На працягу 9 месяцаў арганізм цяжарнай жанчыны працуе ва ўзмоцненым рэжыме і падвяргаецца павышаным нагрузкам збоку ўсіх органаў і сістэм. Таму падчас цяжарнасці нярэдка абвастраюцца хранічныя захворванні, часам узнікаюць новыя. Як ні дзіўна, першым западозрыць нядобрае можа... урач-стаматолаг. Таму што прыкметы абвастрэння агульнасаматычных захворванняў часта праяўляюцца менавіта ў поласці рота захворваннямі зубоў і дзяснаў.
Жыццёвая мудрасць кажа: адно дзіця адымае адзін зуб. Ці так гэта на самай справе? Ці дастаткова жанчыне мець здаровыя зубы на этапе планавання? Ці можна лячыць зубы падчас цяжарнасці? Што рабіць, каб захаваць здаровую ўсмешку і пасля нараджэння дзіцяці?
Пра гэта і многае іншае журналіст Слушна спытала ў стаматолага 7-й гарадской стаматалагічнай паліклінікі г. Мінска Юліі Мішчанчук.
Здаровая мама – здаровы малыш
Хворыя зубы – крыніца пастаяннай інфекцыі, небяспечнай не толькі для здароўя цяжарнай жанчыны, але і яе будучага дзіцяці.
Таму прынцыпова важна мець здаровыя дзясны і зубы яшчэ да зачацця дзіцяці. А сам перыяд цяжарнасці патрабуе ад жанчыны асаблівай увагі. Калі звычайнаму чалавеку дастаткова для прафілактыкі наведваць стаматолага раз у 6 месяцаў, будучай маме стаматалагічны агляд неабходны як мінімум 4 разы за 9 месяцаў. Наведаць урача неабходна на тэрмінах:
- 6-8 тыдняў цяжарнасці;
- 16-18 тыдняў цяжарнасці;
- 26-28 тыдняў цяжарнасці;
- 36-38 тыдняў цяжарнасці.
Па рэкамендацыі стаматолага, калі ёсць неабходнасць, колькасць візітаў можа быць павялічана ўдвая. Гэта абумоўлена тым, што падчас цяжарнасці ўзнікае шэраг фактараў, якія спрыяюць развіццю (або абвастрэнню) карыесу і хвароб перыядонта.
5 прычын, чаму падчас цяжарнасці пакутуюць зубы
- Змена гарманальнага фону. Гэта галоўная і натуральная змена ў жаночым арганізме падчас цяжарнасці - асноўная прычына так званага «гінгівіту цяжарных», калі дзясны становяцца больш друзлымі, ацякаюць, крываточаць.
- Дэфіцыт кальцыю. Яго правакуюць наступныя прычыны:
- будучае дзіця актыўна спажывае кальцый з арганізма маці;
- усмоктванне кальцыю можа быць парушана з-за абвастрэння хранічных захворванняў СКТ у маці;
- да страт кальцыю могуць прыводзіць частыя ваніты пры таксікозе.
- Змена складу і ўласцівасцей сліны. Падчас цяжарнасці канцэнтрацыя кальцыю і фасфатаў у сліне па аб'ектыўных прычынах зніжаецца, аб'ём самой сліны памяншаецца, што з'яўляецца адным з фактараў, які прыводзіць да агрэсіўнага працякання карыесу.
- Ранні таксікоз. Уздзеянне кіслага асяроддзя на фоне ваніт можа правакаваць эрозію эмалі зубоў.
- Змяненне звычак харчавання. Павышаны апетыт і частыя перакусы пры ранейшай частаце чысткі зубоў таксама робяць зубы цяжарнай жанчыны больш уразлівымі перад хваробатворнымі мікраарганізмамі.
Прафілактыка хвароб зубоў і дзяснаў падчас цяжарнасці
Для таго, каб літаральна нішто не сапсавала прыгажосць здаровай і беласнежнай усмешкі падчас цяжарнасці, будучай маме варта прытрымлівацца некалькіх простых правілаў, якія рэкамендуе наш эксперт:
- Дбайнае захаванне гігіены поласці рота:
- чысціць зубы варта не менш за два разы на дзень – раніцай і ўвечары;
- перавагу варта аддаваць зубной пасце, якая ўтрымлівае кальцый і фтор (яго рэкамендуемы змест не менш за 1450 - 1500 ppm);
- пажадана падчас чысткі спалучаць пасту з кальцыем і фторам з пастай, на якой пазначана супрацьзапаленчае дзеянне;
- пры таксікозе ў першым трыместры цяжарнасці пасля ваніт нельга чысціць зубы адразу! Пад уздзеяннем кіслага асяроддзя зубная эмаль становіцца менш устойлівай да сцірання, адпаведна, актыўная чыстка павялічвае рызыку з'яўлення эрозіі. Пасля ваніт варта прапаласкаць рот растворам харчовай соды (1 ч. л. на 1 шклянку вады) і толькі потым чысціць зубы пастай;
- рэгулярнае выкарыстанне флосаў (зубных нітак) пасля чысткі зубоў павінна ўвайсці ва ўстойлівую звычку. Прымяненне эліксіраў і вадкасцей для апалосквання будзе служыць дадатковай абаронай здаровай усмешкі;
- не забывайце мяняць зубную шчотку кожныя 3 месяцы.
2. Паўнавартаснае і разнастайнае харчаванне. Гэта самы просты і відавочны спосаб пазбегнуць дэфіцыту важных вітамінаў і мікраэлементаў, неабходных як цяжарнай жанчыне, так і яе будучаму дзіцёнку (гл. табліцу). Каб захаваць здаровую ўсмешку, нельга грэбаваць прадуктамі, якія ўтрымліваюць вітаміны А, В, Е і С, мікраэлементы магній, цынк, марганец, медзь.
Прадукты з высокім утрыманнем кальцыю
| Прадукт | Утрыманне кальцыю, мг/100 г | Прадукт | Утрыманне кальцыю, мг/100 г |
| Сыр | 1000 | Кефір | 120 |
| Малако згушчанае | 307 | Малако | 120 |
| Пятрушка | 245 | Шпінат | 106 |
| Шакалад | 199 | Цыбуля зялёная | 100 |
| Курага | 160 | Вяршкі | 90 |
| Тварог | 150 | Смятана | 86 |
| Фасоля | 150 | Гарох | 89 |
Прадукты з высокім утрыманнем вітаміна D
| Прадукт | Утрыманне вітаміну Д, мг | Прадукт | Утрыманне вітаміну Д, мг |
| Яйка | 1,8 | 150 г скумбрыі | 1,5 |
| 150 г траскі | 1,95 | 150 г марскога акуня | 3,45 |
| 150 г палтуса | 7,5 | 150 г тунца | 8,1 |
| 150 г сардзін | 11,25 | 150 г селядца | 46,6 |
| 150 г вугра | 19,5 | 45 г шпрот | 14,4 |
| 100 г печані птушкі | 1,3 | 100 г ялавічыны | 5,7 |
Таксама рацыён цяжарнай жанчыны павінен уключаць свежую садавіну, агародніну і ягады, крупы і зерне, рыбу і морапрадукты.
Лячэнне зубоў падчас цяжарнасці
Але часам, нягледзячы на ўсе прынятыя меры, лячэння зубоў падчас цяжарнасці пазбегнуць не ўдаецца.
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by
