Інтымны пірсінг: меркаванне экспертаў пра нестандартнае ўпрыгожванне цела

Прыгажосць і догляд

0 40

Аўтар:

Ала Пірумава

Памер шрыфта:

Пірсінг – адна з самых папулярных мадыфікацый цела. Калі праколам вушэй нікога не здзівіць, дык ўпрыгажэнні на інтымных месцах можна аднесці да раздзелу «незвычайнае».

Вакол інтымнага пірсінгу шмат міфаў, спрэчак пра патрэбу і прыгажосць. Каб дакладна разабрацца ў пытанні яго функцыянальнасці і бяспекі, мы паразмаўлялі са спецыялістамі: прафесійным майстрам пірсінгу і бодымадыфікацый Леанідам Аўдзей-Жыгуновым і загадчыкам уралагічнага аддзялення гарадской клінічнай бальніцы №4 г.Мінска Дзмітрыем Малашчыцкім.

Навошта ён патрэбны, гэты інтымны пірсінг?

У кожнага кліента, які вырашыў абзавесціся ўпрыгажэннем на інтымным месцы, свае матывы: для кагосьці гэта проста чарговая мадыфікацыя «для прыгажосці», іншы хоча здзівіць партнёра новенькім незвычайным апгрэйдам. Але ёсць і тыя, хто з дапамогай завушніцы ў вобласці геніталій хоча ўзмацніць адчувальнасць і дадаць новых адчуванняў у сэксуальнае жыццё. Ці магчыма гэта?

Леанід Аўдзей-Жыгуноў

Майстар пірсінгу і бодымадыфікацый

Праколы сапраўды могуць несці пэўную функцыю. Упрыгажэнне, якое размяшчаецца блізка да галоўкі клітара (напрыклад, пры праколе капюшона клітара), будзе аказваць выражаны стымулюючы эфект. Але інтымны пірсінг таксама можа быць і дэкаратыўным. Так, «Хрысціна» (вертыкальны пракол ніжняй часткі лабка) цалкам пазбаўленая функцыянальнасці. Пры дапамозе пірсінгу можна вырашыць і праблему ўцягнутых саскоў, але трэба падумаць, ці варта. Пры гэтым варыянце анатамічнай будовы саска гаенне будзе ўскладненае. Замест стандартных 9 месяцаў яно можа зацягнуцца на год і больш, бо ціск тканак на ўпрыгажэнне будзе вышэйшым, чым у норме.

Дзмітрый Малашчыцкі

Загадчык уралагічнага аддзялення ГКБ №4 г.Мінска

Да нас у аддзяленне часта паступаюць людзі з рознага роду траўмамі, атрыманымі падчас палавога акту. Пірсінг у інтымных месцах можа толькі пагоршыць сітуацыю і павысіць траўманебяспечнасць. Таму, з пункту гледжання бяспекі, не варта рабіць пракол там, адкуль лёгка вырваць упрыгажэнні пры фрыкцыях. Узяць, да прыкладу, пракол «Прынц Альберт» (пірсінг пеніса ад вуздэчкі да ўрэтры. – заўв. А.П.). Калі яго «вырваць» падчас сэксу – можа ўтварыцца свіршч, які пры няправільным гаенні будзе прапускаць праз сябе біялагічныя выдзяленні.

Леанід Аўдзей-Жыгуноў

Майстар пірсінгу і бодымадыфікацый

Адэкватнае месца для інтымнага пірсінгу там, дзе ўпрыгажэнне не будзе траўмаваць навакольныя тканкі і перашкаджаць выкананню асноўных функцый. Падбор падыходзячага месца для пірсінгу – пытанне граматнага майстра. Як і права адмовіць, калі пракол папросту невыканальны.

Дзмітрый Малашчыцкі

Загадчык уралагічнага аддзялення ГКБ №4 г.Мінска

Трэба правільна падбіраць упрыгажэнні для інтымнага пірсінгу, якія знізяць траўманебяспечнасць пры палавым кантакце. Яны павінны быць вырабленыя з біясумяшчальных матэрыялаў, напрыклад, з тытана. А вось упрыгажэнні з золата можна ставіць толькі ў тым выпадку, калі няма алергічнай рэакцыі на металы. У ідэале, упрыгажэнне і матэрыял павінен падбіраць прафесійны майстар з медыцынскай адукацыяй.

Леанід Аўдзей-Жыгуноў

Майстар пірсінгу і бодымадыфікацый

Патрабаванні да ўпрыгажэнняў гранічна простыя: бяспечная канструкцыя, інертнасць і біясумяшчальнасць. Памер упрыгажэнняў майстар павінен падбіраць індывідуальна для кожнага канкрэтнага кліента. Матэрыял – толькі імплантацыйны тытан. Ніякай хірургічнай сталі, срэбра і золата ў генітальным пірсінгу быць не павінна ў сілу алергеннасці матэрыялаў.

Каму інтымны пірсінг строга супрацьпаказаны?

Генітальны пірсінг мае шэраг супрацьпаказанняў у залежнасці ад стану здароўя чалавека. Нават калі вельмі хочацца, Дзмітрый Малашчыцкі раіць адмовіцца ад інтымнага пірсінгу пры наступных паталогіях:

анамаліях развіцця палавых органаў (гіпаспадыя, эпіспадыя);
траўмах мочаспускальнага канала ў анамнэзе;
пры хранічных захворваннях мочапалавой сістэмы і вострых запаленчых працэсах (цыстыт, урэтрыт, піяланефрыт і г.д.);
пры гіпаспадыі (скарочанай урэтры ў жанчын).

Леанід Аўдзей-Жыгуноў

Майстар пірсінгу і бодымадыфікацый

Цяжарнасць, анатамічная несумяшчальнасць, антысанітарны лад жыцця і іншыя ідэйныя меркаванні, якія замінаюць выкананню гігіены, – гэта таксама тыя моманты, пры якіх ад інтымнага праколу лепей адмовіцца.

Гігіена і догляд. Кіраўніцтва па адаптацыі інтымнага пірсінгу

Якімі б ні былі прычыны, па якіх вы вырашылі зрабіць інтымны пірсінг, перш за ўсё варта выканаць залатое правіла: такія працэдуры павінен праводзіць толькі майстар-прафесіянал з медыцынскай адукацыяй – у салоне, які мае ліцэнзію на падобнага роду паслугі.

Леанід Аўдзей-Жыгуноў

Майстар пірсінгу і бодымадыфікацый

Усе ўпрыгажэнні павінны праходзіць перадстэрылізацыйную чыстку і стэрылізацыю. Прыходзячы да майстра, вы маеце права папрасіць распавесці пра стэрылізацыю і паказаць індыкатар.

Калі па якіх-небудзь прычынах майстар адмаўляецца пацвердзіць, што інструменты стэрылізаваныя, адмоўцеся ад яго паслуг і звярніцеся да іншага спецыяліста.

Што тычыцца пытанняў гігіены, эксперты аднадушныя: інтымны пірсінг вымагае дбайнага догляду. Аднак пры гэтым усё зводзіцца да шэрагу стандартных правілаў.

Падтрыманне чысціні. Інтымныя зоны патрабуюць штодзённага догляду, але з інтымным пірсінгам давядзецца задумвацца пра гэта часцей. У ідэале – пасля кожнага наведвання прыбіральні. Не трэба штораз вымываць усё начыста мылам, бо гэта можа пашкодзіць ахоўны бар'ер слізістай. Дастаткова пасля кожнага наведвання прыбіральні падмываць геніталіі праточнай вадой.
Ніякага хлоргексідыну і агрэсіўных антысептычных сродкаў. Яны здольныя пакінуць апёкі на слізістай і, наадварот, зацягнуць працэс гаення.
Палавы спакой на час першаснага гаення пірсінгу абавязковы. Час першаснага гаення можа вар'іравацца ў залежнасці ад месца праколу. Звычайна гэта ад 2 тыдняў да 1 месяца. Канкрэтныя рэкамендацыі дасць толькі прафесіянал, да якога вы звяртаецеся.
Пажадана выключыць карыстанне грамадскімі прыбіральнямі. Хаця б таму, што там праблематычна правесці неабходныя гігіенічныя працэдуры.

Калі вы вырашылі стаць уладальнікам інтымнага пірсінгу, з розумам падыдзіце да выбару майстра: не варта бегчы да таго, хто робіць танна і хутка. Ёсць сэнс азнаёміцца з водгукамі пра яго працу, але яшчэ лепей – пазнаёміцца з майстрам асабіста і прайсці папярэднюю кансультацыю.

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by