16 Снежня
16.12.2020

Калі маўчанне – сапраўды золата… :) Сёння – Іван Маўчальнік

logo
Думкі ўслых
0 0 44
Памер шрыфта:
  • A
  • A
  • A

Калі вы не любіце шмат гаварыць альбо ў вас баліць горла… Ці можа хочацца проста пабыць у цішыні… Паберагчы звязкі… Сёння для гэтага вельмі добрая нагода, бо ў народзе ўшаноўваюць Івана Маўчальніка! Зрэшты, растлумачыць, чаму варта паменш размаўляць у гэты дзень, можна рознымі спосабамі. Думаю, у кожнага знойдзецца ўласнае вытлумачэнне. Але факт застаецца фактам: маўчанне 16 снежня ў нашых продкаў ухвалялася.

Іван Маўчальнік. Маўчанне цанілі нашыя продкі.

Не тое каб зусім поўнае... Гэта быў бы ідэальны варыянт. Проста без патрэбы не размаўлялі. Пустога не гаварылі. І ўжо, канешне, не выхваляліся добрымі справамі і не звярталіся ў царкве да святых гучна, а маліліся без слоў, у душы.

Лічылася, што ў гэты дзень нават птушкі не спяваюць і звяры не выдаюць ніякіх гукаў. А калі снегір і зацырыкае, дык – да цяпла. А вы ўжо бачылі сёлетняй зімой снегіроў?! Я дык яшчэ не… Але спадзяюся, што, як і ў апошнія гады, яны да нас прыляцяць..

Што ж датычыцца нашых дзён… Калі б такога своеасаблівага свята не мелася ў традыцыях, яго варта было б прыдумаць! І з гэтым пагаджаюцца многія спецыялісты. Бо стасункі не толькі перагружаюць нервовую сістэму, але і спрыяюць развіццю неўрозаў.

Іван Маўчальнік. Стрэс і неўрозы ў нашыя дні.

Людзі старэйшага пакалення, якія ў большасці сваёй увесь час працавалі фізічна (уласна на працы, па хатняй гаспадарцы і г.д.), часцяком не могуць уцяміць, з-за чаго так стамляюцца іх дзеці, унукі, праўнукі. Вагоны суткамі не разгружаюць… Агароды пад рыдлёўку не перакопваюць… На сенакосах днямі не шчыруюць… Кароў уручную не дояць, корм ім па некалькі разоў у суткі не разносяць, стойлы не чысцяць…

Сядзяць у чысценькім офісе, мышшу шчоўкаюць, па тэлефонах размаўляюць, у сеціве стасуюцца, інфармацыю чытаюць… З чаго б тут стамляцца?! І ніяк ім не патлумачыць, што стома маральная – ад разумовай працы, ад тых жа самых стасункаў, часцяком ледзь не 24/7, яшчэ, магчыма, больш знясільвае, чым фізічная праца.

Мабыць, многім даводзілася пасля складаных перамоў, напісання вялікага матэрыялу, перакладаў з адной мовы на другую, распрацоўкі канцэпцыі чаго-небудзь і г.д. эмацыянальна казаць: «Ды лепей бы я вагоны разгружаў (ла)!» І гэта таксама гучыць як самая праўдзівая праўда…

Іван Маўчальнік. Калі стамляешся з-за стасункаў.

А ў каго вялікая сям’я, дзеці, хатнія жывёлы… Хто знаходзіцца ў адпачынку па доглядзе за дзіцем… Вось каму спакой, цішыня і маўчанне толькі сняцца! Але калі і выпадаюць зрэдку такія хвілінкі… Чым займаемся?! Правільна! Падключаемся да сеціва, чытаем інфу, стасуемся ў сацсетках і месэнджарах… Хаця і моўчкі, здаецца, але ж усё роўна гэта не тое маўчанне!

Спецыялісты сцвярджаюць, што падчас любога віду стасункаў мы шмат трацім сваёй энергіі і мала яе атрымліваем. А яшчэ калі сустракаемся з энергетычнымі вампірамі… 🙁 Вось і ўзнікае дэфіцыт псіхічных рэсурсаў… Вось і з’яўляюцца захворванні…

А дзе ж крыніца падсілкоўвання той неабходнай энергіяй? Ды вось жа яна – у маўчанні! Прычым у адмове ад любога віду стасункаў (у тым ліку і ў сеціве), хаця б на паўгадзіны. У адмове ад фону ў выглядзе мармытання тэлевізара (а яго, дарэчы, хтосьці яшчэ глядзіць?! Праўда?!), музыкі з любой крыніцы… І сёння вельмі добрая нагода, каб паспрабаваць разгрузіцца і зарадзіцца. Іван Маўчальнік жа!

Іван Маўчальнік. Хаця б паўгадзіны ў цішыні.

Можна зрабіць гэта самастойна і абсалютна бясплатна. Бо многія дзелавыя людзі, напрыклад, плацяць вялікія грошы спецыялістам за аздараўленчыя практыкі, каб пазбавіцца ад стрэсу і нервовых расстройстваў. А заключаюцца практыкі… у тым жа маўчанні! Аказваецца, наш мозг распазнае цішыню і моцна на яе рэагуе!

Памятаеце рэкламу са слоганам: «Часам лепей жаваць, чым гаварыць»?! Там яна, вядома ж, мае на ўвазе крыху іншае. Але, у рэшце рэшт, сэнс адзін і той жа – маўчанне. Якое – золата. І можа дапамагчы пры цалкам рэальных хваробах. Варта толькі настроіцца…

У старажытнасці, мабыць, добра ведалі пра гэта. Інакш навошта людзі розных веравызнанняў і г.д. давалі зарок маўчання?! А праверыць яго сілу ёсць магчымасць у кожнага з нас, ці не так?

Іван Маўчальнік. Сіла зароку.

А ў што канкрэтна верылі нашыя продкі, ушаноўваючы Івана Маўчальніка? Ну, толькі не смейцеся… Па-першае, што нячыстая сіла можа… скрасці голас. Нават так! Па-другое, калі ў гэты дзень памаўчаць, дык цэлы год можна будзе дамаўляцца з любым чалавекам і нават мірыць людзей. Па-трэцяе, калі муж з жонкай пасварацца, дык цэлы год сварыцца будуць. А вось яно нам трэба?!

Так што задумваемся сёння, шаноўныя сябры, маўчаць ці не маўчаць. Па магчымасці – правяраем, колькі можам вытрымаць у поўным маўчанні і цішыні. І… цешымся аздараўленчым эфектам!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 44

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.