1 студзеня
01.01.2020

Напланаваць альбо… наваражыць?! З Новым годам, сябры!

logo
Думкі ўслых
312 0 40
Памер шрыфта:
  • A
  • A
  • A

Добрага ранку! А можа дня… Ці вечара… Прывітанне ўсім, хто чытае гэтыя радкі – незалежна ад часу сутак. З Новым годам, шаноўныя сябры! Ну вось мы і сустрэліся – першы раз у 2020-ым.

Новы год. Першы ранак.

А ці паспелі вы заўважыць тое кароткае імгненне, калі год стары перадае эстафету новаму?!  Альбо, занятыя напісаннем таемных жаданняў ды падлікаў колькасці удараў гадзінніка – раз! – і пераадолелі гэтую нябачную мяжу, нават не паспеўшы здзівіцца-захапіцца?

А як цікава было б паглядзець на яе ўвачавідкі, праўда?! На тую рысу, дзе год 2019-ы і 2020-ы паціснулі адзін аднаму руку… Год стары перадаў новаму сімвал улады – і пайшоў сабе кудысьці. Упрочкі. А новы, азнаёміўшыся з доўгім спісам спраў, завярнуў рукавы свайго пушыстага футра (дублёнкі?! :)), пацёр далоні ды пачаў іх ажыццяўляць.

Вось бы нам усім такую гатоўнасць да актыўных дзеянняў! Адразу ж, з першага дня новага года! Ну, хаця б з другога… Ну добра-добра, не трэба ў мяне цаляць скуркамі ад мандарынаў! J З трэцяга чысла – з першага працоўнага дня (у большасці з нас).

А пакуль… Пакуль яшчэ можна расслабляцца і прыемна бавіць час. Альбо адпачываючы ў адзіноце ад шумнага застолля, альбо прымаючы гасцей (у многіх жа сёння – дзень народзінаў! Шчыра віншуем імяніннікаў!), альбо (ёсць жа і такія актыўныя людзі!) бавячы час з дзецьмі на свежым паветры за зімовымі забавамі.

Новы год. Актыўны адпачынак.

Ну, а хтосьці, мабыць, ужо будуе планы на 2020-ы год (эх, пазбавіцца б найперш ад перфекцыянізму ў годзе новым! Хто са мной?! :)). І вось тут адзін з цікавых момантаў. Бы пачынаючы жыццё наноў, звычайна ў навагоднюю ноч мы загадваем шмат усяго добрага – для сябе, блізкіх і не толькі.

І звяртаемся да… Новага года? Дзеда Мароза? Якойсьці вышэйшай сілы? Сусвету? Уласнага лёсу? Ды кожны – па-рознаму. І такім чынам мы бы спяшаемся наваражыць сабе шмат прыемнасцяў на новы год.

Але хтосьці сапраўды спадзяецца толькі сам на сябе, разлічвае на ўласныя сілы. І таму лічыць больш надзейным заняцца планаваннем. А вам, сябры, што больш даспадобы: наваражыць ці напланаваць?! У мяне, мабыць, 50х50.

Новы год. Планаванне.

Эх, а як жа прыемна будаваць планы, ведаючы, што для іх ажыццяўлення ў цябе – цэлы год! І так радасна даваць сабе абяцанні, што нарэшце мы пачынаем новае жыццё! З ранішняй зарадкай, доўгімі прагулкамі па вечарах і ў выхадныя, з заняткамі актыўным відам спорту, турботамі пра здароўе – сваё і блізкіх… Бо для гэтага ёсць цудоўная нагода – новы год да нас ужо завітаў! А без нагоды – яно быццам бы няўлоўна не тое…

І так шчыра верыцца, што мы ўсё зможам, і спраўдзім, і застанемся задаволенымі сабой. І сіл, здаецца, дадалося ўжо, бы Сусвет нас чуе і дапамагае. А можа – Новы год? Ці Дзед Мароз? Ці якаясьці вышэйшая сіла? Уласны лёс? Зрэшты, не мае значэння, хто ці што з іх. Мы ў сябе зноўку ВЕРЫМ! І гэта – галоўнае!

Новы год. Вера ў сябе.

Ну, а наперадзе ў нас не адны працоўныя дні. Навагоднія святы яшчэ толькі-толькі распачаліся. І нас чакае светлае свята Ражства, вясёлыя Каляды… Выхадныя… Стары Новы год, у рэшце рэшт!

І зноўку будзе аліўе і селядзец пад футрам, бутэрброды з ікрой і мандарыны… Ёлкі, феерверкі, радасць, весялосць…

Прыемных святкаванняў, сябры! Настрою выдатнага, пабольш цікавостак, сюпрызаў, зноўку – падарункаў, віншаванняў і добрых пажаданняў. Няхай усё спраўджваецца!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

312 0 40

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.