Ці можна ў перыяд пандэміі людзям з рэўматычнымі захворваннямі прымаць прэпараты з імунасупрэсіўным дзеяннем? І што рабіць, калі падхапілі каранавірусную інфекцыю? Вось некалькі базавых рэкамендацый ад экспертаў Еўрапейскай Антырэўматычнай Лігі (EULAR), міжнародных асацыяцый рэўматолагаў, расійскага НДІ рэўматалогіі імя В.А.Насонавай і Наталлі Мартусевіч, галоўнага пазаштатнага рэўматолага Міністэрства аховы здароўя Беларусі, прафесара кафедры кардыялогіі і ўнутраных хваробаў БДМУ.
1.Не спыняйце і не памяншайце прыём глюкакартыкоідаў, базісных супрацьзапаленчых прэпаратаў, генна-інжынерных біялагічных прэпаратаў, JAK інгібітараў і нестэроідных супрацьзапаленчых прэпаратаў. Пакуль няма дакладных навуковых дадзеных пра павышаную рызыку заражэння COVID-19 і развіццё цяжкіх формаў гэтай інфекцыі ў пацыентаў, якія прымаюць дадзеныя прэпараты. Наадварот, неабгрунтаванае перапыненне лячэння можа прывесці да абвастрэння рэўматычнага захворвання і пагаршэння стану. Асабліва гэта тычыцца глюкакартыкоідаў: спыненне прыёму гэтых лекаў нават на кароткі час можа значна пагоршыць стан.
2.Калі павысілася тэмпература, з'явіўся боль у горле, слабасць, чханне, кашаль, неабходна патэлефанаваць у паліклініку і абавязкова паставіць у вядомасць медыцынскіх работнікаў пра наяўнасць у вас рэўматычнага захворвання і прызначаныя супрацьрэўматычныя прэпараты.
3.Калі захварэлі на інфекцыйнае захворванне, у тым ліку каранавірусную інфекцыю, магчыма кароткачасова перапыніць тэрапію базіснымі супрацьзапаленчымі прэпаратамі, генна-інжынернымі біялагічнымі прэпаратамі і JAK інгібітарамі. У гэтым выпадку неабходна пракансультавацца ў рэўматолага для ўдакладнення тактыкі лячэння ў гэты перыяд!
4.У адпаведнасці з рэкамендацыямі EULAR, мінімізаваць рызыкі інфікавання можа вакцынацыя супраць грыпу і пнеўмакоку. Аднак не ў перыяд пандэміі, паколькі сёння неабходна пазбягаць паліклінік з-за павышанай рызыкі заражэння. Вакцынацыю мае сэнс рабіць у далейшым, пры сезонных успышках ВРВІ. Абмяркуйце гэта са сваім рэўматолагам.
5.Калі не часта выходзіце на вуліцу, можна штодня прымаць дадаткі з вітамінам D (10 мікраграмаў). Таксама неабходна прымаць вітамін С.
6.Старанна выконвайце ўсе меры індывідуальнай прафілактыкі заражэння COVID-19:
- рэгулярна мыйце рукі не менш за 20 секунд з мылам, пасля старанна высушвайце іх;
- не дакранайцеся да твару рукамі;
- захоўвайце разумнае сацыяльнае дыстанцыяванне;
- старайцеся не наведваць масавыя мерапрыемствы і месцы з вялікай колькасцю людзей;
- у ліфце, у грамадскім транспарце выкарыстоўвайце маскі.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by