10.07.2019
10.07.2019

Ой, цвіце… цыкорый! Замяняем каву!:)

logo
Карысныя прадукты
88 0 51
Памер шрыфта:
  • A
  • A
  • A

Яшчэ гадоў з 10-15 таму звярнула ўвагу на прыгожыя блакітныя кветачкі на кусціках, якія трапляліся на вочы паўсюдна: ля нашай шматпавярхоўкі ў Чэрвені, узбоч шляху на дачу, у вёсках раёна… Чымсьці нагадвалі яны здалёк валошкі. І якім жа было маё здзіўленне, калі даведалася, што гэта… цыкорый. Як?! Той самы цыкорый, з каранёў якога гатуюць напой, што з поспехам замяняе каву?! І ён расце ў нас, у крокавай дасягальнасці?!

Аказалася, што так. Праўда, ні разу карыснай сыравіны з яго асабіста мы, аматары лекавых раслін, не нарыхтоўвалі. Нават не магу патлумачыць, чаму. Вось заўсёды, калі размова ідзе пра карэнне, мне раслін дужа шкада. Такая прыгажосць – і вырваць цалкам?! Гэтак жа не разумею і нарыхтоўку, скажам, кары з дрэў. Ну хіба ж можна ашкурыць той жа дуб?! У што ператворыцца дрэва?!

Але цыкорый ужо настолькі распаўсюдзіўся, што ўсё часцей і часцей задумваюся пра яго нарыхтоўку. Вось нават учора па абедзе, гуляючы ў мікрараёне Каменнай Горкі, бачыла заваблівыя кусцікі. А ўвагу менавіта зараз звярнула на яго недарэмна. Бо, па народных назіраннях, масавае цвіценне цыкорыю пачынаецца з Пятрова дня (12 ліпеня).

А вы чулі, што, па легендзе, апостал Пётр, не маючы пугі, сарваў сцябліну з гэтай расліны і ёй паганяў авечак?! Таму адна з назваў  цыкорыю  – пятроў бізун. З цікавасцю прачытала неяк, што ў Элізы Ажэшкі ён праходзіць як  «дзеравянка» і «чаразплячнік». А ў Зоські Верас і ўвогуле – «падарожнік». Маецца на ўвазе – расце пры дарозе, а не той падарожнік, які па-беларуску – «трыпутнік».

Цыкорый замест кавы

Той, хто ўжывае цыкорый замест кавы, мабыць, заўважыў змены ва ўласным самаадчуванні. А калі не, дык час, як кажуць, даведацца, задумацца і… насамрэч зрабіць сябе здаравейшым.

Вядома ж, самае галоўнае, для чаго людзі замяняюць каву цыкорыем, – гэта адсутнасць у ім кафеіну. І, у адрозненне ад кавы, цыкорый зніжае ўзбуджальнасць цэнтральнай нервовай сістэмы, хаця адначасова і бадзёрыць. Таму хочаце добра спаць – піце гэты напой.

Таксама цыкорый выбіраюць і хворыя на цукровы дыябет, бо ў ім утрымліваецца вельмі шмат інуліну. Заўсёды цікавіла: вельмі шмат – гэта колькі?! Дык вось шэраг даследчыкаў сцвярджае, што ў свежанарыхтаваных каранях гэтай расліны яго – 14-20%, а ў высушаных – ужо каля 70%.

А вам, дарэчы, падабаецца цыкорый як напой?! Нават калі не замяняць ім каву цалкам (не магу сабе такога ўявіць – журналіста без кавы!), а ўжываць для разнастайнасці?! Як высветлілася яшчэ некалькі гадоў таму, асабіста мне больш даспадобы не парашок, а цыкорый вадкі, які прадаецца ў невялікіх слоічках.

Сярод шматлікіх лекавых уласцівасцяў цыкорыю – нармалізацыя абмену рэчываў, вывядзенне з арганізма шлакаў і таксінаў, павышэнне апетыту, гемаглабіну і імунітэту, паляпшэнне работы кішэчніка, ачышчэнне сасудаў, пазбаўленне ад стомы, умацаванне касцей… Праўда, з асцярогай цыкорый трэба ўжываць людзям з паніжаным ціскам, а таксама з гемароем і варыкозам. Калі ж у вас язва ў стадыі абвастрэння альбо высокая кіслотнасць страўнікавага соку, цыкорый нельга ўжываць увогуле, папярэджваюць спецыялісты.

карані цыкорыя

Для тых, хто захацеў нарыхтаваць карані гэтай расліны самастойна... Давядзецца пачакаць позняй восені, кажуць знаўцы, бо тады ў іх утрымліваецца найбольшая колькасць карысных рэчываў. Так што пачакаем, а пасля абавязкова вернемся да гэтай тэмы. Згода?! Тады ж пагаворым і пра прыгатаванне ды выкарыстанне адвараў ды настояў з кораня цыкорыю.

Між іншым, яго любяць пчолы, бо ў прыгожых блакітных кветачках шмат нектару і пылку. Цікава, а ці ёсць дзе-небудзь мёд... толькі з цыкорыю?! Аказваецца, ёсць, сцвярджае ўсюдыіснае сеціва! Там, дзе спецыяльна вырошчваюць цэлыя плантацыі расліны. Напрыклад, у Арлоўскай, Іванаўскай, Тульскай абласцях Расіі, у Краснадарскім краі... І мае той мёд адпаведны колер – блакітны!

А вы б хацелі пакаштаваць мёд колеру неба?!:)

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

88 0 51

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.