24 Сакавіка
24.03.2019

Кальцый трэба, але ж мы – не куры?!:)

logo
Думкі ўслых
116 0 31
Памер шрыфта:
  • A
  • A
  • A

Думаю, кожны хаця б раз у жыцці сутыкаўся з народным рэцэптам... Мякка кажучы, дужа арыгінальным. Які, апрача здзіўлення, больш ніякіх эмоцый не выклікае. Але калі камусьці блага, а традыцыйнае лячэнне стан не палягчае, людзі хапаюцца і за дзіўнае. У надзеі, што дапаможа. І ніхто нікога за гэта не асуджае...

Не аднойчы ўжо бачыла парады, прычым вельмі пераканаўчыя, што пры недахопе кальцыю ў арганізме трэба... Не, не прымаць прэпараты з аптэкі! І не спажываць прадукты, у якіх ён утрымліваецца. А есці... здробненае шкарлупінне курыных яек! З рознымі дабаўкамі. Напрыклад, з лімонным сокам. Маўляў, дапамагае не толькі папоўніць запас кальцыю, але і хутчэй зрасціся пераломам.

Прычым асабіста я ведаю не аднаго чалавека, які ўжо скарыстаўся парадай і сцвярджае, што яна яму дапамагла. Эфект плацэба ці насамрэч так? Колькі б ні шукала 100% доказу на карысць выкарыстання шкарлупіны ў такім выглядзе (альбо звестак пра 100% шкоды), так і не знайшла. Меркаванні абсалютна палярныя. І хтосьці ж і на тых, і на другіх даследаваннях, як кажуць, робіць грошы...

Вядома, кожны будзе выбіраць для сябе тое, што ў верыць, што яму бліжэй... І кальцый нам насамрэч трэба, і вельмі. Асабіста я адчуваю відавочны вынік пасля прыёму вітамінаў (ці БАДаў), калі пазногці робяцца настолькі моцнымі, што імі, здаецца, можна праткнуць дрэва...

А чаму ўсё ж урачы не раяць замяняць аптэчныя прэпараты той жа шкарлупінай яек? Ды таму, што ў нашым арганізме няма ферментаў, якія б спрыялі яе ператраўліванню. Нават у здробненым выглядзе. І ніякі лімонны сок ці што іншае ў гэтай справе не дапаможа.

Цікава, што тыя, хто падтрымлівае і прапагандуе ўжыванне шкарлупіння з карысцю, робяць прыпіску: аказвае раздражняльнае дзеянне на сценкі страўніка. Таму з язвай ды вострым гастрытам – не ўжываць. Але ж і здаровы страўнік можа ад шкарлупіння пацярпець?!

Між іншым, мы сапраўды збіраем шкарлупінне ад яек. І нават перамолваем яго. Але – зусім для іншых мэтаў. Калі ўжо яно на 94% складаецца з карбанату кальцыю, дык чаму б гэта не выкарыстаць на сваю карысць? А менавіта – на падкормку раслінаў на дачным участку! Плюс яечная шкарлупіна здольная зніжаць кіслотнасць глебы – тое, што трэба!

Таксама вельмі спадзяёмся, што спрацуе парада, як з дапамогай шкарлупіння змагацца з лічынкамі хрушча. Бо так ужо спраўна псуюць яны некаторыя расліны! Асабліва трускалкі. Проста выратавання ад іх няма! Колькі ні перакопвай, колькі ні знішчай механічна, яны ўсё роўна з’яўляюцца! І з’ядаюць карэньчык расліны пад нуль. Калі-нікалі падступаюцца і да расады памідораў – на раннім этапе.

Дык вось знаўцы раяць закопваць пад кусты трускалак – пры пасадцы і не толькі – шкарлупінне курыных яек. Маўляў, лічынкі хрушчоў спажываюць яго і гінуць.

Ну, і яшчэ адзін факт не на карысць ужывання гэтай своеасаблівай крыніцы кальцыю для нас – тое, што куры час ад часу дзяўбуць знесеныя імі яйкі. І што ім шкарлупінне даюць як крыніцу кальцыю таксама размолатае, інакш шкодна для страўніка.

Але ж мы – не куры?! Таму лепей будзем берагчы ўласныя страўнікі! І атрымліваць кальцый са смачных прадуктаў ды прэпаратаў з аптэкі.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

116 0 31

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.