Скаргі на жывот – адна з самых распаўсюджаных прычын нядужання дзяцей з ранняга ўзросту. Жывоцік перыядычна мучыць і немаўлятак, і школьнікаў, і дарослых. Прычын таго мноства: ад банальнай нястраўнасці да віруснай інфекцыі. Але адна справа – востры жывот, калі сімптомы відавочныя.
Зусім іншая – схаваныя хваробы страўнікава-кішэчнага тракта (СКТ). Часцяком яны даюць пра сябе ведаць не адкрыта, а таму доўгі час могуць заставацца па-за ўвагай. Але менавіта час у гэтым выпадку з'яўляецца вырашальным, асабліва калі гаворка ідзе пра дзяцей.
З-за паталогій органаў СКТ дае збой сістэма стрававання, парушаецца працэс засваення пажыўных рэчываў, іх недаатрымліваюць усе органы і тканкі. Для растучага арганізма гэта пагражае сапраўднай катастрофай, наступствы якой могуць нагадваць пра сябе ўсё астатняе жыццё. Як і чаму маладзее гастрапаталогія, якія сімптомы важна не прапусціць і своечасова звярнуцца па дапамогу да ўрача, журналіст Слушна даведалася ў дацэнта 2-й кафедры дзіцячых хвароб БДМУ, кандыдата медыцынскіх навук Ірыны Савановіч і намесніка галоўнага ўрача па медыцынскай частцы 5-й гарадской дзіцячай паліклінікі г.Мінска Алены Германавай.
Захворванні СКТ у дзяцей
Плюс на мінус
Змяніўся вектар захворвання, канстатуюць эксперты. Выкарыстанне ў дыягнастычных і лячэбных мэтах сучасных метадаў візуалізацыі (эзафагагастрадуадэнаскапіі, фібракаланаскапіі, капсульнай эндаскапіі) дазволіла з новых пазіцый перагледзець структуру захворванняў органаў СКТ у дзяцей. Калі раней лічылася, што асноўная крыніца праблем хваробы жоўцепратокаў (напрыклад, распаўсюджаная раней дыскінезія жоўцевыводзячых шляхоў), дык зараз гэта, хутчэй, дыягназ-выключэнне. Затое ўсё больш месца займаюць паталогіі, якія не лічыліся традыцыйнымі для педыятрыі.
Захоўваецца высокі ўзровень паталогій, крыніцай якіх служыць Хелікабактар пілоры. Што горш – расце рэзістэнтнасць бактэрыі да праводзімай тэрапіі, абумоўленая, перш за ўсё, некантралюемым і неапраўданым прыёмам антыбіётыкаў.
Асаблівы акцэнт трэба зрабіць на высокай спалучанасці паражэнняў органаў СКТ у дзяцей. Паняцце «камарбіднасці» (спалучэнне адразу некалькіх захворванняў), не ўласцівае раней дзіцячай гастраэнтэралогіі, сёння ўжываецца, на жаль, усё часцей.
Па дадзеных зваротаў у Рэспубліканскі дзіцячы цэнтр цэліякіі і гастраэнтэралогіі на базе 3 ГДКБ, колькасць пацыентаў з хваробай Крона і язвавым калітам за 2017 год склала каля 150 чалавек. У маштабах краіны гэта невялікія лічбы. Але трэба разумець, што за імі – цяжкія, інвалідызуючыя захворванні, якія пачынаюцца ў дзіцячым узросце. За гэтымі лічбамі – лёсы канкрэтных дзяцей, якасць жыцця іх саміх і ўсёй сям'і.
Сёння, на жаль, не існуе ні кансерватыўных, ні хірургічных метадаў, якія маглі б цалкам вылечыць запаленчыя захворванні кішэчніка. Таму задача ўрачоў – спыніць прагрэсаванне паталогіі, мінімізаваць хірургічныя ўмяшанні, дасягнуць устойлівай рэмісіі. Задача бацькоў – дазволіць урачам зрабіць гэта своечасова.
Сімптомы захворванняў СКТ у дзяцей
На думку Алены Германавай, падставай для звароту да ўрача павінны служыць:
- парушэнні стулу: стул радзей за 1 раз у суткі ці, наадварот, часты – больш за 4 разы ў суткі. Яшчэ большую насцярожанасць бацькі павінны праявіць, калі парушэнні адбываюцца на фоне дыскамфорту: уздуцця жывата, зніжэння апетыту, неспакою, сам стул мае спецыфічны непрыемны пах, у ім прысутнічае слізь або кроў;
- тлусты стул;
- непрыемны пах з рота, налёт на языку, адчуванне палення языка, скаргі на скажэнне смаку;
- павышанае газаўтварэнне (метэарызм) – такія дыскамфортныя адчуванні могуць суправаджаць цэлы шэраг сур'ёзных паталогій, аж да кішэчнай непраходнасці, атаніі кішэчніка ды інш.;
- адрыжка.
Акрамя таго, пра непаладкі з боку страўнікава-кішэчнага тракта могуць сведчыць страта вагі без бачных прычын, дысфагія (парушэнне глытання), пачуццё пастаяннай горычы ў роце.
Не ігнаруйце трывожныя званочкі, нават калі яны здараюцца час ад часу і не носяць сістэматычны характар. Хаця б дзеля таго, каб потым не давялося біць у набат.
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by
