16.07.2020
16.07.2020

Дзе выхад, там і дзверы. ЗША абвясцілі пра выхад з саставу краінаў-удзельніц СААЗ

logo
Навiны
324 013
Памер шрыфта:
  • A
  • A
  • A

«Горшы кашмар» віруснай пандэміі, пра які ЗША неаднаразова папярэджвалі нацыянальную і сусветную экспертную супольнасць, падобна, вось-вось надыдзе. Дональд Трамп перайшоў ад слоў да справы і запусціў працэс вываду Злучаных Штатаў з Сусветнай арганізацыі аховы здароўя, пра што афіцыйна паведаміў Генеральнаму сакратару ААН Антоніу Гутэрышу. Гром, адгалоскі якога чуліся яшчэ ў красавіку, калі Трамп прыпыніў новае фінансаванне СААЗ, усёй моцай грымнуў у першы панядзелак ліпеня.

ЗША выходзіць з СААЗ.

Усё бы нічога, але Амерыка – лідар па колькасці інфіцыраваных і ахвяраў новага каранавіруса. Колькасць выпадкаў, што выяўляюцца, да гэтага часу расце ў геаметрычнай прагрэсіі. Напрыклад, за паўтара тыдня ліпеня колькасць інфіцыраваных павялічылася ўдвая.

Рашэнне Трампа аб выхадзе з СААЗ выклікала рэзкую крытыку як з боку дэмакратаў, так і рэспубліканцаў, а таксама яго саюзнікаў у Еўропе. Так, сенатар-дэмакрат Роберт Менендэс заявіў, што гэты крок пакіне Амерыку «хворай і адзінокай».

Старшыня камітэта Сената ЗША па ахове здароўя рэспубліканец Александэр Ламар выступіў з заявай, у якой падкрэсліў: «Вядома, неабходна старанна вывучыць памылкі, якія Сусветная арганізацыя аховы здароўя магла дапусціць у сувязі з каранавірусам, але час для гэтага – пасля крызісу, а не ў сярэдзіне».

ЗША. Каранавірус. Ліпень-2020.

А супернік Дональда Трампа на бліжэйшых прэзідэнцкіх выбарах Джо Байдэн паабяцаў выбаршчыкам: «У мой першы дзень на пасадзе прэзідэнта я далучуся да СААЗ і аднаўлю нашае лідарства на сусветнай арэне».

Дарэчы, заява Байдэна – велізарны плюс у яго карму, які забяспечыў, трэба меркаваць, істотны прырост колькасці прыхільнікаў. Бо калі Трамп давядзе пачатае да завяршэння (працэс вываду займае роўна год, пры гэтым Амерыка будзе абавязаная выканаць усе свае фінансавыя абавязацельствы за гэты перыяд), у пройгрышы амаль дакладна апынуцца не толькі Штаты. Негатыўныя наступствы адаб'юцца на ўсіх 194 краінах-удзельніцах СААЗ.

Рэха паспешлівых рашэнняў

Дык што ж пацягне за сабой выхад ЗША з саставу ўдзельнікаў Сусветнай арганізацыі аховы здароўя?

ЗША выходзіць з СААЗ. Наступствы.

Перш за ўсё, страту істотнай дозы фінансавання. ЗША – найбуйнейшы донар СААЗ і магутны гулец на полі фарміравання сусветнай палітыкі аховы здароўя, навуковых даследаванняў і распрацовак. Яго фінансавыя ўліванні (абавязковыя і добраахвотныя) перавышаюць 400 мільёнаў даляраў у год, складаючы прыкладна 15% агульнага бюджэту арганізацыі.

Ільвіная доля гэтых сродкаў выкарыстоўваецца на ліквідацыю поліяміеліту, малярыі, сухотаў, ВІЧ/СНІД, з дапамогай фінансавання праграмаў вакцынацыі.

Гучаць асцярогі, што выхад ЗША з СААЗ ставіць пад пагрозу таксама існаванне жыццёва важных праграмаў па кантролі за такімі інфекцыямі, як адзёр, ліхаманка Эбола, Зіка і іх ліквідацыю... Улічваючы, што дзейнасць СААЗ у асноўным сканцэнтраваная на экспертнай, медыцынскай і тэхнічнай дапамозе найбольш уразлівым краінам і рэгіёнам, пад удар патрапяць самыя слабыя і бедныя.

Натуральна, страта асноўнага ўдзельніка не можа не затармазіць і распрацоўку вакцынаў супраць каранавіруса, а таксама значна аслабіць намаганні па кантролі за распаўсюджваннем інфекцыі ва ўсім свеце.

ЗША выходзіць з СААЗ. Распаўсюджванне інфекцый.Парадокс у тым, што выхад з СААЗ не нясе ніякіх перавагаў і для Амерыкі, акрамя зэканомленых грошай, якія Трамп абяцае накіраваць на іншыя патрэбы і ў іншыя арганізацыі.

Разам з тым, ЗША губляе доступ да глабальных інфармацыйных базаў СААЗ па кантролі за рознымі захворваннямі. Гэта значыць, мінус магчымасць ацэньваць, аналізаваць і выкарыстоўваць інфармацыю для даследчых мэтаў, аказваць уплыў на фарміраванне сусветнай палітыкі ў галіне аховы здароўя, прымяняць свае распрацоўкі і навуковыя дасягненні ва ўсіх краінах свету.

Гэта аўтаматычны выхад з усіх сумесных узаемавыгадных праектаў, што фактычна звяжа рукі амерыканскаму навуковаму медыцынскаму таварыству і вымусіць «варыцца ва ўласным соку».

І гэта не лічачы таго, што ЗША аўтаматычна трапляюць у заканчэнне чаргі на атрыманне вакцыны ад каранавіруса – у выпадку паспяховых яе пошукаў пад эгідай СААЗ.

ЗША выходзіць з СААЗ. Апошнія ў чарзе на вакцыну.

Мы папрасілі кіраўніка краінавага офіса СААЗ у Рэспубліцы Беларусь Батыра Бердыклычава пракаментаваць падзеі, што адбываюцца, і вось што ён сказаў:

– Вядома, гэтае пытанне больш адносіцца да кампетэнцыі штаб-кватэры СААЗ. Я чакаю, што, хутчэй за ўсё, гэта будзе каментавацца на адпаведным узроўні. З нагоды магчымых наступстваў. Вядома, уклад ЗША досыць істотны. Акрамя рэгулярных абавязковых унёскаў, існуюць яшчэ добраахвотныя разнастайныя ахвяраванні для падтрымкі пэўных канкрэтных праграмаў. Наколькі гэта (выхад ЗША з саставу краінаў-удзельніц СААЗ – заўв.В.М.) адаб'ецца на дзейнасці арганізацыі, будзе залежаць ад агульнага балансу і бюджэту, бо праца арганізацыі падтрымліваецца пераважнай большасцю краінаў-донараў. Нядаўна і Германія, і Францыя заявілі пра істотнае павелічэнне фінансавання. Лічбу дакладную не назаву, але гэта многія сотні мільёнаў даляраў. У сітуацыі, якая склалася, я не думаю, што хтосьці ў выйгрышы. СААЗ – гэта пляцоўка для краінаў, каб фарміраваць палітыку, ствараць стандарты ў галіне аховы здароўя, пратаколы лячэння, фарміраваць парадак для навуковых даследаванняў. Таму, вядома ж, удзел усіх краінаў у гэтым працэсе, а асабліва краінаў з такім патэнцыялам, як у ЗША, уяўляе узаемную цікавасць. Таму на сёння можна толькі шкадаваць аб такім рашэнні.

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

324 0 13

Журналіст. Вышэйшая адукацыя. Сябра Беларускага саюза журналістаў. Стаж працы ў прафесіі – 20 гадоў. Беларуска. Нарадзілася ў г.Ганцавічы Брэсцкай вобласці. У 2001 годзе скончыла факультэт журналістыкі Беларускага дзяржаўнага ўніверсітэта па спецыяльнасці «Журналістыка». Працавала спецыяльным карэспандэнтам аддзела эканомікі газеты «Беларуская ніва», аглядальнікам аддзела пісьмаў, аглядальнікам аддзела сацыяльных праблемаў газеты «Савецкая Беларусь» (зараз – «Выдавецкі дом «Беларусь сёння»). З 2016 года – карэспандэнт уласны аддзела інтэрнэт-праектаў РУП «Рэдакцыя газеты «Медыцынскі веснік». З 2000 года з'яўляецца сябрам Беларускага саюза журналістаў (БСЖ). У 2002 годзе стала лаўрэатам прэміі БСЖ за лепшую журналісцкую працу. У 2017 годзе – лаўрэатам прэміі БСЖ «Залатое пяро».