2 Жніўня
02.08.2020

«На Iллю да абеду – лета, а пасля абеду – восень»…

logo
Думкі ўслых
338 0 62
Памер шрыфта:
  • A
  • A
  • A
І як жа не паверыць у гэтую народную прыкмету, калі надвор’е нам у чарговы раз… такую дулю круціць?! Маўляў, вось вам, а не гарачыня ці хаця б цяплынь… І ветру вам, і дажджу, і… Лета-а-а-а-а, дзе ты?! А зараз сапраўды жнівень? А перад гэтым быў ліпень? Ды штосьці не верыцца. Зрэшты, а чаму дзівіцца-то?! Роўна год таму я пісала пра дакладна такое ж надвор’е… Да Іллі і на Іллю… Эх! 🙁
Іллін дзень. Абяцанне дажджу.

Самае вядомае выслоўе на сёння – «Прыйшоў Ілля, нарабіў гнілля». Памятаеце?! Нашыя продкі верылі, што ад 2 жніўня ўжо нельга купацца. А вось чаму? Бо чэрці, якія хаваюцца ў вадзе ад стрэлаў прарока Іллі, могуць уцягнуць на дно. Альбо проста можна прастыць і захварэць. А то і патануць…

Думаю, па нашым сённяшнім надвор’і з тэмпературай паветра +19-21, магчымым дажджом, а галоўнае – паўночным ветрам (!) ахвотных пакупацца і не будзе. Хіба толькі маржы ды паслядоўнікі Парфірыя Іванова…

А вось дождж на Іллю, наадварот, лічыцца гаючым. Ім мыюцца ад благога вока ды розных хваробаў. Хаця, зноў-такі, па абяцаным надвор’і і гэта – невялікая радасць. Трэба быць добра загартаваным… Але ёсць, ёсць такая прыкмета… Як і іншая: калі на Іллю дождж, значыць, на наступны год чакаецца добры ўраджай жыта.

Іллін дзень. Мыемся дажджавой вадой.

І зноўку добрае супадзенне, што Іллін дзень выпадае на нядзелю. Можна дазволіць сабе не працаваць. Хаця б – цяжка. Бо ад дробнай працы ўсё роўна нікуды не падзецца. Але нашыя продкі верылі: калі не адпачываць, а працаваць у полі, Ілля можа пакрыўдзіцца і кінуць маланку ў хату ці хлеў, пабіць градам пасевы альбо наслаць засуху.

Бо «Прарок Ілля лета канчае, жыта (іржышча) зажынае», «Да Ілліна дня хоць пугай лясні, ды забарануй». А ведаеце, як даўней сяляне намагаліся зрабіць усё ў тэрмін?!

Што ж тычыцца прыкметаў… Ой, нам, калі ласка, засуху! 🙂 Бо сёлетнія дажджы, якія так шмат шкоды нарабілі, – гэта штосьці! Да таго ж, у кагосьці яшчэ – жніво, у кагосьці – чарговы ўкос траў… Хаця апошні да Іллі даўней трэба было скончыць. А хтосьці і на агародніну мае добрыя спадзевы…

Іллін дзень. Спадзевы на добры ўраджай.

А яшчэ сёння прыслухоўваемся да грымотаў. Вось дзе спатрэбіцца музычны слых… 🙂 «Глухі гром – да ціхага дажджу, гром гулкі – да ліўня», «Гром бесперапынны – будзе град», «Гром грукоча доўга і не рэзка – да непагадзі, калі жа адрывіста і недоўгачасова – будзе ясна».

А вось гэтая прыкмета мне да душы: «Пасля Ілліна дня камары перастаюць кусацца». Бо наперадзе, трэба думаць, яшчэ і збор як не буякоў, дык журавінаў. А можа, і грыбоў. Мне вось толькі цікава: а ці ведаюць самі камары пра такую прыкмету?! 🙂

«Ілля зажынае, лета канчае; першы сноп – першае восеньскае свята», – казалі ў народзе. І як год таму, скажу яшчэ раз: вось табе і маеш. Нармалёвага лета ізноў не было, а нам пра восень ужо… 🙁 І ночы цямнеюць ды халаднеюць… «За Ілліну ноч конь наядаецца, а мужык высыпаецца», «З Іллі-працаўніка дзве ўгоды: ноч доўгая ды вада халодная», «Пасля Ілліна дня ў поле сівага каня не ўбачыш – вось да чаго цёмныя ночы». Хаця даўней тут жа спяшаліся дадаць, што лета са спякотай яшчэ доўга прастаіць. Ну, пабачым. Зрэшты, сіноптыкі абяцаюць нам жнівень, блізкі да нормы…

Іллін дзень. Пачынаюцца цёмныя ночы.

А пакуль… Сёння не робім нічога з таго, што можа ўзлаваць Іллю. Проста адпачываем. Па магчымасці. 🙂 Усім – выдатнага дня!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

338 0 62

Рэдактар беларускай версіі сайта, журналіст, блогер
Наверх