03.01.2020
03.01.2020

Пакапаемся ў снезе, патрасём… лядоўню! :)

logo
Карысныя прадукты
300 045
Памер шрыфта:
  • A
  • A
  • A

Ну што ж, з першым працоўным днём у новым годзе, сябры! Спадзяюся, што ўсе адпачылі, выспаліся, АД’еліся (галоўнае, каб не АБ’еліся…). І з добрым настроем і свежымі сіламі ўзяўшыся за працу, мы думаем… што б такога карыснага яшчэ з’есці, каб нейтралізаваць маянэзныя салаты, мяса і яшчэ шмат чаго не карыснага, затое вельмі смачнага.

Тым больш, што пэўнае ж планаванне хтосьці з нас зрабіў, відаць?! Прама пад ёлачкай…

Лягчэй тым, хто і падчас святкаванняў не прыслухаўся да ўгавораў з’есці яшчэ лыжачку салаты, кавалачак мяска, а харчаваўся выключна гароднінай, фруктамі, нятлустай рыбай, зелянінай…

Яно, вядома ж, добра. Толькі на свежыя гародніну-садавіну-зеляніну ў нашым Чэрвені та-а-а-кія цэны! А выгляд… Ой! Я ўжо не кажу пра смакавыя якасці тых жа свежых (?!) агуркоў і памідораў у студзені. Заўважце, я не пра знешні выгляд і нават не пра карысць – пра смак. Ненатуральны. Альбо практычна поўную яго адсутнасць.

Пятрушка. Зеляніна. Агурок.

Зрэшты, калі вам усё ж пашанцавала набыць да навагодняга стала гародніну не толькі свежую, але і смачную – віншуем! Ну, а ў нас карысным дадатакам сталася пятрушка. Прычым не набытая ў краме, а ў літаральным сэнсе выкапаная з-пад снегу на градцы. А хтосьці, мо, быў такім запаслівым, што намарозіў яе ў лядоўні?! І засталося толькі патрэсці апошнюю і забраць спажыўную зеляніну.

Бо яна – вось дзіва! – па запэўніванні даследчыкаў не губляе сваёй якасці ні пры замарожванні, ні пры сушцы. Усё застаецца на месцы: фоліевая кіслата і кальцый, селен і марганец, жалеза і натрый, вітаміны і селен…

Можна так пажаваць галінкі, можна дадаваць у розныя стравы – свежанарэзаныя і прыгатаваныя. Асабліва раяць ужываць пятрушку тым, хто пастаянна не высыпаецца з-за невялікай колькасці часу на начны адпачынак, церпіць ад разумовых ды фізічных нагрузак.

Пятрушка. Карысць.

Словам, мне, напрыклад, ужо напрыканцы года 2019-га трэба было ператварацца ў траваяднае! 🙂 Эх, пазнавата прачытала… Затое цяпер буду мець на ўвазе. Да таго ж, гэтая зеляніна ўмацоўвае імунітэт.

Між іншым, яе можна ў зімовыя месяцы вырошчваць нават на падваконні! Разам з іншымі відамі. Побач з зялёнай цыбуляй. Даўно збіраюся гэтым заняцца, ды ўсё рукі не даходзяць. А вось калі ў маіх сяброў дачка была маленькай (а зараз гэта паненка ўжо), у яе быў цэлы зялёны агародзік у кватэры ўзімку!

Па сцверджаннях тых жа шматлікіх даследчыкаў, пятрушка валодае мачагонным эфектам, дапамагае зніжаць узровень цукру ў крыві, паляпшае работу сэрца і сасудаў, зрок, апетыт, нармалізуе абмен рэчываў і… Яшчэ шмат-шмат усяго!

Пятрушка.

Пры ўмове, што ў вас няма цыстыту, запаленчых працэсаў у нырках, мочакаменнай хваробы, схільнасці да алергіі… Ва ўсіх гэтых выпадках пятрушку есці нельга! Ні ў свежым выглядзе, ні высушаную, ні замарожаную. На жаль. І калі вы цяжарныя альбо корміце дзіця – таксама.

Вы любіце пятрушку з дзяцінства? Тады вам пашанцавала. Але нават калі і не… Усё магчыма ў гэтым жыцці. У тым ліку і змяненне стаўлення да нелюбімых страў і прадуктаў.

Магу з уласнага вопыту прызнацца, што пятрушку не любіла даволі доўга. Больш за тое! І паху яе не пераносіла. І вось аднойчы мы збіраліся з сяброўкамі-настаўніцамі адсвяткаваць Дзень ведаў. І пакуль з адной з іх схадзілі да мяне па гітару, дзве другія прыгожанька так расклалі парэзаную пятрушку па памідорах. Адкуль яе пасля акуратненька і старанна счысцілі… 🙂

А любоў да пятрушкі прыйшла неяк непрыкметна! І сёння я проста не ўяўляю некаторыя стравы без яе. Ну, а пятрушка ўзімку, хаця б толькі для ўпрыгажэння стала, – гэта ж проста цудоўна! Ці не так?!

Пятрушка. Упрыгажэнне салатаў.

Памятаю, як колькі гадоў таму, калі ўзімку нас яшчэ замятала снегам да Новага года, знаёмая параіла, як на дачы можна адшукаць пятрушку да святочнага стала. Трэба яшчэ з восені накрыць яе вялікай скрынкай! А тады і снег разграбаць асабліва не давядзецца. Хоп – і ўся зялёная купінка перад табою.

Так што калі і вам цяпер захацелася свежай пятрушачкі… Дык гайда альбо ў краму, альбо на градку! Ну, яшчэ можна лядоўню патрэсці. Пры ўмове, што вы пятрушку туды загадзя паклалі. 🙂

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

300 0 45

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.