15 Сакавіка
15.03.2019

Напішыце мне ліст… Папяровы

logo
Думкі ўслых
110 0 33
Памер шрыфта:
  • A
  • A
  • A
Па шчырасці, сумую па тых часах, калі пошта была не электроннай. Калі з нецярплівасцю бегла да паштовай скрынкі, каб дастаць з яе… адразу некалькі канвертаў, адрасаваных мне. І якая гэта была радасць – бачыць іх, трымаць у руках!

Так, зараз усё значна лягчэй, прасцей, у тысячу разоў хутчэй. Прабегся пальцамі па клавіятуры, шчоўк-шчоўк мышкай – і літаральна праз некалькі хвілін чакай адказ ад далёкага сябра за тысячы кіламетраў! Яшчэ гадоў 20 таму мы пра такое не маглі і марыць.

Але зараз, з цягам часу, прывыкшы да новых тэхналогій, ужо не дзівімся шырокім магчымасцям у стасунках. Толькі, на жаль, ніякі смайлік не заменіць жывых чалавечых эмоцый. Як набраны тэкст не заменіць напісаны ад рукі, у якім – і сэрца, і душа, і пачуцці…

А яшчэ ў кожным напісаным радку… здароўе! Так-так! Вучоныя ўжо даўно распавялі пра тое, што пісаць ад рукі карысна для чалавека. А многія ж пісьменнікі і журналісты, калі пішуць штосьці аб’ёмнае, вартае і душэўнае, да гэтага часу больш давяраюць ручцы ды паперы, чым клавіятуры ды манітору.

Памятаю, як гадоў 15 таму падчас дыстанцыйнай вучобы ў Еўрапейскай школе карэспандэнцкага навучання сярод іншага знаёмілася з азамі шведскай журналістыкі. Звярталася да яе і не так даўно, гадоў з пяць таму. І вельмі ўзрадавалася, калі сустрэла меркаванне вядомага, прызнанага ва ўсім свеце журналіста.

Ён казаў, што і зараз здымае тэкст з дыктафона на паперу. І на ёй жа піша свае творы. У мяне такая ж прывычка! Толькі калі пішаш штосьці інфармацыйнае і трэба зрабіць гэта хутка, тады бярэш ноутбук. А для душы – так, давяраеш толькі паперы. І нават не ведаю, што гэта: прывычка ці прадчуванне якойсьці магіі. Калі рука, здаецца, піша сама!

А ў гэты час… У гэты час мы лепей запамінаем інфармацыю, што вельмі карысна для мозгу. Ён больш уважліва ставіцца да таго, што мы пішам, чым калі націскаем аднастайнымі рухамі клавішы і… таксама ж «пішам». Яшчэ гэтым няхітрым дзеяннем паляпшаем сваё маўленне. Асабліва важна для школьнікаў і студэнтаў! Вось чаму запісванне лекцый, як кажуць, рукамі, а не на тэлефон з дыктафонам дазваляе засвойваць нядрэнны працэнт пачутага з першага разу.

Калі пішаш на паперы, дык засяроджваешся менавіта на гэтым дзеянні. А што камп’ютар ці ноутбук? Колькі ўкладак звычайна ў нас адчынена адначасова?! І як часта мы адрываемся ад напісання матэрыялу, курсавой ці чаго іншага, каб праверыць пошту ды адгукнуцца на паведамленні ў сацыяльных сетках. А ў выніку што? Час праляцеў, праца не зроблена. І ні намёку на тое, што прыемна правёў час з сябрамі. Віртуальна, вядома ж.

Калі вы пішаце ад рукі, а яшчэ лепей – выплёхваеце на паперу свае пачуцці, у тым ліку і негатыўныя, дык тым самым… здымаеце стрэс! Ну, а пра тое, што мозг трэніруецца, і гаварыць не выпадае. Гэта і так відавочна. Да таго ж, пры такой трэніроўцы ён даўжэй застаецца маладым.

А вы любілі пісаць папяровыя лісты ў той час, калі не было электроннай пошты?! Я дык вельмі! І так атрымлівалася, што нават больш любіла адказваць на лісты. У мяне яны заўсёды былі падрабязнымі. Часта нават даводзілася даклейваць маркі на аб’ёмныя пузатыя канверты.

А паштоўкі да ўсіх святаў ад родзічаў, сяброў, знаёмых?! Якая была радасць – даставаць з паштовай скрынкі іх цэлымі пачкамі! Зразумела, і самі адпраўлялі іншым не менш. У дзяцінстве тыя паштоўкі доўга захоўваліся, бо на іх былі такія заваблівыя карцінкі! У свой час я нават збірала малюнкі з канвертаў, сярод якіх трапляліся і вельмі рэдкія.

А цяпер ужо і не прыгадаю, калі апошні раз пісала камусьці папяровы ліст. «Ты яшчэ пра паштовых галубоў успомні!» – пакпіў з мяне сябар, з якім падзялілася думкамі. А чаму б і не прыгадаць тых вестуноў? Паведамленні ж, прывязаныя да іх лапак, таксама пісаліся ад рукі…

А ўвогуле… Чаму б і не сумяшчаць электронныя лісты з папяровымі?! Ужываюцца ж папяровыя версіі газет і часопісаў з іх электроннымі варыянтамі. Як і кнігі… Як кажуць, кожнаму – сваё…

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

110 0 33

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.