8 студзеня
08.01.2020

І на працу – як на свята…

logo
Думкі ўслых
280 034
Памер шрыфта:
  • A
  • A
  • A
Не-не, я ніколькі не здзекваюся! Бо і сама сярод большасці тых, у каго сёння першы працоўны дзень пасля трох выхадных. Ды яшчэ адзін з якіх выдаўся святочным. Нават калі вы яго і не адзначаеце…
Праца пасля выхадных.

Ну-ка, прызнавайцеся, хто сябе ўчора даймаў думкамі: «Аа-а-а-а-а, заўтра на працуу-у-у-у…»?! І што? Што-небудзь змянілася? Мяркую, што не, і вы ўсё роўненька сёння на сваім працоўным месцы.

Сумна пазіраеце за акно, за якім добра калі промні сонца раптам вызірнулі альбо хаця б некалькі купак снегу ляжыць… А калі там лужыны, бруд і ніякага адчування, што ў нас студзень?! Тады «даганяемся» святлом, якое ёсць у памяшканні. Рэжым эканоміі электраэнергіі – справа, вядома ж, патрэбная і неабходная… Але калі ёсць магчымасць уключыць верхняе святло і настольную лямпу, дык чаму б і не?! Проста на той шэры час, які ўсё яшчэ сустракае нас па раніцах.

Кубачак ранішняй кавы… Яшчэ не надакучыў? Тады – наперад! А хто любіць гарбату – і вам смачна піць. Больш за ўсё вітаем аматараў чыстай вады, якія сочаць, каб за дзень выпіваць неабходную яе колькасць, усталёўваючы розныя «нагадванні» на разумных гадзінніках, фітнэс-трэкерах ды мабільных. Вось правільнае рашэнне!

Праца пасля выхадных. П'ём ваду.

Але, зноў-такі, каму што больш падабаецца. Не трэба, «пачынаючы новае жыццё», рэзка адмаўляць сабе ў звыклых рэчах адразу пасля вялікіх выхадных, сцвярджаюць спецыялісты. Асабліва, калі вы не зрабілі гэтага да святаў.

Я, напрыклад, вырашыла яшчэ зменшыць спажыванне цукру. Калісьці, памятаю, кава альбо гарбата з колькасцю меней за тры чайныя лыжачкі мне былі абсалютна нясмачнымі. З цягам часу густы змяняліся. Ужо даўно п’ю вялікі кубак з адной лыжачкай цукру. А яшчэ да Новага года перайшла на палову лыжачкі. І нішто сабе! Нічога дрэннага не адчуваю…

Праўда, не ўпэўнена, што надыдзе такі дзень, калі змагу піць каву альбо гарбату зусім без цукру. І адчуваць, што мне смачна. Хаця калі прыгадаць, з якім задавальненнем п’ю без дадавання цукру той жа «Фітагор»…

Ну што ж, кавы папілі, з калегамі меркаваннямі пра выхадныя абмяняліся… Дарэчы, спецыялісты прапануюць начальнікам усіх рангаў не дужа ганяць супрацоўнікаў у гэтыя першыя пасля вялікіх выхадных дні. Бо адразу з галавой у працу – ой як цяжка. Нават калі трэба адразу ж вырашаць складаныя задачы…

А вось і яшчэ парада пра задачы! Па магчымасці, не хапайцеся адразу за вырашэнне самых складаных, тым больш, калі да іх не ляжыць душа. Пачынайце з лёгкіх. І абавязкова хваліце сябе пасля іх выканання. А там, глядзіш, уцягнецеся, адчуеце азарт…

Усё яшчэ не? Тады яшчэ кубачак чагосьці. Лепей чыстай вады. Праветрываем памяшканне – пры любым надвор’і. Некалькі нескладаных практыкаваннў… Ну як? Пайшло? Хаця б паціху?

Праца пасля выхадных. Зарадка ў офісе.

А хто ў нас не любіць планаваць? Зусім-зусім?! Ну-у-у-у, паспрабуйце гэта зрабіць хаця б у першы дзень працы пасля выхадных. Кажуць, што дапамагае. Я таксама спрабую. Планы – рэч такая. Пачнеш закрэсліваць пункты, якія выканананыя… І вось ужо і азарт, і матывацыя, і… Ого, колькі атрымалася зрабіць!

Банальныя парады?! Ну, напэўна. Зараз жа сеціва проста па першаму ж патрабаванню выдае матэрыялы пра 5 парадаў, 7, 10… Як уцягнуцца ў працэс. Як ёсць час, пашукайце. Магчыма, сапраўды штосьці падасца больш блізкім.

Канешне ж, усё гэта не датычыць, скажам, урачоў, у каго сёння – аперацыйны дзень ці прыём хворых. Але і графік іх працы досыць жорсткі… Не да расслаблення на тры дні… Альбо калі вы стаіце ля станка. Той таксама не будзе чакаць, пакуль хтосьці прачнецца.

Праца пасля выхадных. Хірург на аперацыі.

І ўсё ж самае галоўнае, што ні кажы, а гэта наш уласны настрой. І вось якім ён будзе ў гэты дзень, залежыць… Так-так! Ад нас саміх. Не, канешне ж, вялікі бонус, калі вы сёння прачнуліся ў роўным настроі, вас нішто не раздражняе ў грамадскім транспарце, і калегі падаюцца мілымі і прыветнымі… Вось проста ідэальная раніца новага працоўнага дня!

А калі ўжо не пашанцавала… Давайце падумаем пра тое, што праца – любімая, калегі – прыязныя, а з начальствам поўнае ўзаемапаразуменне.

Вы займаецеся тым, што падабаецца, што цалкам ваша, і вам яшчэ за гэта плацяць грошы. І, калі ўжо зусім цяжка, давайце падумаем пра тое, што праз тры працоўныя дні да нас зноў завітаюць субота і нядзеля!

Праца пасля выхадных. Наперадзе выхадныя.

Таму ўсім – легкай працоўнай серады сёння! Не панядзелка, заўважце! Яшчэ адзін бонус. Бадзёрасці, аптымізму, здароўя, настрою… Чакайце, цяжкія працоўныя задачы! Мы ідзём да вас!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

280 0 34

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.