12 Красавіка
12.04.2019

Касманаўт Алег Навіцкі – далёкі і блізкі

logo
Навiны
110 0 74
Памер шрыфта:
  • A
  • A
  • A

Унікальны дакументальны фільм «Зямляк», які распавядае пра трэцяга касманаўта – ураджэнца Беларусі Алега Навіцкага, у Дзень касманаўтыкі, 12 красавіка, можна будзе двойчы паглядзець на тэлеканале Беларусь 3 – у 16.20 і 22.50.

Стужка знятая Нацыянальнай кінастудыяй «Беларусьфільм». Аўтары сцэнару – народны артыст Беларусі Анатоль Алай (ён жа – рэжысёр) і пісьменнік Ігар Асінскі, кінааператар – Юрый Елхаў, вядомы нам па цудоўных фільмах для дзяцей «Прыгоды Бураціна», «Пра Чырвоную Шапачку» ды іншых.

У цэнтры карціны – ураджэнец г.Чэрвеня Мінскай вобласці, касманаўт Раскосмасу, Герой Расіі 47-гадовы Алег Навіцкі, які ўслед за вядомымі беларусамі Пятром Клімуком і Уладзімірам Кавалёнкам праклаў свой шлях да зор. І нават ужо двойчы!

Аўтару гэтых радкоў таксама пашчасціла паўдзельнічаць у здымках фільма падчас аднаго з прыездаў Анатоля Алая і Юрыя Елхава ў Чэрвень. А ўвогуле, здымкі карціны праходзілі як у Беларусі, так і ў Расіі: у Зорным гарадку, Цэнтры падрыхтоўкі касманаўтаў імя Ю.А.Гагарына, Цэнтры кіравання палётамі...

Не буду раскрываць рэжысёрскія задумкі, іх шмат. Проста скажу, што фільм павінен уразіць калі не ўсіх, дык многіх. Па-першае, Алег Навіцкі, чыёй аднакласніцай я маю гонар з’яўляцца, выправіўся ў сваю першую касмічную вандроўку не калісьці даўным-даўно, у мінулым стагоддзі, а ўвосень 2012 года.

Па-другое, ён з’яўляецца прыкладам таго, як можна спраўдзіць сваю дзіцячую і, здавалася б, абсалютна недасяжную мару. Па-трэцяе, стасункі з ім, фотаздымкі на памяць да і пасля палёту мела і мае проста агромністая колькасць землякоў! Ён сапраўды не чалавек з п’едэстала, не помнік ці барэльеф, а адзін з нас.

У свой час як журналіст я падрабязна пісала пра падрыхтоўку Алега Навіцкага да свайго першага палёту, у які практычна ўсім тады не асабліва-то і верылася: здавалася дужа фантастычным і нерэальным. Публікацыі з’яўляліся, у асноўным, у газеце «Раённы веснік» (г.Чэрвень) і рэспубліканскай «Звяздзе».

У апошняй пабачыла свет і серыя інтэрв’ю з маці Алега, Валянцінай Эдуардаўнай Навіцкай, якой я шчыра ўдзячная за прыязныя стасункі. А цяпер з гэтай цудоўнай жанчынай пазнаёмяцца і гледачы фільма «Зямляк».

У газеце «Звязда» падчас першага палёту Алега Навіцкага ў 2013 годзе было змешчана і першае ў гісторыі Беларусі касмічнае інтэрв’ю. На мае пытанні па тэлефоне наш касманаўт адказваў прама з Міжнароднай касмічнай станцыі!

Свае ўнікальныя задумы яшчэ падчас палёту касманаўта рэалізаваў аўтар творчага праекта «Мы і XXI век», сябра Саюза пісьменнікаў Беларусі Мікола Панасюк з Брэста. Дзякуючы яго намаганням, свет пабачылі (хаця і невялікім накладам) літаратурна-мастацкія выданні «У космасе – трэці беларус!» і «Чакай нас, любая Зямля!». Першае з іх, перафатаграфаваўшы, я адаслала Алегу на Міжнародную касмічную станцыю (мы рэгулярна ліставаліся), і ён з прыязнасцю падзякаваў.

Вядома ж, у кожнага беларуса свае ўяўленні пра касманаўта Алега Навіцкага. Таму вельмі цікава будзе даведацца, якім жа ўбачыў яго Анатоль Алай. Глядзім фільм! А ў каментарыях да гэтага матэрыялу можна будзе падзяліцца сваімі водгукамі. Чакаем!

Фота аўтара, з архіва Алега Навіцкага і сайта Цэнтра падрыхтоўкі касманаўтаў імя Ю.А.Гагарына

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

110 0 74

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.