20 Ліпеня
20.07.2018

Дыхайце – не дыхайце. Спецыялісты пра чысціню паветра і паверхневых вод у Беларусі

logo
Навiны
98 0 43
Памер шрыфта:
  • A
  • A
  • A

Пра стан паверхневых вод у адкрытых крыніцах Беларусі і праблемных раёнах, дзе паветра не такое чыстае і празрыстае, як хацелася б, распавяла на прэс-канферэнцыі начальнік службы экалагічнай інфармацыі Рэспубліканскага цэнтра па гідраметэаралогіі, кантролі радыёактыўнага забруджвання і маніторынгу навакольнага асяроддзя Алена Багадзяж.

Па дадзеных шматгадовых назіранняў спецыялістаў, вызначаны пералік водных паверхняў, якія маюць найбольшую антрапагенную нагрузку (уплыў, выкліканы дзейнасцю чалавека). Сюды ўвайшлі рэкі Свіслач ніжэй Мінска, Уша ніжэй Маладзечна, Ясельда, Морач, Пліса ніжэй Жодзіна, Уза ніжэй Гомеля і некалькі азёр, якія прымаюць падземныя воды.

Аднак, у першым паўгоддзі 2018 года на стан паверхневых вод аказвалі ўплыў не толькі антрапагенныя, але і прыродныя фактары. Напрыклад, сёлета назіралася даволі моцная паводка, якая стала прычынай дэфіцыту кіслароду ў большасці рэк і азёр. Мінімальная яго канцэнтрацыя была адзначана ў рацэ Бярэзіна.

Перавысіла дапушчальныя ўзроўні канцэнтрацыя фасфату амонія ў рацэ Пліса ніжэй Жодзіна (у 8,7 ГДК – гранічна дапушчальная канцэнтрацыя), па нафтапрадуктах у вадасховішчы Волма і ў рацэ Свіслач у межах Мінска (да 3 ГДК). Гэта таксама стала вынікам паводкі, калі вада, вяртаючыся ў рэчышча рэк, змывала з зямлі эндагенныя рэчывы.

– У цэлым такая сітуацыя назіраецца кожны год, – запэўніла Алена Багадзяж. – Паказчыкі адпавядаюць сярэднім шматгадовым. А калі параўноўваць стан паверхневых вод цяпер і, скажам, гадоў 30 таму, зараз паказчыкі значна больш аптымістычныя.

Што тычыцца атмасфернага паветра, назіранні за яго станам праводзяцца ў 19 прамысловых цэнтрах краіны і ахопліваюць 80% насельніцтва, якое пражывае ў буйных і сярэдніх гарадах Беларусі. Маніторынг вядзецца па асноўных забруджвальных рэчывах (напрыклад, пылу і зместу цвёрдых часціц), а таксама спецыфічных, такіх як фармальдэгід, фенол, якія аказваюць істотны ўплыў на здароўе людзей.

Па словах Алены Багадзяж, з году ў год нестабільнае экалагічнае становішча адзначаецца ў асобных раёнах Гомеля, Мінска, Магілёва, Жлобіна.

У першым паўгоддзі 2018 года ў раёне Уручча горада Мінска на працягу 8 дзён запар рэгістравалася перавышэнне ГДК у паветры па дыаксідзе азоту. Вышэй за дапушчальныя канцэнтрацыі адзначана яго ўтрыманне ў Магілёве. У паветры Наваполацка фіксавалі перавышэнні ГДК і па дыаксідзе азоту, і па сера-дыаксідзе.

З-за дэфіцыту ападкаў у красавіку-маі канцэнтрацыя цвёрдых часціц і пылу ў паветры часта перавышала дапушчальныя нормы. Так, у Мінску ў раёне Уручча адзначаны перавышэнні ў 4,7 разоў, у Гомелі і Жодзіна – у 2,5 разы (прычым, павышаная канцэнтрацыя пылу фіксавалася ў гэтых гарадах на працягу 44 і 10 дзён адпаведна). Неспрыяльная экалагічная абстаноўка адзначалася ў Полацку і Наваполацку.

А вось узровень забруджвання паветра спецыфічнымі рэчывамі, паводле слоў спецыяліста, захоўваўся досыць нізкім. Нязначныя перавышэнні ў 1,3-1,4 разы па канцэнтрацыі фенолу адзначаны ў Наваполацку і Барысаве. Да 1,8 раз вышэй нормаў была канцэнтрацыя фармальдэгіду ў Віцебску, Наваполацку, Гродне, Жлобіне і Светлагорску. Змест аміяку ў паветры Гомеля фіксаваўся з перавышэннем у 2,3 ГДК, у Брэсце – у 3,4 ГДК, у Магілёве – у 1,2 ГДК.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

98 0 43

Журналіст. Вышэйшая адукацыя. Сябра Беларускага саюза журналістаў. Стаж працы ў прафесіі – 20 гадоў. Беларуска. Нарадзілася ў г.Ганцавічы Брэсцкай вобласці. У 2001 годзе скончыла факультэт журналістыкі Беларускага дзяржаўнага ўніверсітэта па спецыяльнасці «Журналістыка». Працавала спецыяльным карэспандэнтам аддзела эканомікі газеты «Беларуская ніва», аглядальнікам аддзела пісьмаў, аглядальнікам аддзела сацыяльных праблемаў газеты «Савецкая Беларусь» (зараз – «Выдавецкі дом «Беларусь сёння»). З 2016 года – карэспандэнт уласны аддзела інтэрнэт-праектаў РУП «Рэдакцыя газеты «Медыцынскі веснік». З 2000 года з'яўляецца сябрам Беларускага саюза журналістаў (БСЖ). У 2002 годзе стала лаўрэатам прэміі БСЖ за лепшую журналісцкую працу. У 2017 годзе – лаўрэатам прэміі БСЖ «Залатое пяро».