06.12.2020
06.12.2020

Мітрафан крыху спазняецца? А снег прыйшоў своечасова…

logo
Думкі ўслых
0 046
Памер шрыфта:
  • A
  • A
  • A

Нават дзіўна, наколькі дакладна сёлета пачатак каляндарнай зімы супаў з зімой сапраўднай! Бо даўнавата ўжо мы на пачатку снежня не назіралі снежнае покрыва, няхай сабе і зусім невялікай таўшчыні. Але ў пакоях ад яго і ўначы светла! А хтосьці трэцяга снежня ў нас у Чэрвені нават ўхітрыўся завезці малое ў дзіцячы садок на санках. І правільна! Трэба лавіць момант! Бо якім будзе ён, сёлетні Мітрафан, якога нашыя продкі ўшаноўвалі 6 снежня, па шчырасці, загадка…

Мітрафан. Надвор'е на Мітрафана. З Мітрафана даўней санны шлях распачынаўся.

Бо пісаліся гэтыя радкі зараней. І ўжо тады надвор’е абяцалі нам, пачынаючы з пятніцы, няўстойлівае. Лёгкі плюс і дажджы супраць лёгкага мінусу і снегу… Эх! А па прыкметах нашых продкаў, на Мітрафана павінен ужо распачынацца санны шлях…

Але шкадаваць тут можна толькі пра адсутнасць снегу, а не пра магчымасць на санях праехацца. Бо для тых жа маршрутак лепей чыстая ды гладкая дарога. І каб той дождж адразу ж не замёрз. А то ж Дзень бляхара надарыцца, не дай Бог! 🙁

Затое калі ёсць снег, лёгкі марозік плюс яшчэ і сонца, дык многія ўяўляюць сабе ўжо калядныя святы ды Новы год. А ці чулі вы, шаноўныя сябры, пра яшчэ адно адмысловае свята, якое прыпадае таксама на сёння, 6 снежня?! А гэта – Дзень ёлкі з рукавічкамі! Чулі пра такі?! І я таксама – не. Таму давялося шукаць пра яго хаця б штосьці ў сеціве.

Мітрафан. Плюс Дзень ёлкі з рукавічкамі. Вязаныя рукавічкі ў падарунак.

І ў чарговы раз – эх! Пра такое свята трэба ведаць зараней. Каб зараней жа і падрыхтавацца. Да дабрачыннасці. І зноўку мы пазіраем у бок Амерыкі ды мастацкай літаратуры.

Аказваецца, у амерыканскай пісьменніцы Кэндас Крыстыянсен у кнізе «Дрэва з рукавічкамі» распавядаецца, як адна мадам штораніцу назірала за школьнікамі на аўтобусным прыпынку. І заўважыла, што ў аднаго хлопчыка не было рукавічак. І яна звязала іх для яго і змясціла пад ёлку, каб ён знайшоў.

І цяпер дзе-нідзе ў гэты дзень ладзяць дабрачынныя акцыі. Сутнасць іх у тым, што ёлкі ўпрыгожваюць сапраўднымі вязанымі рукавічкамі. А затым іх у якасці падарункаў забіраюць дзеці з дзіцячых дамоў. Ну вось жа якая выдатная прыдумка, а?! Ведала б зараней – каму-небудзь звязала б. Рукавічкі – яны ж хутчэй за пальчаткі вяжуцца…

Мітрафан. Дзень ёлкі з рукавічкамі. Вяжам на прутках.

Але і гэта не ўсе дзівосы на сёння. Бо 6 снежня таксама – Дзень рыжых думак! «Якіх-якіх?!» – перапытаецеся вы. Ага… Рыжых… Сама ў шоку! 🙂

Як жа ў сеціве тлумачаць рыжыя думкі? Тыя, якія прыходзяць у галаву рыжым (цікава, а пафарбаваныя валасы лічацца?!). Сонечныя, вясёлыя, пазітыўныя. Нечаканыя. Хуліганскія. Зрэшты, спіс можна дапаўняць да бясконцасці!

А заадно сёння рабіць учынкі… Што адпавядаюць рыжым думкам: нечаканыя, у нечым хуліганскія, карысныя альбо зусім не… Вось якая прастора для фантазіі! 🙂 А яшчэ… Рыжыя ўсяго свету, яднаемся! 🙂 Павінна ж нам пашанцаваць, хаця б калісьці!

Мітрафан. Плюс Дзень рыжых думак.

Але перш чым пачаць весяліцца, давайце зробім адну сур’ёзную справу. А менавіта – павіншуем усіх, хто святкуе Дзень юрыста, з прафесійным святам!

А яно, як вядома, адзначаецца ў першую нядзелю снежня. Са святам усіх сумленных і праўдзівых працаўнікоў, якія строга прытрымліваюцца закону і ніколі не паддаюцца ціску альбо ўласным эмоцыям.

А! Мы ж яшчэ забыліся пра адну імянінніцу сёння! Мікрахвалёўку! Менавіта яна адзначае 6 снежня Дзень народзінаў. Нягледзячы на спрэчкі, якія ідуць і па сёння паміж вучонымі і даследчыкамі пра яе шкоднасць альбо бясшкоднасць для чалавека, яна гаспадарыць на кухнях многіх даўно і добра.

Мітрафан. Плюс Дзень народзінаў мікрахвалёўкі.

Я, напрыклад, у ёй не гатую. Толькі грэю. І тое часцей за ўсё не больш за 1 раз у суткі. А магу і ўвогуле не выкарыстоўваць. Так што хочацца думаць, што вялікай шкоды ад яе не маю… Таму шчыра – з Днём народзінаў, печка мікрахвалёвая! 🙂

А вось цяпер… Хутчэй-хутчэй! Да рыжых думак і рыжых учынкаў! 🙂

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 46

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.