11 студзеня
11.01.2019

Легчы ці… бегчы?

logo
Думкі ўслых
98 0 22
Памер шрыфта:
  • A
  • A
  • A

А як усё ж лепей паводзіць сябе падчас прастуды: увесь час ляжаць у ложку ці ўсё ж варушыцца? Менавіта пры прастудзе, а не пры грыпе? Вось зацікавіла мяне гэтае пытанне, калі «злавіла» сваю порцыю вірусаў…

Пра тое, што нельга «перахаджваць» хваробу, каб не ўзнікла ўскладненняў, мы ведаем ужо даўно. Ды і навакольных заражаць не варта… На справе ж часта альбо не атрымліваецца (на працы завал, хаця, як вядома, незаменных быццам і не бывае), альбо не хочацца траціць час на сядзенне ў чарзе ў паліклініцы, альбо няма тэмпературы (хто ж дасць бальнічны)… І мы мужна трываем. І, як кажуць, дзякуй Богу, калі сапраўды ўскладненняў не ўзнікне.

Але я нават не пра гэтую сітуацыю, а крыху пра іншую. Калі вас усё ж адпусцілі на дзень-другі дахаты альбо наперадзе выхадныя. Як лепей: зашыцца на ўвесь гэты час пад коўдру ці паспрабаваць весці звычайнае жыццё? Асабіста мне здаецца, што трэба паводзіць сябе па адчуваннях. Што, уласна кажучы, і стараюся рабіць. Бо калі слабасць, не ва ўсіх атрымаецца ўзяць сябе за шкірку і прымусіць штосьці рабіць. Ды і для чаго такія ахвяры?

Іншая справа, калі арганізм вагаецца, бы маятнік: паляжаць ці заняцца працай, пажадана фізічнай? Тады стараюся выбіраць апошняе. Бо здаецца, што калі штосьці робіш, дык і лягчэй. А калі прылёг на канапу, дык так цяжка выбрацца з яе абдымкаў нават на кухню, каб зрабіць сабе цёплае карыснае пітво. Быццам канапа тая сабрала прыцягненне з усяго зямнога шару і адчувальна прыціснула да сябе – не вызваліцца…

Вядома ж, лепей не хварэць. Не лавіць прастуду альбо вірусы. Загартоўвацца, умацоўваць імунітэт – не пустыя словы, праверана! Можа нават прымаць спецыяльныя травяныя зборы. Асабліва калі верыш у іх дзеянне.

Вось не ведаю, што ў нас у сям’і спрацоўвала некалькі гадоў запар – самаперакананне альбо несумненная карысць травак. Але прымаючы 2 разы на год – у красавіку і кастрычніку – «Фітагор» (не рэклама!!! Проста дзялюся!), сапраўды не хварэлі. Альбо хвароба раз на год узімку праходзіла лёгка і хутка. Відаць, трэба аднавіць прыём…

Што ж тычыцца загартоўкі, дык заканчваць ранішняе ўмыванне халоднай (а то і ледзяной) вадой – мая даўняя звычка. А яе відавочная карысць таксама была пацверджана на практыцы. Больш за 10 гадоў таму для забеспячэння кватэры гарачай вадой мы набылі бойлер. Узрадаваўшыся такому камфорту, я ўвосень умывалася толькі цёплай і гарачай вадой. У выніку ўзімку мой арганізм не вынес пахаладання і адрэагаваў працяглай прастудай. Пасля выздараўлення я зноўку палюбіла халодныя працэдуры…

Вялікая колькасць свежай садавіны і гародніны штодня, вітаміны і БАДЫ, вакцынацыя, загартоўка, частыя праветрыванні памяшканняў, доўгія прагулкі на свежым паветры, заняткі зімовымі відамі спорту… Кожны сам выбірае для сябе дзейсную сістэму падтрымання імунітэту. Галоўнае – яна павінна быць, гэтая сістэма. Тады і хвароба пераносіцца лягчэй.

Здароўя ўсім! Беражыце сябе!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

98 0 22

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.