10.03.2021
10.03.2021

Глядзім на аблокі – і лечымся! Дзень воблачных сланоў! :)

logo
Думкі ўслых
0 042
Памер шрыфта:
  • A
  • A
  • A

Чалавека здаўна заварожвалі тры рэчы: агонь, які гарыць, вада, якая бяжыць, і аблокі, што плывуць па небе. І колькі б гадоў ні прамінула, гэтыя назіранні ніколі не надакучваюць. Але калі агонь і вада не заўсёды знаходзяцца, так бы мовіць, у зоне доступу, дык аблокі – вось яны! Толькі галаву ўзнімі – і часцяком іх згледзіш на небе. А сёння для гэтага і нагода добрая ёсць – Дзень воблачных сланоў! 🙂

Аблокі. Глядзім у неба – і лечымся.

Ну прызнайцеся, што практычна кожны з нас любіць назіраць за небам. Начным і зорным, месячным. Пагрозлівым, з маланкамі, якія працінаюць хмары наскрозь. Пахмурным, са снегам ці дажджом. Ясным і блакітным, у белых аблоках. І не толькі ў дзяцінстве, але ўжо і ў дарослым жыцці кожны можа раптоўна ўгледзець у небе… слана!

І гэтае відовішча не проста заварожвае, а быццам адчыняе якіясьці таямнічыя дзверы ў душы, адкуль ліюцца хвалі прыемнасці, святла, цеплыні, роздуму, развагаў… Для мяне сапраўдным адкрыццём было даведацца, што псіхолагі сузіранне аблокаў на небе параўноўваюць… з псіхатэрапеўтычным сеансам! Ну, і карысць непасрэдна для вачэй і зроку ніхто ж не адмяняў…

Аказваецца, калі мы разглядаем у небе аблокі, дык нашыя вочы робяць вельмі шмат рухаў – дакладна такіх жа, як і падчас фазы сну. А значыць, паралельна адбываецца ўнутраная перапрацоўка падсвядомых вобразаў.

Аблокі. Глядзець на іх карысна для вачэй і не толькі.

Гэты метад у свой час адкрыла Фрэнсін Шапіра. Па-беларуску яго назва гучыць так: дэсенсібілізацыя пасродкам руху вачэй (ДПРВ). Пра яго ў матэрыяле «Як прыйсці ў сябе пасля ШВЛ. Адказваюць псіхатэрапеўт і рэаніматолаг» сярод іншага ўзгадвала журналіст Ганна Кручкова. А наш відэааператар Андрэй Васкрасенскі зняў з гештальт-тэрапеўтам Васілінай Данілавай відэа пра гэты метад у дзеянні.

Але ж не кожны з нас збярэцца да псіхатэрапеўта, праўда?! А тут любуйся аблокамі ды аднаўляйся!

З дапамогай метаду ДПРВ, як сцвярджаюць спецыялісты, можна пазбавіцца ад страху, наступстваў траўмаў, трывожнасці, негатыўных адносінаў да жыцця. А самастойна назіраючы за аблокамі і ў гэты ж час думаючы аб праблеме, можна зняць псіхалагічнае напружанне і нават паменшыць праявы дэпрэсіі.

Аблокі. Глядзім на іх – і здымаем песіхалагічнае напружанне.

Што тычыцца апошняй, дык у рэальным жыцці людзі найчасцей альбо злоўжываюць гэтым тэрмінам, альбо не хочуць нават услых вымаўляць яго, як бы ні было блага. Я адношуся да апошніх. А вы? 🙂

… Напярэдадні свята перапісваюся з суседкай па пад’ездзе, з якой разам змагаемся звычайна за ацяпленне і гарачую ваду, якіх нашаму пад’езду шмат гадоў у ацяпляльны сезон не дастаецца ў поўным аб’ёме. Апошнім часам я ў выпадку чарговага касяку пішу заяўку, а суседка тэлефануе на гарачы нумар. Такое ў нас раздзяленне.

Зрабіўшы ёй кароткую справаздачу, дасылаю паведамленне ў вайбер. І атрымліваю ў адказ: «Нікуды не хачу званіць, я ў дэпрэсіі». Пытаюся: «Штосьці здарылася ці так проста?» – «Не, так...» А я вось услых і слова б гэтае не вымавіла б…

А вось цяпер параю сваёй суседцы: «Калі накатвае такі настрой, назірай за аблокамі…» 🙂 Ведаю-ведаю, што зараз многія скажуць! «Каб усе праблемы так лёгка вырашаліся…» Але чаму б і не паспрабаваць?! А няхай хаця б калі-небудзь – лёгка… 🙂

Удосталь налюбаваўшыся на аблокі, настроіўшыся на пазітыў, думаем пра здаровы лад жыцця і ў тым ліку – пра здаровае харчаванне. Вы ўжо здагадаліся, што і для гэтага ёсць нагода?! Так, Дзень дыетолага. У вас ёсць знаёмыя ўрачы-дыетолагі? Павіншуйце іх сёння!

Пры нашым маларухомым ладзе жыцця, які нечакана напаткаў нас яшчэ і сувязі з пандэміяй каранавіруса, правільнае харчаванне – проста жыццёвая неабходнасць. Праўда, задумаваемся мы над гэтым нячаста. І найперш тады, калі не ўлазім у любімую спадніцу, сукенку…

У лепшым выпадку ліхаманкава кідаемся, фігуральна кажучы, «качаць жалеза». І дужа здзіўляемся, што пры такіх фізічных нагрузках вынікі не тыя, якія хацелася б бачыць. А цяпер жа ўсё часцей і часцей гучыць: без правільнага харчавання цела мары не пабудуеш…

Ды нават калі і не зусім мары! Каб не выпіраў жывот, каб не звісала з бакоў… Эх! 🙁

Вясна сапраўдная – у нас наперадзе. А значыць, час абуджацца ад зімовай спячкі надышоў яшчэ ўчора. Таму любуемся аблокамі, настройваемся на пазітыў і… Ямо карыснае! Здароўя ўсім!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 42

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.