Па дадзеных спецыялістаў Міністэрства аховы здароўя РБ, у краіне рэгіструюцца толькі адзінкавыя выпадкі грыпу. У асноўным, гэта вірусы грыпу А-H1N1 і H3N2.
Зрэшты, у гэтым эпідэміялагічным сезоне падобная сітуацыя назіраецца ў многіх краінах Еўропы, паведаміла журналістам у Нацыянальным прэс-цэнтры намеснік начальніка аддзела гігіены, эпідэміялогіі і прафілактыкі Міністэрства аховы здароўя Іна Карабан.
Спецыяліст дадала таксама, што ў некаторых еўрапейскіх краінах ужо зафіксавана павелічэнне колькасці выпадкаў захворвання, у іншых (Албанія, Балгарыя, Македонія, Таджыкістан) актыўнасць вірусу грыпу адсутнічае. Лакальныя ўспышкі гэтай інфекцыі зарэгістраваны ў Грэцыі, Славакіі і Узбекістане. Ісландыя, Нарвегія, Партугалія, Турцыя і Швецыя паведамляюць аб шырокай распаўсюджанасці грыпу.
Па словах загадчыцы аддзела пульманалогіі і хірургічных метадаў лячэння хвароб органаў дыхання РНПЦ пульманалогіі і фтызіятрыі, кандыдата медыцынскіх навук Алены Давідоўскай, крыху менш за 2 млн.эпізодаў ВРІ на працягу года фіксуецца ў жыхароў Беларусі. Тры чвэрці з іх – гэта звычайныя прастуды ці вострыя рэспіраторныя інфекцыі.
Іна Карабан дадала, што самым эфектыўным спосабам прафілактыкі грыпу, у тым ліку яго ўскладненняў, з'яўляецца вакцынацыя. Людзі, якія зрабілі прышчэпку супраць гэтай інфекцыі, нават калі ў іх развілася пнеўманія, пераносяць яе ў досыць лёгкай форме.
І яшчэ раз аб прафілактыцы грыпа і ВРІ
У перыяд росту захворвання на ВРІ і грып спецыялісты раяць абмежаваць жывыя стасункі, а таксама больш гуляць на свежым паветры, часцей мыць рукі, адмовіцца ад поціскаў рукі, бо гэта таксама шлях перадачы вірусу.
Калі прыкметы ВРІ ўжо з'явіліся, не варта забывацца пра «кашлявы» этыкет.
А вось марлевыя павязкі мэтазгодна насіць толькі тым, хто ўжо захварэў, і толькі ў памяшканні.
Маску трэба часта мяняць, каб не адбылося рэінфіцыравання (паўторнага заражэння). На вуліцы, дзе верагоднасць распаўсюджвання грыпу і іншай інфекцыі зводзіцца практычна да нуля, насіць маскі не трэба, адзначыла Іна Карабан.
У сваю чаргу, Алена Давідоўская дадала, што ў перыяд, калі высокая верагоднасць захварэць на ВРІ і грып, не варта перадаваць адзін аднаму свае мабільныя тэлефоны або ручкі, а таксама не варта здымаць зубамі пальчаткі.
Хуткі і рэзкі пачатак захворвання – адметная рыса грыпу. Раніцай чалавек можа быць яшчэ здаровы, а да абеду ў яго будуць усе прыкметы захворвання.
Грып пачынаецца са з'яўлення прыкмет інтаксікацыі: дрыжыкаў, галаўнога болю, ламоты ў целе, болю ў вачах, слабасці, павышанай патлівасці, тэмпература павышаецца рэзка і можа дасягаць адзнакі 40°С і вышэй. Можа прысутнічаць сухі кашаль, які суправаджаецца болем за грудзінай. Насавое дыханне абцяжарана. Пры няўскладненым цячэнні хваробы сімптомы могуць захоўвацца да 6 дзён. У 10-15% выпадкаў перанесенага грыпу назіраюцца сур'ёзныя ўскладненні.
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by
