04.10.2020
04.10.2020

«На Пранцішка зярнят шукае ў полі мышка». А ўсіх настаўнікаў – са святам!

logo
Думкі ўслых
0 034
Памер шрыфта:
  • A
  • A
  • A

Сёння зноўку шмат падзей, якія можна адзначыць ці адсвяткаваць – каму як больш падабаецца! 🙂 У беларускім календары – Пранцішак (Францішак), Кандрат ды Іпат. Таксама 4 кастрычніка – Сусветны дзень жывёлаў (цікава, а мышка да іх адносіцца?! 🙂 ). І, вядома ж, у першую нядзелю кастрычніка традыцыйна адзначаецца Дзень настаўніка.

Пранцішак. Мышка палявая шукае зярнятак.

Вельмі мне спадабалася гэтае, зрымфаванае, вычытанае на прасторах сеціва: «На Пранцішка зярнят шукае ў полі мышка». Пяшчотнае такое… І адразу ж прыгадаліся мышкі-палёўкі, якіх звычайна процьму бачылі пра паездцы «на бульбу» ў школьныя яшчэ гады.

Яны так шустра ўцякалі з-пад кучаў бульбоўніку ці лаўжоў! Але нашы хлопцы ўсё роўна ўхітраліся іх лавіць, а пасля падкідваць нам, дзяўчатам, у вёдры…

Так і ўяўляю сабе прыгожанькую шэранькую істоту з цікаўнымі вочкамі на іржышчы ў пошуках зярнятак. Такая народная мудрасць узнікла нездарма, бо да 4 кастрычніка ўжо звычайна ўсе збожжавыя прыбраныя з поля.

Пранцішак. 4 кастрычніка. На Пранцішка зярнят шукае ў полі мышка.

Больш за тое! На Кандрата ды Іпата, чый дзень таксама сёння, пачыналі ўжо малаціць звезенае ў гаспадарчыя пабудовы. Калі яно высахла ўжо, вядома ж. А інакш рознымі спосабамі напачатку збожжа ў каласах-снапах падсушвалі.

Дзень лічыўся ў нашых продкаў спрыяльным для працы на зямлі. Яны казалі: «Не прысядзеш без справы на Кандрата ды Іпата – будзеш багатым». Праўда, існавала і іншае меркаванне, згодна з якім сяляне не дужа-то спяшаліся ўшанаваць святых: «Кандрат з Іпатам дапамагаюць багацець багатым».

Але, як вядома, лепей працаваць, чым не працаваць. Толькі пра адпачынак таксама не варта забывацца. І гэта ўжо не да старажытнасці адносіцца, а да нашага часу.

А ў Сусветны дзень жывёлаў варта прыгадаць аб праблемах, якія ў першую чаргу датычацца жывёлаў бадзяжных, безнаглядных. І пра тое, як хутка ў гэтую катэгорыю пераходзяць яшчэ ўчора любімыя коцікі ды сабачкі, па розных прычынах. І як тут ні прыгадаць вядомае ад Антуана дэ Сент-Экзюперы: «Мы ў адказе за тых, каго прыручылі».

Пранцішак. Сусветны дзень жывёлаў. 4 кастрычніка.

Ну, і, у рэшце рэшт, можна паспрабаваць паставіць сябе на месца… хатняга гадаванца, які раптам перастаў падпарадкоўвацца, робіць шкоду, на яго з’явілася алергія, проста разлюбілі і г.д. А вы хацелі б раптам апынуцца на вуліцы?! Без жылля, харчавання і здольнасцяў да здабыцця апошняга?!

І як добра, што ёсць неабыякавыя людзі, якія клапоцяцца пра кінутых жывёлаў, літаральна ратуюць іх ад голаду і холаду. І тут зноўку хочацца прыгадаць пра дзвюх знаёмых жанчын. Першая – наша суседка па пад’ездзе, Галіна Рыгораўна, колішняя настаўніца (!), якая ўжо шмат гадоў корміць ля падвала коцікаў, котак і кацянятак. Другая – бібліятэкар Чэрвеньскай цэнтральнай раённай бібліятэкі Святлана Калтовіч.

Пра яе я пісала яшчэ больш за тры гады таму, калі даведалася, што яна ў сваёй гаспадарчай пабудове корміць шмат хвастатых мурлыкаў, якія там і жывуць, разам з курамі ды куранятамі. І не проста рэшткамі ежы, а купляе ім харчаванне. А пры неабходнасці яшчэ і лечыць. Бо шкадуе найперш бязродных, кінутых, хворых, няшчасных…

Пранцішак. Сусветны дзень жывёлаў. Святлана Калтовіч.

І муж яе ў тым клопаце падтрымлівае. А каты, коткі ды кацяняты настолькі ўдзячныя! Здалёк пазнаюць яе машыну, сустракаюць… Вы спытаецеся: а навошта ёй гэта?! Проста такая вось дабрыня і патрэба душы…

І мы плаўна пераходзім да тых, каго дабрыня і патрэба душы прыводзіць у настаўніцкую прафесію. Да тых сапраўдных Настаўнікаў з вялікай літары, якіях памятаюць праз гады і дзесяцігоддзі, прыгадваюць добрым словам, нават калі іх ужо няма на гэтым свеце.

Вядома ж, і ў гэтай прафесіі, як і ў іншых, людзі сустракаюцца розныя, і гэта прызнаны факт. Зразумела і тое, як змянілася стаўленне да педагогаў у навакольных з часоў настаўніцтва Якуба Коласа на Ігуменшчыне.

Але я вельмі рада, што вучылася ў свой час у сапраўдных педагогаў. Першыя два гады ў Кліноцкай СШ Чэрвеньскага раёна, да 8-га класа ўключна – у СШ №2 г.Чэрвеня, затым у Магілёўскім педагагічным вучылішчы (на здымку), Беларускім дзяржаўным педагагічным універсітэце імя М.Танка…

І што мне было з каго браць прыклад у выбары першай прафесіі – са сваіх любімых мамы і таты, якіх я (і не толькі я!) лічыла і лічу сапраўднымі Настаўнікамі. І што сярод маіх знаёмых і зараз ёсць такія – у розных куточках Беларусі.

Сёлета ўпершыню асабіста для нас гэта не свята… Прабачце, што я зноў пра сумнае… Упершыню я не магу павіншаваць маю мілую любімую мамачку. Яна раптоўна пайшла ад нас у красавіку. Рана… Так рана!!! І кветкі цяпер – толькі на могілкі. А маёй душы плакаць па ёй да заканчэння ўласнага зямнога жыцця штохвілінна...

Мая мамачка была такой сапраўднай! Яе любілі ўсе. І памятаюць нават вучні, якія заканчвалі даўным-даўно Кліноцкую школу Чэрвеньскага раёна, дзе настаўнічалі адразу пасля заканчэння філалагічнага факультэта БДУ мае бацькі.

З прафесійным святам усіх, хто святкуе яго сёння! Віншуем тых, хто не здраджвае сабе, свайму поклічу сэрца, уласным перакананням. Вам – самыя светлыя і добрыя пажаданні здароўя, шчасця, дабрабыту, мужнасці, цярпення, кахання і любові, павагі і шанавання. І памятайце, сябры: настаўнікі былымі не бываюць…

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 34

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.