22 Снежня
22.12.2019

«На Ганкі сядайце на санкі!», альбо Няхай жыве святло! :)

logo
Думкі ўслых
290 045
Памер шрыфта:
  • A
  • A
  • A
Не ведаю, сядзем мы на тыя санкі ды лядзянкі гэтаю зімой ці не, а вось што само свята цікавае, дык гэта дакладна. Такім чынам, сёння, 22 снежня, – Ганны, Ганкі, Ганна Зімняя, альбо (увага!!!) Ганна Цёмная! 🙂 Усіх Ганнаў – з імянінамі!
Ганна Цёмная. 22 снежня.

А чаму Ганна Цёмная?! Ды таму, што адзначаецца ў самы кароткі дзень у годзе, з якога надыходзяць самыя цёмныя ночы. А ў чым яшчэ цікавасць?! Ды 22 снежня адзначаецца Дзень энергетыка! Так што ўсіх, хто мае да яго дачынненне, – з прафесійным святам!

І як тут ні прыгадаць верш паэта Уладзіміра Пецюкевіча, з якім не раз сустракалася асабіста і пра якога распавядала?! Гэта і яго свята, бо ў свой час Уладзімір Генрыхавіч браў непасрэдны ўдзел у электрыфікацыі нашай краіны! Во дзе рамантыка!

Ганна Цёмная. Дзень энергетыка.

Электрастанцыі – сонцы зямныя,

Электралініі – промні святла.

Будзь прамяністай навекі, Айчына,

Болей не вернецца цемра-імгла!

Хай нам нялёгка сягоння жывецца,

Цешыць святло, што ў дамы падаём,

Свецяцца вокны, як нашыя сэрцы, –

Мора агню, дзе ні глянеш, кругом!

Болей не вернуцца страхі начныя

З дымнай лучынай далёкіх вякоў.

Людзі, прыміце агні залатыя:

Ласку сардэчную – нашу любоў!

Па праўдзе, гэтае свята ўзнікла яшчэ ў часы СССР. І не мела адносінаў да самага кароткага дня ў годзе. А прымеркаванае было выключна да… зацвярджэння плана (па-руску, каб было пазнавальна) ГОЭЛРО. У Беларусі афіцыйна замацаванае за гэтым днём у 1995 годзе.

Ганна Цёмная. Дзень энергетыка.

У праваслаўных 22 снежня ўшаноўваюць памяць праведнай Ганны, маці Багародзіцы. Ну, а ў народзе, як кажуць, свая Ганна. На якую назіралі за надвор’ем і меркавалі па ім… пра будучае лета! Так-так! Не паспелі мы яшчэ адсвяткаваць Новы год і Каляды, як пра лета ўжо задумваемся! 🙂 А нашы продкі меркавалі: «Па зіме і лета». Маючы на ўвазе надвор’е праз паўгода, 22 чэрвеня.

А адкуль санкі ўзяліся? Ды проста на Варвару (17 снежня) ці на Міколу (19 снежня) часам селянін не ведаў яшчэ, на чым ездзіць – на санях ці калёсах, бо на дарозе была то гразь, то снег… А вось 22 снежня даўней (ужо нават не верыцца!) звычайна ўсталёўваўся трывалы санны шлях.

Звычайна да Ганны звяртаюцца тыя жанчыны, якія не могуць зацяжараць. А цяжарныя 22 снежня даўней стараліся нават з дому не выходзіць і не рабіць ніякай працы. Прыкмета такая. Для іх дзень лічыўся самым небяспечным у годзе.

Ганна Цёмная. Цяжарная моліцца..

Па іншай жа прыкмеце, калі ў гэты дзень вялікія сумёты і шэрань на дрэвах, дык наступны год будзе ўраджайным. Эх! Зноўку снежань усё пераблытаў! Напрыклад, у нас у Чэрвені шэрань была… Толькі 20 снежня. Зрэшты, яшчэ ж не вечар?! 🙂

А вось цікавая прыкмета на Новы год! Калі на Ганну сонейка, дык і 31 снежня дзень будзе ясным. Ну, галоўнае, каб не дажджлівым! А сонейка было б неблагім бонусам! Калі раптам мы ўжо нічога не дачакаемся на Новы год: ні снегу, ні шэрані…

Ганна Цёмная. Набліжэнне Новага года.

Нашы продкі менавіта з 22 снежня, з дня, за якім ідуць цёмныя ночы, асцерагаліся без патрэбы выходзіць у вечаровы ды начны час з дому, асабліва па адным. Бо лічылася, што ваўкі пачынаюць хадзіць статкамі. І ў вёсках, асабліва аддаленых, гэта вельмі небяспечная справа – выходзіць нават у двор у цёмны час сутак… Так што беражыце сябе, сябры!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

290 0 45

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.