25 Кастрычніка
25.10.2019

Няхай жа як мага даўжэй не згасаюць нашы зоркі…

logo
Думкі ўслых
252 093
Памер шрыфта:
  • A
  • A
  • A
А сёння ў нас па народным календары – Андрон Астролаг. І ў традыцыях, зразумела, назіранні за зорным небам. А вы любіце гэтым займацца?! Я дык – вельмі! Яшчэ з дзяцінства. Таму і мае любімыя кадры з папулярнага фільма «Сірата казанская» – як яны на канапе рухаюцца… па зорным небе! 🙂 А мой колішні аднакласнік Алег Навіцкі назіраў-назіраў за зоркамі ды і… паляцеў да іх!

Зоркі здаўна прыцягвалі нашых продкаў сваёй таямнічасцю і загадкавасцю. Думаю, кожны з нас заўважаў няхай сабе і слабае, але відавочнае святло, якое распаўсюджваецца ўночы нават ад неба без зорак і месяца на ім. А ведаеце, што палова свячэння – гэта і ёсць рассеянае святло зорак?! Нават калі іх за хмарамі і не бачна. Астраномы высветлілі…

А вучоныя сцвярджаюць, што неба бачаць яшчэ жывёлы і нават… расліны, толькі ўсе па-рознаму. Даведаўшыся пра гэта, чамусьці адразу прыгадала загадку, змешчаную як загаловак матэрыялу: «Па зямлі ходзіць, а неба не бачыць». І гэта… пра свінню! Бо ў яе, аказваецца такое ўладкаванне мышцаў і пазваночніка, што стоячы – ну ніяк галаву ў неба не задраць! 🙂

Але вяртаемся да Андрона Астранома. Якраз у гэты дзень людзі маліліся, каб зоркі жыцця іх і блізкіх не згасалі, не знікалі з небасхілу. Бо памятаеце?! Лічыцца, што калі запальваецца новая зорка… Гэта не толькі камусьці трэба, а значыць, што чалавек нарадзіўся на Зямлі! А калі знікае… Ну, зразумела.

Але, тым не менш, калі падае зорка мы… што робім?! Правільна, загадваем жаданне! Вы калі-небудзь паспявалі гэта зрабіць?! Я дык не… І як?! Спраўджвалася?!

Наконт памаліцца – можа і не для ўсіх. А вось звярнуцца ў думках да Андрона Астранома, дзе б вы ні знаходзіліся, і папрасіць яго пра тое… Думаю, рэальна. Пры жаданні.

А што датычыцца народных традыцый, абрадаў ды ўяўленняў у гэты дзень… Некаторыя асабіста мне падаюцца… м-м-м-м… надуманымі ці што. Вось, напрыклад, гэтае. Калі на Андрона Астранома пастукалі ў дзверы, нельга пытацца: «Хто там?» Бо, маўляў, у доме паселіцца бяда, а ўсе сямейнікі будуць пакутаваць.

Ну адкуль, адкуль гэта ўзялося?! І што трэба адказваць тады на стук?! А мне адной зараз прыгадаўся паштальён Печкін з вядомага мульціка?! 🙂 Альбо гэтае. Жанчыны стараліся (!!!) 25 кастрычніка не нараджаць, бо лічылася, што дзіця зведае шмат гора ў жыцці.

Можа, ёсць сярод нашых чытачоў сённяшнія імяніннікі? А падзяліцеся, калі ласка, досведам: заўважалі калі такое ці не. Ну і, вядома ж, зацікавіла гэтае: стараліся не нараджаць. І як яны стрымлівалі гэты натуральны працэс?! Ды яшчэ ў даўніну?!

А вось тое, што на Андрона Астранома забаранялася сварыцца, мне падаецца добрай такой традыцыяй. І каб яшчэ не толькі ў гэты дзень – ва ўсе яе ўзяць за звычку! Нашы продкі ў гэты дзень стараліся гучна не смяяцца, не мылі бялізну, не выбівалі пярыны, не варажылі па картах… І, мабыць, у іх на тое мелася пэўнае тлумачэнне?! На ўсялякі выпадак – запамінаем, чаго сёння «НЕ»…

Па даўніх назіраннях, калі ўночы 25 кастрычніка на небе шмат яркіх зорак, дык гэта да хуткага марозу. А калі яны цьмяныя, чакай дажджоў. Калі зоркі падаюць, дык хутка пачнецца вецер. Ой, а як гэта паспець жаданне загадаць?! 🙂

Калі зорак многа, дык у будучым годзе чакаем добрага ўраджаю гароху! І як гэта не забыцца праверыць у будучым сезоне гэтую прыкмету?! Бо мы гарох на сваім дачным участку вырошчваем! І наша яшчэ савецкае «Аліўе» – гэта ж класіка ў святы!

А цяпер яшчэ – і ў будні. Бо гарох ужо нават не закручваем у слоікі, а змяшчаем у лядоўню. І салата атрымліваецца з новым прачытаннем, асабліва, калі з мяснога дадаць туды адварную курыцу. А ў сезон гародніны – свежы агурок!

…Цямнее зараз усё раней і раней. Так што ў кожнага з нас сёння ўвечары ёсць шанц падзівіцца на зорнае неба. Калі, вядома, яно не будзе зацягнутае хмарамі.

Фота з архіву Алега Навіцкага і адкрытых інтэрнэт-крыніц.

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

252 0 93

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.