7 Чэрвеня
07.06.2019

І дзяцінства вясковага мроіцца пах...

logo
Думкі ўслых
118 0 55
Памер шрыфта:
  • A
  • A
  • A
А вы любіце водар сена?! Той асаблівы пах… ужо не свежай травы, але яшчэ не цалкам высахлай. Калі ў яго ўплятаюцца ноткі духмянага разнатраўя з адценнямі прахалоды дажджу… Калі хочацца ўдыхаць той водар на поўныя грудзі і, прыжмурыўшы вочы, у думках-мроях адлятаць… у краіну дзяцінства.

Тыя, хто нарадзіўся і хаця б некалькі гадоў правёў у вёсцы, думаю, мяне зразумеюць. Як і тыя, хто рэгулярна ўлетку праводзіў свае незабыўныя дзіцячыя гады ў бабуль з дзядулямі.

У кожнага свае ўспаміны пра сена. Хтосьці дапамагаў яго сушыць, зграбаць, стагаваць… Хтосьці з такім гонарам пазіраў на ўсіх астатніх зверху ўніз, едучы на высозным возе, нагружаным сенам! Іншыя ж засыналі ў стозе, на сене ў адрыне…

Але зараз любы водар такі мімалётны! Яго надоўга не затрымаць, калі проста праходзіш у горадзе міма скошанай камунальнікамі травы. Так, прыемна, але ўсяго на некалькі хвілін. А потым у твае лёгкія зноў лезе навязлівы пах бензіну, саляркі, шкодных выкідаў прадпрыемстваў, цыгарэт (сапраўдная бяда!!!)…

Але выйсце сапраўды ёсць! Гэта… падушка. І не са звычайнай высахлай травой, а з рознымі карыснымі духмянымі траўкамі. Калі спіш на такой, дык сапраўды бы вяртаешся ў вясковае дзяцінства. І засынаеш хутка, і сны сняцца каляровыя і прыемныя.

Да таго ж, падушку можна зрабіць лекавай! Толькі не забывацца на тое, што травы не павінны пахнуць рэзка і моцна. Інакш замест сну можна займець бяссонніцу і нават расстройства здароўя. Таму трэба давяраць сваім адчуванням – прыемна пахне ці не, выклікае добрыя эмоцыі альбо, наадварот, праз некалькі хвілін вы пачуваецеся некамфортна.

Памятаю сваю дачную падушку, набітую сенам і канюшынай. Вось тут сапраўды была сітуацыя: не паспяваеш да яе данесці галаву, як ужо спіш! J А ў вас бывала такое?!

Калі правільна падабраць начынне падушкі, дык можна пазбавіцца ад стомленасці і трывогі, стабілізаваць работу сэрца, атрымаць ачышчанае паветра, павысіць імунітэт.

Я ўжо прыглядаюся да травак, каб займець чароўную падушачку на гэты сезон. Спадарожна чытаю пра лекавыя ўласцівасці раслінаў. Цікава, што канюшына, аказваецца, здольная пазбавіць ад пакутлівага галаўнога болю. Хмель, валошкі і мята перцавая (якая так раскашуе на нашым дачным участку!) разам змагаюцца са стэнакардыяй і інфарктам. А бронхі і лёгкія дапаможа ачысціць… піжма. Калі ж яшчэ дадаць да яе хвою з бактэрыцыдным дзеяннем…

Вось толькі не ўпэўнена, што пах піжмы ўсім будзе даспадобы. І найперш у сабе сумняваюся. Таму хутчэй думаю пра больш прыемныя водары календулы і рамонку. Сцвярджаюць, што яны дораць эмацыянальнае заспакаенне, светлыя эмоцыі. Ну вось якраз тое, што трэба! Як мне, дык асабліва ў пятніцу, калі даехаць з Чэрвеня да Мінска на маршрутцы робіцца вялі-і-і-ізнай праблемай!

Вы ўжо вырашылі займець такую падушачку, зробленую сваімі рукамі?! Тады – за працу! Шыем альбо купляем чахол з моцнай тканіны – бавоўны ці лёну. Збіраем упадабаныя траўкі – падалей ад пыльных дарог, зразумела ж. Добра высушваем, толькі не на сонцы, а змясціўшы ў цень. Пажадана, каб месца добра прадзімалася ветрам. Гарышча – самае тое!

Калі любіце падушкі аб’ёмныя, трэба дадаць штосьці да духмяных травак – салому, папараць ці вераск. І перад сном часцей падушку трэсці-ўзбіваць. Тады яна не будзе падобнай да бліна. Ды і водар траў узмацніцца.

Можна, вядома ж, набыць і гатовую падушку з травамі. Але тое, што з любоўю сабранае-зробленае сваімі рукамі… Як мне падаецца, лекавае дзеянне будзе ўзмацняцца шматкроць.

А навеяў гэтыя думкі ўслых… усяго толькі водар свежага сена ў рысе горада. Добрых усім падушак і прыемных казачных сноў на іх!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

118 0 55

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.