12.05.2021
12.05.2021

У вайну і ў мірны час, медсёстры, людзі цэняць вас!

logo
Думкі ўслых
0 040
Памер шрыфта:
  • A
  • A
  • A

«Сястрычка, падыдзі…», «Сястра, вады…», «Мілая, дапамажы мне напісаць пісьмо дахаты…» Менавіта гэтае, з часоў вайны, так і гучыць у вушах, і мільгае перад вачыма кадрамі чорна-белай ваеннай хронікі, як толькі размова заходзіць… пра медсёстраў. Не менш удзячныя ім пацыенты і ў наш час. І сёння мы маем добрую нагоду, каб павіншаваць цудоўных прадстаўніц гэтай гуманнай прафесіі (і прадстаўнікоў – таксама!). Бо 12 мая традыцыйна святкуецца Міжнародны дзень медыцынскай сястры (Сусветны дзень медсёстраў).

Медсястра. Міжнародны дзень медыцынскай сястры.

Калі вы звяртаецеся ў паліклінікі, медцэнтры, лечыцеся ў бальніцах і шпіталях, значыць, у вас ёсць знаёмая медсястра, і не адна. Бо ўрач прыйшоў з абходам, магчыма, падышоў яшчэ раз ці два на дзень… А ўсе прадпісанні выконвае менавіта яна – медсястра. Ці медсястрычка, сястрычка, як ласкава называюць многія і зараз.

І ад таго, наколькі яна добрая, душэўная, уважлівая, чалавечная, часцяком залежыць і хуткасць выздараўлення. Лечыць словам – гэта таксама пра медсястру! А яшчэ – стаўленнем. І добрымі рукамі, і спачуваннем сваім…

Асабліва, калі ў прафесіі медсястра – па поклічы сэрца. І калі яшчэ не выгарэла… Калі не зніклі сілы ў барацьбе за людскія жыцці падчас дзвюх хваляў каранавіруса – на трэцяй.

Зрэшты, у чароўных прадстаўніц гэтай прафесіі (і прадстаўнікоў, бо ёсць тут і мужчыны, у чыім дыпломе так і запісана: медсястра, а не медбрат!) маецца цудоўны ўзор для пераймання. Не было б яе – магчыма, не было б і гэтага свята. Вы ўжо здагадаліся, пра каго ідзе размова? Памятаеце яе?!

Медсястра. Флорэнс Найцінгейл.

Так, Флорэнс Найцінгейл, англічанка, якая падчас Крымскай вайны арганізавала першую ў свеце службу сясцёр міласэрнасці. І свята прымеркаванае да дня яе народзінаў (12.05.1820 - 13.08.1910).

Вось хто сапраўды пакінуў яскравы след у гісторыі! І вытокі прафесіі сённяшняй медсястры – менавіта адтуль, з тых часоў. Дарэчы, Флорэнс Найцінгейл, да ўсяго, арганізавала ў Англіі і першыя курсы сясцёр міласэрнасці.

Але вяртаемся з часоў далёкай гісторыі ў нашыя дні. І ў мяне, вядома ж, ёсць знаёмыя медсёстры, пра якіх я хачу сёння ўзгадаць.

Цяперашнюю старшую медыцынскую сястру паліклінікі Чэрвеньскай ЦРБ Лілію Кудзелку я памятаю яшчэ з часу яе працы медсястрой у працэдурным кабінеце. Зараней прашу прабачэння, калі буду называць чыесьці пасады недакладна… Даўно не звярталася ў паліклініку…

Медсястра. Лілія Кудзелка.

Яшчэ і зараз перад вачыма даволі вялікі металічны шпрыц (аднаразовых тады яшчэ не было). І Лілія ўводзіць мне ўнутрывенна глюканат кальцыю, пытаючыся праз кожныя дзесяць секунд: «Не пячэ?!» Рабіла яна гэта па-майстэрску, але… Тыя шпрыцы… І адчуванне гарачыні ад самога ўколу.

Вытрымала, здаецца толькі тры. І адмовілася. Прычым кропкі ад уколаў крыху бачныя і дагэтуль. «Наркаманка!» – смеючыся, тлумачу цікаўным. Хаця… Жартаваць так у наш час даволі небяспечна – могуць паверыць.

Дык вось яшчэ з тых часоў я запомніла прыязнае стаўленне і ласкавую ўсмешку Ліліі. Гэта так прыемна, калі чалавек, бачачы цябе, пачынае шчыра ўсміхацца! Некалькі разоў яна дапамагала мне ў розных справах. І я вельмі за гэта Ліліі ўдзячная!

Для яе сапраўды прафесія медсястры – пакліканне. І наблізілася Лілія Кудзелка да яе ўшчыльную нават… уласным днём народзінаў! Амаль-амаль… 11 мая.

З медыцынскай сястрой афтальмалагічнага кабінета Святланай Мальцавай мы ўжо шмат гадоў жывем у адным пад’ездзе. Разам змагаемся за аказанне нам камунальных паслуг у поўнай меры. Праўда, даволі беспаспяхова. Штогод ацяпляльны сезон пачынаецца з… «дубака для нашага стаяка». І з «галівуду» з гарачай вадой. Эх… Затое з цёзкай мы стасуемся рэгулярна!

Медсястра. Святлана Мальцава.

На працы ж Святлана вельмі ўважлівая, адказная, часцей нават строгая. І пры ўсім гэтым – душэўная. Таксама шмат разоў дапамагала ў розных просьбах. Света, дзякуй за прыязнае стаўленне! З табой прыемна і стасавацца, і мець справу!

Крыху больш за год таму з сумнай нагоды давялося блізка пазнаёміцца з медсястрой хірургічнага кабінета Надзеяй Чыстай. Які ж гэта душэўны чалавек! Якога вялікага сэрца!

Надзя, Надзенька, дзякуй Вам, што былі побач з маёй мамачкай і са мной. Я не ведаю, як бы ўсё вытрымала б, калі б не Вы. Не лічачыся з уласным часам, з тым, што дома чакаюць муж і дзеці, Вы прыбягалі да нас і ранкамі, і вечарамі. З Вамі было больш спакойна, наколькі гэта магло быць у нашай гаротнай сітуацыі.

Вы нават не забываліся пацікавіцца, як сябе адчуваю я, ці сплю хаця б крыху, што ў мяне з сэрцам… Прыносілі свае таблеткі… Вы так клапаціліся пра мамачку, так падтрымлівалі мяне! Усяго жыцця не хопіць, каб Вам аддзячыць…

Медсястра. Надзея Чыстая з сям'ёй.

Усім медсёстрам – нашае шанаванне, удзячныя словы і нізкі паклон! Няхай вам шчасціць па жыцці, моцным будзе здароўе, удалымі – дні, трывалым – дабрабыт. Сіл вам і мужнасці ў складаных сітуацыях. Але няхай іх у вас будзе як мага меней…

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 40

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.