6 Снежня
06.12.2017

Чаму беларусы не ўсміхаюцца? Частка 2. Кампенсуем недахоп сонца!

logo
Кантралюй здароўе
56 0 23
Памер шрыфта:
  • A
  • A
  • A

Часта ўсміхацца беларусам перашкаджае не толькі наша спецыфічная жыццёвая псіхалогія і біялагічныя асаблівасці (памятаеце пра цэнтр задавальнення з першай часткі нашага матэрыялу?). Яшчэ адной перашкодай для пазітыўнага і роўнага настрою ў нашых мясцінах стаў недахоп сонца.

Паводле звестак Рэспубліканскага гідраметэацэнтра, колькасць ясных дзён у Беларусі – усяго 20-35 за год, пахмурных – ад 175 на паўночным захадзе да 135 на паўднёвым усходзе. Восенню і зімой бываюць такія месяцы, калі мы не бачым сонца па 20 дзён запар!Магчыма, у гэтым хаваецца яшчэ адна загадка «звыкла стомленага беларускага твару».

Як сонца ўплывае на наш настрой?

Сонечнае святло нездарма называюць жыватворным. Яно станоўча ўздзейнічае на ўсе працэсы абмену рэчываў у арганізме, абараняе ад дэпрэсіі і падымае настрой. Звязана гэта з тым, што сонца ўплывае на выпрацоўку сератаніну. У народзе яго называюць «гармонам шчасця».

Пры недахопе сератаніну мы адчуваем:

  • дрымотнасць;
  • млявасць;
  • адсутнасць станоўчых эмоцый;
  • маларухомасць.

Калі сератанін у норме, мы адчуваем:

  • прыліў сіл;
  • паляпшэнне эмацыйнага настрою;
  • жаданне ўвасабляць у жыццё планы і рухацца.

Чаму важна быць «на пазітыве»?

Пра тое, што займацца гігіенай душы важна не толькі для вас асабіста, але і для тых, хто побач з вамі, мы адзначалі ў першай частцы. А вось у чым яшчэ можа быць плюс асабіста для вас, дык гэта ў тым, што супраціўляльнасць арганізма хваробам у аптыміста вышэй.

Так, напрыклад, дацкія навукоўцы апыталі 600 людзей, якія пакутуюць ад ішэмічнай хваробы сэрца (ІХС), з розніцай у 5 гадоў. Аказалася, што аптымісты і пазітыўна настроеныя пацыенты паміралі на 42% радзей у параўнанні з песімістамі. Шмат у чым гэта было звязана з тым, што настроеныя на жыццё і здароўе людзі не апускалі рукі, больш рухаліся і выконвалі пасільныя фізічныя практыкаванні.

Тры эфектыўныя крокі для барацьбы з панурасцю

Крок 1. Больш святла.

Яркае святло стымулюе выпрацоўку сератаніну і тым самым прадухіляе развіццё дэпрэсіі. Штодзённае і доўгае знаходжанне ў офісе можа не выклікаць хандры, калі вы ўключыце ў кабінеце лямпы. Асабліва эфектыўнымі будуць лямпы дзённага святла.

Крок 2. Устаньце з канапы.

Практыкаванні памяншаюць неспакой, дэпрэсію і адчувальнасць да стрэсу. Калі вы праціўнік актыўных фізічных нагрузак, замяніць іх можна звычайнай хадой. Усё што заўгодна, абы не сядзець на месцы! Спачатку вам будзе складана зрушыцца з месца. Але потым вы з задавальненнем адзначыце, што нават невялікі праменад здольны супакоіць і падняць настрой і працаздольнасць.

Крок 3. Папаўняем недахоп вітаміну Д.

Тое, што вітамін Д уплывае на псіхічную сферу чалавека, даказана шматлікімі навуковымі даследаваннямі. Як жа змагацца з яго недахопам? Бо асноўная ўмова для натуральнага ўтварэння гэтага важнага вітаміну – уздзеянне сонечных прамянёў на скуру.

Аляксей Пачкайла
Урач-педыятр, кандыдат медыцынскіх навук, дацэнт кафедры паліклінічнай педыятрыі БелМАПА
Пры ўсім зачараванні і багацці нашага любімага краю, істотная праблема, я б сказаў, нацыянальнага маштабу, – недахоп сонца ў жыцці беларусаў. Гэта значны фактар рызыкі развіцця дэфіцыту найважнейшага з вітамінаў – вітаміна Д, які стварае сапраўды незлічоныя пазітыўныя эфекты ў арганізме чалавека. Больш чым 8-месячны на працягу года недахоп сонечных дзён прыводзіць беларускую папуляцыю да шырокага распаўсюджання гэтага дэфіцыту. Больш за 5 гадоў мы праводзім навуковае даследаванне, якое сведчыць: да 90% беларускіх дзяцей у асенне-зімова-вясновы перыяд года дэманструюць забяспечанасць вітамінам Д ніжэй за аптымальныя значэнні. Такая ж сітуацыя і ў сумежных краінах з падобнымі кліматычнымі ўмовамі.

Дэфіцыт вітаміну Д прыводзіць да больш высокай рызыцы развіцця і больш цяжкага цячэння шэрагу псіхічных захворванняў і расстройстваў, эмацыйных і паводзінскіх парушэнняў у дзяцей і дарослых.

У той жа час дадатковая датацыя вітаміну Д прыводзіць да адваротных пазітыўных уплываў.

Што рабіць?

Аляксей Пачкайла
Урач-педыятр, кандыдат медыцынскіх навук, дацэнт кафедры паліклінічнай педыятрыі БелМАПА
У апошнія гады нам удалося пераламаць сітуацыю і пераканаць нашых калег-урачоў і пацыентаў у тым, што дзіця мае патрэбу ў штучнай датацыі вітаміну Д не толькі ў раннім узросце і не толькі ў сувязі з рызыкай развіцця рахіту. У свеце прыняты шэраг пагаджальных дакументаў, адзіных у адзіным – развіццё дэфіцыту вітаміну Д варта папярэджваць, пацверджаны дэфіцыт – лячыць.

У адпаведнасці з Практычным кіраўніцтвам па паступленні вітаміну Д і лячэнні яго дэфіцыту ў Цэнтральнай Еўропе (2013 г.) устаноўлены рэкамендуемыя нормы спажывання вітаміну Д для розных узроставых груп насельніцтва:

  • дзіця першага паўгоддзя жыцця павінна быць забяспечана 400 МЕ вітаміну Д у суткі,
  • другога паўгоддзя – 400-600 МЕ / сут,
  • ад 1 года да 18 гадоў – 600-1000 МЕ / сут,
  • дарослыя людзі (у тым ліку сталыя людзі) – 800-2000 МЕ / сут.

У кіраўніцтве выдзеленыя асобныя групы (неданошаныя дзеці, людзі з атлусценнем, цяжарныя і лактыруючыя жанчыны, людзі, якія працуюць у начную змену і цемнаскурыя), для якіх устаноўлены асаблівыя нормы забеспячэння вітамінам Д.

Вельмі важна разуменне неабходнасці такой прафілактыкі, своечасовае і шырокае яе правядзенне.

Увага! Дозу вітаміну Д менавіта для вас можа падабраць толькі ўрач. Ёсць асаблівасці прызначэння прэпарату ў залежнасці ад узросту, перанесеных захворванняў і г. д.

Змяніць маркотныя і зласлівыя твары беларусаў цалкам рэальна. Дапамагчы ў гэтым можа не толькі выпрацоўка навыку заўважаць добрае, але і цалкам канкрэтныя рэкамендацыі: не забываць уключаць у памяшканні святло, рухацца, а таксама параіцца з доктарам з нагоды дадатковага прыёму вітаміну Д.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

56 0 23

Журналіст. Член Беларускага саюза журналістаў. Лаўрэат прэміі Беларускага саюза журналістаў.
Глядзіце таксама