, а за вокнамі – мокрадзь, туман, 100-працэнтная вільготнасць і ўвогуле немаведама што?! І на душы, як кажуць, «не лепшае надвор’е»... І на свежым паветры не пагуляеш з прыемнасцю, бо дыхаць цяжка... Ну што ж, тады ствараем настрой сабе самі!

Калі канапа ўпарта маніць да сябе, мяккае крэсла не выпускае з абдымкаў, а каробка шакаладных цукерак, здаецца, крычыць: «З’еш маё начынне цалкам!», тады трэба зрабіць усё наадварот! Уключыць прыемную музыку гучней ды паскакаць перад люстэркам! Зрабіць той комплекс практыкаванняў, які не патрабуе вялікіх намаганняў, але бадзёрыць.

Прайсціся з пыласосам у вальсе... Змахнуць з паліцаў пыл, напяваючы і робячы выпады... Паспрабаваць жангліраваць чымсьці...м-м-м... ну, тым, што не паб’ецца... Лоўкасць рук – ажно самой прыемна! У высокіх падскоках змахнуць павуцінне, прымусіўшы павучка таксама праявіць актыўнасць, каб знайсці сабе іншы прытулак.

І вось ужо сонны стан некуды падзеўся. І такая ахвота дацягнуцца да гор, каб іх звярнуць! Ну і няхай  за вокнамі туман і мокрадзь... А ў нас – бадзёрасць, рух і дзеянне! Зрэшты, пасля гэткай актыўнасці ўжо можна дазволіць сабе і цукерку-другую. Але не ўсю каробку, вядома ж! І кубачак кавы зварыць. Альбо любімай гарбаты – напрыклад, са святаянніка і мяты. Ну прыемна ж, праўда?! І смачна... А водар які!!!

А тады сярод шматлікіх хатніх спраў (я зараз больш да жанчын) знайсці час на прагляд любімага фільма. Пасумаваць і парадавацца разам з яго героямі і адчуць душэўны камфорт. Я звычайна ўжо дзесьці з сярэдзіны снежня пачынаю пераглядаць свой топ-10 навагодніх фільмаў. Не спяшаючыся... З радасцю і прыемнасцю. І настрой уздымае, і якіясьці цікавыя моманты ўсплываюць у памяці з уласнага жыцця.

І – так, «Іронія лёсу», вядома ж, сярод іх. Як па мне, дык вечны фільм. А яшчэ штораз адкрываеш для сябе ў ім штосьці новае. Здаецца, гэта з вобласці фантастыкі... Ну як такое можа быць, калі за апошнія дзесяцігоддзі фільм перагледжаны, як кажуць, упоперак і ўдоўжкі, расцягнуты на цытаты?! Невытлумачальна, але дзівосы здараюцца... І так цёпла робіцца на душы...

Дагэтуль памятаю, як у дзяцінстве і юнацтве мы чакалі праграмы тэлебачання (!!!) на навагоднія святы, каб паглядзець, па якому каналу будуць паказваць гэты самы навагодні фільм у той час, калі нам зручна. Чамусьці менавіта 31-га снежня «Іронію лёсу» трэба было паглядзець абавязкова! А без гэтага, здаецца, і Новы год – не свята. Як без ёлкі, мандарынаў, шампанскага і «Аліўе»... А ў вас была ці, можа, і ёсць такая традыцыя, сябры?!

Словам, сёння – не сумуем! Нават калі няма сонейка, якое традыцыйна стварае ўзімку вясёлы настрой адной сваёй прысутнасцю на небе. Давайце зробім штосьці добрае і прыемнае для саміх сябе, сямейнікаў, сяброў і знаёмых! Я шчыра зычу ўсім душэўнай цеплыні – сёння і штодня!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

100 0 36

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.