15.01.2020
15.01.2020

Калі холад нас не страшыць…

logo
Думкі ўслых
0 32
Памер шрыфта:
  • A
  • A
  • A

І ў якіх жа выпадках гэта бывае? Ну, самае элементарнае – калі таго холаду няма. Нідзе. Ні на вуліцы, ні ў памяшканні, ні ў транспарце. На жаль, у межах нават такой несапраўднай зімы, як сёлета, – не наш варыянт. Калі яшчэ нас холад не страшыць? Калі мы цёпла апранутыя. Шматслойна, як раяць спецыялісты. Ну і, нарэшце, калі мы – загартаваныя!

У вас як з гэтай справай?! У мяне… Ну так, сярэдненька, па шчырасці. І не таму, што лянуюся альбо не хачу. Проста пры шэрагу хранічных захворванняў сапраўднае загартоўванне пралятае міма… Хаця калісьці былі спробы, былі.

Загартоўванне. Халодная вада.

Памятаю, як усім сямействам мы спрабавалі аблівацца халоднай вадой па моднай калісьці сістэме Парфірыя Іванова. Бр-р-р-р-р-р-р! Без дрыжыкаў і не прыгадаю. Тым больш, што давялося трохі прыстасаваць пад сябе. Не на зямлі стоячы аблівацца (чытай – на вуліцы), а дома ў ванне. Не зайшло. Ды і што-кольвечы з хваробаў абвострылася.

Хаця яшчэ раней, у студэнцкія гады, загартоўванне раз-пораз здаралася, так бы мовіць, натуральнае. І нічога! І малады арганізм спраўляўся…

Пасля гэтага таксама шмат было выпадкаў. І са знакам «плюс», і «мінусавыя». Што даспадобы і па сёння, дык гэта кантрасны душ. Пры ўмове, што змяшальнік працуе бездакорна.

Загартоўванне. Кантрасны душ.

А з гэтым ёсць праблемы. Бо трымаецца ён у нас, на дзіва, пад 15 гадоў. Нягледзячы на іржавую ваду, пры якой змяшальнікі ламаюцца звычайна на раз-два. А тут добрая фірма трапілася. Літоўская.

Наступнае, што таксама падабаецца, – загартоўванне прахалодным паветрам. Не ледзяным, не! А то чытала тут парады: «Адчыніце акно. Стварыце скразняк. А затым распраніцеся…» Гэта якіясьці парады наадварот! Бо на скразняку і апранутым вельмі лёгка патрапіць у прастуду.

Так што лепей проста прыток свежага паветра, і праз пэўны час акно зачыніць. І не да дрыжыкаў, не да «гусінай» скуры хадзіць па пакоі без вопраткі ці ў мінімальнай яе колькасці. Умеранасць. У загартоўванні гэта вельмі важна! Пачынаць з некалькіх хвілін. І не ўсё адразу! Альбо кантрасны душ, альбо паветраныя ванны, альбо абціранні. Альбо абліванні (хто ўвогуле вырашыць імі заняцца).

Загартоўванне. Паветраныя ванны.

І нават гэта не самае галоўнае! Самае галоўнае – каб не было захворванняў, пры якіх загартоўванне катэгарычна супрацьпаказанае, асабліва абліванні. Гэта вострыя рэспіраторныя інфекцыі і грып, высокі альбо нізкі ціск, раны альбо высыпанні на скуры, любое хранічнае абвастрэнне хваробы плюс перыяд менструацый для жанчын, скачкі вочнага ціску…

І ўвогуле, традыцыйная парада – прыслухоўвайцеся да сваіх адчуванняў і нічога не рабіце праз сілу. Маўляў, вось я вырашыла – і я гэта зраблю. Зусім не той выпадак, калі трэба дамагацца свайго любымі спосабамі.

Між іншым, ведаеце, у чым сэнс загартоўвання ўвогуле? Апрача павышэння імунітэту? Арганізм прывучаецца падтрымліваць пастаянную тэмпературу цела пры розных умовах знешняга асяроддзя. Будзем загартаванымі – і ў мінус 30 не пераахалодзімся. Ну, калі ў нас раптам такая тэмпература паветра калі-небудзь надарыцца. А можа, хтосьці збіраецца паехаць на Поўнач…

Загартоўванне. Зіма.

Ды і ў сезон дажджоў, які наведвае нас усё часцей і часцей, нават узімку, не будзем адчуваць пераахаладжэння. І зусім нядрэнна, праўда?!

Вядома ж, такія думкі ўзнікаюць не проста так, а напярэдадні Вадохрышча, 19 студзеня. Мы яшчэ, вядома ж, пагаворым пра гэта. Але лепей настроіцца зараней на тое, што калі вы не загартоўваліся, не абліваліся халоднай вадой, не абціраліся ёю ж і не прымалі прахалодных паветраных ваннаў, дык лепей не даваць экстрэмальнага нырца ў палонку!!!

А калі падумаеце раптам, што ў вас яшчэ ёсць дні тры, каб падрыхтавацца… Гэтага мала, вельмі мала.

Загартоўванне. У палонку на Вадохрышча.

Таму калі і вырашыце заняцца загартоўваннем, дык не для кагосьці ці чагосьці, не да пэўнай даты ці падзеі, а выключна для сябе саміх. Каб на карысць ішло. Каб умацоўваўся імунітэт і наладжвалася тэрмарэгуляцыя. Вось у гэтым – поспехаў усім, шчыра!

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 32

Журналіст, блогер. Вышэйшая філалагічная адукацыя. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. З 2018 года – рэдактар, аўтар блога «Думкі ўслых» на сайце "Слушна".