Для тых, хто яшчэ так і не пазнаў глог «у твар»… Па-руску – «боярышник». І пра што адразу падумалася? Ага, пра папулярнасць яго настойкі ў аптэцы сярод пэўных катэгорый грамадзян.
Так, настойку з яго таксама можна прыгатаваць самастойна. Гэтак жа, як мармелад, варэнне, сок, гарбату, адвар ды іншае. Прычым – сапраўды з лекавымі мэтамі. Але – як заўсёды, правяраючы, падыходзіць ці не глог кожнаму асабіста, прыслухоўваючыся да сваіх адчуванняў, да рэакцыі ўласнага арганізма.
Традыцыйна высвятляем, якія ж вітаміны, мікраэлементы ды іншыя рэчывы ўтрымліваюцца ў згаданых ягадах. Гэта К, РР, аскарбінавая кіслата, такія любімыя ўсімі антыаксіданты, эфірныя алеі, кобальт, калій, бор, алюміній, кальцый, марганец, жалеза, фруктоза і яшчэ шмат усяго.
Па меркаваннях вучоных, лепей спажываць ягады насычанага чырвонага колеру – тыя, якія добра выспелі і акумулявалі ў сабе максімальную колькасць усяго карыснага.
Праўда, калі своечасова іх не сабраць, яны апынуцца пад дрэвам. Напрыклад, я штодня ў Каменнай Горцы іду міма аднаго дрэва з глогам і вельмі ўважліва пазіраю пад ногі, каб па ягадах не патаптацца, не ўпэцкаць абутак. Бо ляжыць іх прама на асфальце процьма!
Што ж датычыцца карысці і шкоды…
Вось кожны раз губляюся, калі чытаю нават у адным артыкуле, напрыклад, што штосьці карыснае для сэрца, але і шкоднае для сэрца. Таму ўсё сапраўды вельмі індывідуальна.
Так, глог лічыцца карысным для сэрца, бо здольны дапамагаць ва ўзнаўленні мышачных валокнаў, пры сардэчнай недастатковасці. Але калі ўжываць яго доўга і шмат, магчымае павышэнне рытму сэрца ды іншыя непрыемнасці, звязаныя з галоўнай мышцай.
Глог сярод іншага выкарыстоўваецца для лячэння частай мігрэні і галаўнога болю, змагаецца як з павышаным крывяным ціскам, так і з паніжаным. Хм… І як жа ён, цікава, распазнае, дзе што і каму трэба?!
І, тым не менш, пры гіпертаніі раяць прыгатаваць такі збор.
Інгрэдыенты:
- здробнены глог – 15 грамаў;
- трава сушаніцы – 15 грамаў;
- трава пустырніку – 15 грамаў;
- кветкі сухога рамонку – невялікая колькасць.
Прыгатаванне:
- Заварыць збор шклянкай гатаванай вады.
- Змясціць пад накрыўку.
- Счакаць гадзіну.
- Працадзіць.
Прымяненне: па 30 грамаў перад ежай. Колькі разоў і як доўга – мяркуйце па ўласных адчуваннях.
Калі ж ціск нізкі, раяць прыгатаваць вось такі настой.
Інгрэдыенты:
- суквецці глогу – 15 грамаў;
- плады глогу – 30 грамаў.
Прыгатаванне:
- Плады глогу здрабніць, злучыць з суквеццямі.
- Заліць шклянкай гатаванай вады.
- Настойваць 2-3 гадзіны пад накрыўкай.
- Працадзіць.
Ужыванне: піць невялікімі порцыямі праз 2 гадзіны пасля ежы.
Ну і, вядома ж, глог выдатна супакойвае нервовую сістэму, спрыяе добраму сну, узмацняе цыркуляцыю крыві ў сасудах. Яго ягады можна проста заварваць і піць, як гарбату, настойваць у тэрмасе.
Пры правільным прыёме невялікімі порцыямі спецыялісты абяцаюць нам паніжэнне артэрыяльнага ціску, ачышчэнне сасудаў, змяншэнне ацёкаў, паляпшэнне агульнага самаадчування.
Але! Перадазіроўка пагражае многім нашым органам і сістэмам вялі-і-ікімі непрыемнасцямі. Калі маеце гастрыт і павышаную кіслотнасць страўніка, ягады глогу лепей не ўжываць увогуле. З асцярогай спажываць таксама цяжарным жанчынам і маладым мамам, якія кормяць.
А так… Раяць даваць па некалькі ягадак у дзень нават дзецям, толькі пачынаючы з 12 гадоў.
Мае бацькі, напрыклад, таксама проста ядуць па некалькі ягад у дзень. Пакуль яшчэ ёсць свежыя. Засталіся на самых макаўках дачных дрэў. А тыя, што былі ніжэй, абляцелі. «Ну і выдатна, – пачуўшы пра тое, усклікнуў знаёмы, які таксама завёў гаворку, як ён любіць глог яшчэ з дзяцінства. – Можна ж сабраць…»
І яшчэ ж яго можна не толькі высушыць на зіму, але і замарозіць у лядоўні. Пры ўмове, што там ёсць вольнае месца.
Вось толькі я штосьці не дужа тыя ягады ўпадабала. Як і мармелад з іх. Але зараз, начытаўшыся пра карысць, відаць, таксама паспрабую… палюбіць глог. А вы?!
