08.03.2021
08.03.2021

Мімоза на лецішчы, альбо Кветак зашмат не бывае! :)

logo
Думкі ўслых
0 035
Памер шрыфта:
  • A
  • A
  • A

Вядома ж, нюхаць кветкі ў процівагазе і нязручна, і сэнсу не мае. Менавіта з гэтым дзеяннем многія параўноўваюць віртуальныя кветкі-падарункі ў сацыяльных сетках. Маўляў, у чым іх сэнс?! Ну, не ведаю. Я люблю іх атрымліваць. Яны сапраўды радуюць не горш за сапраўдныя. А ўжо на 8 Сакавіка віртуальнымі літаральна закідваюць! Прычым пачынаюць яшчэ за пару-тройку дзён… 🙂

8 Сакавіка. Віртуальныя падарункі ў сацыяльных сетках.

Так сталася і сёлета. А яшчэ ў вайбер ад знаёмай прыляцелі фота вялі-і-і-і-і-ізных дрэў мімозы. Замежнай. «Вось бы мне такую на дачу!» – хуценька адстукала ў адказ. І падумала: «Хачу, каб на лецішчы расла мімоза!» Чым не жаданне на 8 Сакавіка?! 🙂

Мімоза ў гэты дзень – адна з маіх самых любімых кветак. Яе звычайна і нязменна дорыць брат. Асабліва запомніўся год, калі ў Чэрвені мімозу чамусьці не прадавалі. А ў Ігара якраз напярэдадні свята была паездка на футбольны матч з нашай чэрвеньскай камандай «Колас» у Маладзечна. І мімоза прыехала адтуль… І вось як не пазайздросціць тым, у каго расце такое хараство проста на вуліцы?! Я не пра Маладзечна зараз!!! 🙂 Пра замежжа… Дзе бяры – і ламай без усялякіх грошай…

Хаця, мне падаецца, ламаць было б шкада… Навошта галінкі ў хаце, калі ў любы момант можна палюбавацца на цэлае вялізнае дрэва?! Гэта прыкладна так, як ёлку да Новага года ўпрыгожваць тую, што расце ля ўчастка. Альбо проста ў лесе… Карацей, хачу дрэва мімозы! 🙂 Сціплае такое жаданне, праўда?

8 Сакавіка. Цэлае дрэва мімозы.

Не меней за мімозу люблю цюльпаны. І тут зноўку парадокс. У сезон іх на лецішчы – хоць касой касі! 🙂 Дык тое ж у сезон. А хочацца на 8-га Сакавіка… Жоўценькіх, сонечных…

Памятаю, адзін ці нават два гады я займалася выганкай цюльпанаў да Дня жанчын. Некалькі кветак у вазоне. Толькі, вядома ж, не мела магчымасці праз пэўны час штодня іх паварочваць да святла, сцябліны атрымаліся крываватымі. Але ж усё роўна – цюльпаны! Да 8 Сакавіка! Вырашчаныя ўласнаручна!

А вось ружаў чамусьці на 8 Сакавіка і не хочацца… Гваздзікоў, хрызантэмаў – таксама… Аднойчы дарыла маме прымулы ў вазоне, змешчаным у прыгожы плецены кошык. У той год «цывілізацыя дайшла да Лакаткоў» (пазналі, адкуль цытата? Фільм «Ландыш серабрысты»), і гэткую прыгажосць прадавалі ў адной з прыватных крамаў, якая даўно ўжо не існуе. Крэатыўненька так і адносна нядорага...

8 Сакавіка. Прымулы ў падарунак.

А вось гіяцынты ў вазоне… На аматара. З іх рэзкім пахам… Тым больш, што ў сезон таксама раслі на дачы. І калі вецер быў з іх боку ў наш… Даводзілася літаральна ўцякаць ад таго месца.

Ведаю, што ёсць жанчыны, якія сцвярджаюць, што яны абсалютна абыякавыя да кветак. Ёсць тыя, хто замест кветак марыць атрымаць штосьці больш… трывалае і матэрыяльнае, а не тое, што максімум праз 5-7 дзён ужо давядзецца прыбіраць з вачэй… Вядома, куды… Але не будзем пра сумнае… 🙂 Таксама ёсць жанчыны, якія шкадуюць грошай, патрачаных з сямейнага бюджэту на кветкі… Словам, усе мы розныя. Але ў абсалютнай большасці… За кветкі на свята.

І прыгадаліся мне сёння падзеі 10-гадовай даўнасці. Я тады працавала ў раённай газеце, а мой добры знаёмца-паэт надрукаваў там верш. Вельмі люблю яго творчасць і часта цытую. А тут штосьці не зайшло. І нават… абурыла. 🙂

8 Сакавіка.

На жаль, няма зараз гэтага тэксту ў сеціве. Але абавязкова знайду пазней у газетным архіве. А размова ішла там пра тое, што дарыць кветкі варта… толькі каханым. Вось так!

Разабрала мяне не на жарт! І з’явіліся такія радкі ў адказ:

Вось табе  і маеш, пані…

Як няма таго кахання,

Не чакай ты болей кветак,

Калі кожны зробіць гэтак.

А чаму (без дай прычыны!)

Лепей ведаюць мужчыны,

Што не трэба нам букеты,

Пражывем без кветак гэтых?!

Не чакай іх ад суседа,

Ад калегі-дамаседа…

Не чакай і ад сяброў:

Не каханне то – любоў!

І няхай табе знаёмы

Паднясе цяпер з паклонам

Ці гарэлку, ці віно…

Цыгарэты заадно…

Бо цяпер жа (так бы мовіць)

Ён на кветак… зэканоміць!

На духі ці шакалад

Грошай пашкадуе, …!

Так што ўсё ж – свабоду кветкам!

Хай сабе кахання сведкам

Ці яшчэ чагосьці там –

Кожны выбірае сам.

І ў святы, і ў будні

Мы, жанчыны, кветкі любім,

Адгаворак не прымаем

І заўсёды іх чакаем!

8 Сакавіка. Дарыце жанчынам кветкі.

Мілыя нашы, чароўныя, каханыя, любімыя спадарыні, пані, паненкі! Са святам, з Днём жанчын! Няхай кожная адчуе сябе сёння самай шчаслівай, нягледзячы ні на што! І памятайце: кветак, нават віртуальных, зашмат не бывае! 🙂 Асабліва 8 Сакавіка

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 35

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.