3 Снежня
03.12.2018

«Падводныя камяні» душа Шарко: паказанні і супрацьпаказанні

logo
Кантралюй здароўе
96 0 31
Памер шрыфта:
  • A
  • A
  • A

Нягледзячы на тое, што душ Шарко прыемнай працэдурай не назавеш, ён карыстаецца нязменнай папулярнасцю. Маркетолагі ад індустрыі прыгажосці актыўна прасоўваюць паслугу, абяцаючы ашаламляльны амаладжальны эфект і лёгкае пазбаўленне ад лішніх кілаграмаў.

Дзякуючы ўздзеянню на цела водных струменяў, якія падаюцца пад высокім ціскам і з рознай тэмпературай, душ Шарко сапраўды дапамагае «скінуць» узрост і вагу. Ёсць толькі адна ўмова: ён не церпіць легкадумнага стаўлення да сябе. Перш за ўсё гэта лячэбная працэдура, адна з разнавіднасцяў гідратэрапіі. Як любыя «лекі», душ Шарко мае паказанні і супрацьпаказанні да прымянення. Таму самалячэнне вадой можа прынесці не толькі карысць, але і давесці да бальнічнага ложка.

Пра ўсе тонкасці працэдуры душа Шарко інфармацыйнаму парталу Здаровыя людзі распавяла загадчыца аддзялення медыцынскай рэабілітацыі 10-й гарадской клінічнай бальніцы Мінска, рэабілітолаг вышэйшай катэгорыі Ганна Селянінава.

Ударная сіла вады

Душ Шарко можна аднесці да свайго роду масажу. Толькі замест рук масажыста ўздзеянне на цела чалавека аказвае кампактны струмень вады, якая падаецца накіравана пад ціскам 1,5-3 атмасферы. Сілу напору лёгка ацаніць, калі ўявіць, як 1,5-3-кілаграмовая гіра цісне на кожны квадратны сантыметр цела. У душы Шарко водны струмень такой сілы падаецца з адлегласці 3-3,5 метра. Пры гэтым тэмпература вады можа быць рознай: ад цёплай (32-35⁰С) да гарачай (42-45⁰С). Адпаведна, і адчуванні ў працэсе ўзнікаюць розныя. Людзі з высокім парогам адчувальнасці могуць казаць аб працэдуры як аб даволі хваравітым задавальненні. І яны маюць рацыю.

Тым не менш, эфект, які аказвае душ Шарко, варты таго, каб пацярпець.

 
Ганна Селянінава
Загадчыца аддзялення медыцынскай рэабілітацыі 10-й гарадской клінічнай бальніцы Мінска, рэабілітолаг вышэйшай катэгорыі
З прычыны інтэнсіўнай механатэрапіі, абумоўленай ціскам вады, павышаецца тонус мускулатуры, паскараюцца абменныя працэсы, павялічваецца аб'ём рухаў у суставах пры парушэнні іх функцый, актывізуецца цыркуляцыя крыві і лімфы, забяспечваецца лепшае насычэнне органаў і тканак кіслародам – адсюль эфект цудоўнага амаладжэння, прыліву сіл і бадзёрасці.

У комплексным лячэнні курс сеансаў душа Шарко паказаны пры:

  • астэахандрозе пазваночніка;
  • атлусценні;
  • неўрозах. Нягледзячы на тое, што душ Шарко адносіцца да стымулюючых працэдур, у комплекснай тэрапіі ён можа аказваць заспакаяльнае, расслабляльнае дзеянне на нервовую сістэму, дапамагае справіцца з парушэннямі сну і дэпрэсіяй.

Акрамя лячэбнага, душ Шарко аказвае і агульнааздараўленчы эфект, дазваляе ўмацаваць імунітэт, павысіць супраціўляльнасць арганізма да сезонных вірусаў і інфекцый.

Нельга скідаць з рахункаў і касметычны эфект: душ Шарко дапамагае палепшыць стан скуры і цела, напрыклад, пасля родаў або рэзкага пахудання. Гэта адзін з самых дзейсных спосабаў пазбавіцца ад спрадвечнай жаночай праблемы – цэлюліту.

 
Ганна Селянінава
Загадчыца аддзялення медыцынскай рэабілітацыі 10-й гарадской клінічнай бальніцы Мінска, рэабілітолаг вышэйшай катэгорыі
Беручы гэта пад увагу, назваць душ Шарко прэрагатывай выключна людзей, якія пакутуюць на тую ці іншую паталогію, нельга. У агульнааздараўленчых мэтах сеансы струменевага душа і можна, і трэба прымаць умоўна здаровым людзям. Аднак вызначыць мэтазгоднасць, працягласць і перыядычнасць сеансаў перш за ўсё павінен кваліфікаваны фізіятэрапеўт, улічваючы індывідуальныя асаблівасці і стан здароўя кожнага канкрэтнага чалавека. Важнае значэнне мае таксама адукацыя і вопыт працы спецыяліста, які праводзіць працэдуру. Дзякуючы яму дыскамфортныя адчуванні падчас сеансу могуць быць зведзены да мінімуму, а лячэбна-аздараўленчы эфект застанецца тым жа. Таму пажадана спыніць свой выбар на установах медыцынскага профілю.

Душ Шарко: каму нельга

Дасведчаны рэабілітолаг або фізіятэрапеўт пры прызначэнні курсу працэдур абавязкова папярэдзіць пра магчымыя пабочныя эфекты: пачырваненне скуры і з'яўленне нязначных гематом. Па гэтай прычыне недапушчальна ўздзеянне кампактнага струменю на твар, малочныя залозы і палавыя органы.

Але перш за ўсё спецыяліст ацэніць, ці можна вам у прынцыпе прымаць сеансы душа Шарко. Яго ўздзеянне на арганізм настолькі магутнае, што, напрыклад, пры наяўнасці мочакаменнай хваробы ён можа прывесці да руху камянёў у мочавыводзячых шляхах. А гэта прамая дарога на бальнічны ложак або, горш за тое, на аперацыйны стол.

Да абсалютных супрацьпаказанняў адносяцца:

  • ліхаманкавы стан;
  • вострыя інфекцыйныя захворванні і захворванні ў стадыі абвастрэння;
  • скурныя захворванні (экзэма, псарыяз);
  • варыкознае пашырэнне вен ніжніх канечнасцяў;
  • мочакаменная хвароба;
  • гіпертанічная хвароба;
  • ішэмічная хвароба з прыступамі стэнакардыі;
  • парушэнні сардэчнага рытму;
  • востры тромбафлебіт;
  • недастатковасць кровазвароту 2-3 ступені;
  • дынамічныя парушэнні мазгавога кровазвароту;
  • злаякасныя новаўтварэнні;
  • цяжарнасць.

Улічваючы індывідуальныя асаблівасці ў кожным канкрэтным выпадку, урач можа не рэкамендаваць душ Шарко ці карэктаваць працягласць і перыядычнасць працэдур і пры іншых паталогіях ды станах.

Правілы правядзення душа Шарко

Для дасягнення лячэбнага ці аздараўленчага эфекту душ Шарко прызначаюць курсам ад 10 да 20 працэдур. Пры адсутнасці супрацьпаказанняў і ў залежнасці ад жаданага выніку курс водалячэння можна праводзіць 1 раз у 3-6 месяцаў.

 
Ганна Селянінава
Загадчыца аддзялення медыцынскай рэабілітацыі 10-й гарадской клінічнай бальніцы Мінска, рэабілітолаг вышэйшай катэгорыі
Класічны стандарт правядзення працэдур падчас курсу – праз дзень. Працягласць аднаго сеансу ў сярэднім 3-5 хвілін. Апошні прыём ежы абавязкова павінен быць не менш чым за 2 гадзіны да пачатку працэдуры. Таксама пажадана прымаць душ Шарко раніцай або ў першай палове дня. Нагадаю: па рэкамендацыі ўрача і ў залежнасці ад стану чалавека працягласць і перыядычнасць працэдур могуць быць змененыя.

Больш ашчаднай і камфортнай па адчуваннях, але не менш эфектыўнай альтэрнатывай душа Шарко выступае яго бліжэйшы «сваяк» – падводны душ-масаж. У аснове яго дзеяння ляжаць тэрмічны і механічны фактары. Чалавека змяшчаюць у цёплую ванну і робяць масаж струменем вады, якая падаецца пад ціскам праз шланг. За кошт таго, што вада ў ванне збольшага гасіць сілу напору струменю, працэдура аказвае больш мяккае і камфортнае ўздзеянне на арганізм. Нягледзячы на гэта, падводны душ-масаж мае такія ж супрацьпаказанні, як і душ Шарко.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

96 0 31

Журналіст. Вышэйшая адукацыя. Сябра Беларускага саюза журналістаў. Стаж працы ў прафесіі – 20 гадоў. Беларуска. Нарадзілася ў г.Ганцавічы Брэсцкай вобласці. У 2001 годзе скончыла факультэт журналістыкі Беларускага дзяржаўнага ўніверсітэта па спецыяльнасці «Журналістыка». Працавала спецыяльным карэспандэнтам аддзела эканомікі газеты «Беларуская ніва», аглядальнікам аддзела пісьмаў, аглядальнікам аддзела сацыяльных праблемаў газеты «Савецкая Беларусь» (зараз – «Выдавецкі дом «Беларусь сёння»). З 2016 года – карэспандэнт уласны аддзела інтэрнэт-праектаў РУП «Рэдакцыя газеты «Медыцынскі веснік». З 2000 года з'яўляецца сябрам Беларускага саюза журналістаў (БСЖ). У 2002 годзе стала лаўрэатам прэміі БСЖ за лепшую журналісцкую працу. У 2017 годзе – лаўрэатам прэміі БСЖ «Залатое пяро».