16.06.2021
16.06.2021

Чарговая Градавая… Не працуем сёння на зямлі?!

logo
Адметнасць беларусаў
0 041
Памер шрыфта:
  • A
  • A
  • A

Сёння, 16 чэрвеня, – чарговая Градавая серада. Адна з трох найбольш значных, якая адзначаецца перад Тройцай. А Тройца прыпадае ў 2021 годзе на 20 чэрвеня. Адна з вядомых галоўных забаронаў-парадаў на гэты дзень – не працаваць на зямлі. Але чаму ж у мяне з пытальнікам? Бо, па-першае, не ўсе ў гэта вераць і не ўсе прытрымліваюцца такіх правілаў нашых продкаў. А па-другое, бывае, чалавеку ну штосьці вельмі тэрмінова трэба зрабіць. Таму працаваць ці не працаваць, кожны вырашае сам.

Градавая серада. У што верылі нашыя продкі.

Увогуле-то, летась я пісала ўжо пра Градавую сераду, і досыць падрабязна. Але сёлета вырашыла ўсё ж абнавіць у памяці веды. Прапаную зрабіць гэта і вам, шаноўныя сябры. Чаму? Ды таму, што апошнім часам ледзь не штодня бачу ў сябе на інфармацыйным партале запыт «Градавая серада». Значыць, хтосьці ж цікавіцца, ды актыўна… 🙂

Яшчэ раз падкрэсліваю, што я не даследчык, не фалькларыст, не вучоны, каб штосьці сцвярджаць альбо аспрэчваць. Проста ўласнае ўспрыманне агульнавядомых альбо вузкавядомых, так бы мовіць, рэчаў. А пра такія адмысловыя дні, як Градавая серада, звычайна ведаецца-памятаецца шмат. І ўсё – ад маёй мілай мамачкі, якой ужо больш за год няма са мной…

Яе няма, але я ўсё роўна стараюся рабіць многае так, каб яе не пакрыўдзіць і не засмуціць. І датычыцца гэта найперш царкоўных святаў. Хаця, як зазначала ўжо не раз, я зусім не вернік у агульнапрынятым сэнсе слова. А проста прытрымліваюся таго ўкладу, які існаваў у сялянскай сям’і маёй мамы.

Градавая серада. Калі нельга працаваць на зямлі, а трэба.

У часы яе маленства, зразумела ж, ніхто не мог сабе дазволіць не працаваць на зямлі ажно цэлы дзень. Альбо не займацца іншымі справамі. Тым больш, што тых святаў і прысвяткаў столькі… Але прытрымліваліся наступнага: калі служба ў царкве пройдзе (12.00-13.00), нават калі там не прысутнічалі, тады і можна і за працу брацца.

Я, напрыклад, калі яшчэ шмат вязала, дык сапраўды старалася, як і прынята ў народзе, не брацца за пруткі цягам усіх Калядаў. І мне дзіўна было чытаць на нашай блогерскай пляцоўцы, як хтосьці там 1-га студзеня павязаў, 7-га…

Але я ніколі і нікому сваіх уяўленняў і перакананняў не навязваю і заўваг не раблю. Па-першае, час цяпер іншы. А па-другое… Зноўку, хто ў што верыць. Ці не верыць. Асабістая справа кожнага.

… Пакінуўшы ў гэтую суботу «хвост» на дачным кветніку (не хапіла часу), прыкідваю, што дзесьці ў сераду пасля працы можна на веласіпедзе на пару-тройку гадзін падскочыць на лецішча ды дапалоць. А цяпер аблом. Градавая… Не палезу ў зямлю зусім…

Можна было б у чацвер… Ды вось якая справа. Ён-то носіць назоў «Сухі». І таксама не раіцца ў гэты дзень чапаць зямлю, інакш ураджай будучы пасохнуць можа. Вось табе і маеш…

З аднаго боку, лепей бы пра такія народныя прыкметы (ці ўсё ж прымхі?) лепей не ведаць, праўда? Больш будзе прасторы для манеўраў. А з другога… Асабіста мне ніякавата робіцца, калі даведваюся, што штосьці такое парушаю. Бо няведанне, як вядома, не пазбаўляе ад адказнасці – ва ўсіх сэнсах.

Градавая серада. Каб ураджай град не пабіў, не працуем.

Але, спадзяюся, я вас не засмуціла, не напужала і планы вашыя не зблытала?! 🙂 Бо, як спяваецца ў песні, «усё залежыць ад нас саміх». А град можа пашкодзіць штосьці з пасаджанага і калі не працуеш у Градавую… Цяпер такая прырода, а лепей сказаць – стыхія, якая ад нас не залежыць.

Мы, напрыклад, нават не можам прадбачыць, колькі разоў яшчэ сёлета наш дачны ўчастак ператворыцца ў водную роўнядзь і ці выжыве хаця б што-небудзь з адсаджанага-пасеянага татам… Але ж і каб зарастала пустазеллем – гэта не справа…

Таму проста адчуваеш сябе абсалютна безабаронным перад стыхіяй. І – так! 21-е стагоддзе ў нас, а адчуваеш сябе ў пэўным сэнсе першабытным чалавекам, слабым перад прыроднымі з’явамі.

Градавая серада. Скараемся перад стыхіяй.

Але паглядзім, што прынясе нам сёння надвор’е. Бо надараліся такія гады, калі роўненька ў Градавую сераду нас град і «радаваў». Не хочацца, вядома ж, але… Што будзе, тое будзе. Галоўнае – здароўя ўсім! А чарговую Градавую перажывём! Ці з працай на зямлі, ці без… 🙂

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

0 0 41

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.