У Мінску стартавала апытанне бацькоў, з улікам вынікаў якога будуць сабраныя скрыні ў падарунак для сем'яў нованароджаных. Будучыя таты і мамы, а таксама тыя, хто ўжо стаў бацькамі, змогуць выбраць рэчы, якія, на іх думку, стануць добрай дапамогай для догляду малых. Прагаласаваць можна на сайце mamapro.by.
Па словах кіраўніка праекта «Pro» акушэра-гінеколага Дыяны Мардас, вынікі галасавання будуць падведзеныя на працягу месяца. Плануецца, што ўжо да Дня маці, які адзначаецца 14 кастрычніка, першыя боксы ў падарунак уручаць шчаслівым бацькам радзільнага дома 5-й гарадской клінічнай бальніцы сталіцы.
Традыцыя ўручаць мамам малых скрыначкі з неабходнымі рэчамі (падгузнікамі, адзеннем, цацкамі, сродкамі гігіены) сёння ёсць у больш чым 80 краінах. Напрыклад, у скандынаўскіх краінах у такіх боксах можна знайсці невялікі матрац, коўдру, прасціну і наматрацнік, адзенне для самых маленькіх, падгузнікі і пялюшкі, ручнік, шчотку для валасоў, дзіцячы крэм і тэрмометр.
Маладыя бацькі часта сумняюцца, што ж сапраўды неабходна малышу. Якім павінен быць матрац? Якія падгузнікі абраць? А ці так патрэбен крэм або лепш выбраць прысыпку? «Царапкі», бодзі, шапачкі, пустышкі, бразготкі... Ва ўсёй разнастайнасці прапанаваных тавараў лёгка разгубіцца нават дасведчаным мамам і татам.
Спецыяліст адзначыла таксама, што свой уклад у фарміраванне боксаў змогуць унесці ўсе беларусы. І вынікам такіх сумесных намаганняў, упэўненая Дыяна Мардас, стане сапраўды карысны бацькам і малым набор.
Як адзначыла эксперт, ва ўсіх грамадскіх праектах каманды «Pro» ёсць навуковая аснова. Было праведзена вялікае даследаванне сярод жанчын. Мамы распавялі пра тое, як прайшлі цяжарнасць, роды, што ім хацелася б змяніць. У выніку нарадзілася некалькі праектаў, адзін з якіх – скрынкі ў падарунак для новаспечаных бацькоў.
Першыя вынікі апытання будуць прэзентаваныя на навучальным мерапрыемстве «ТатаPro», якое пройдзе 15 верасня ў ГЦ «Gallerea Minsk».
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by
