13.12.2018
13.12.2018

Звыклае невыношванне цяжарнасці: генетыкі дапамогуць пазбегнуць трагедыі

logo
Цяжарнасць i роды
0 18
Памер шрыфта:
  • A
  • A
  • A

«Ніколі не думала, што навуковыя распрацоўкі ў галіне медыцыны дапамогуць мне вынасіць і нарадзіць здаровае дзіця. Гэта проста неверагодна! », «Калі б нашы жанчыны ведалі пра ролю генетычнага абследавання, дык колькасць бед была б значна меншай, а здаровых дзетак і шчаслівых сем'яў – у шмат разоў больш!»

Гэта вытрымкі з лістоў, якія ў апошнія гады рэгулярна прыходзяць у Інстытут генетыкі і цыталогіі Нацыянальнай акадэміі навук Беларусі. Іх аўтары многія гады беспаспяхова спрабавалі стаць бацькамі, губляючы адну цяжарнасць за другой. Урачы разводзілі рукамі: няма прычын для звыклага невыношвання. Іх знайшлі генетыкі.

Пра тое, як генетычныя даследаванні дапамагаюць вынасіць і нарадзіць здаровае дзіця, журналіст інфармацыйнага партала Здаровыя людзі даведалася ад загадчыцы лабараторыі генетыкі чалавека Інстытута генетыкі і цыталогіі НАН, доктара біялагічных навук, прафесара Ірмы Масэ.

Прычыны невыношвання цяжарнасці. Што рабіць, калі іх няма?

Па дадзеных Міністэрства аховы здароўя, у Беларусі штогод кожная пятая жаданая цяжарнасць заканчваецца спантанным абортам (самаадвольным перарываннем цяжарнасці на тэрміне да 22 тыдняў). Ёсць шмат прычын, якія могуць прывесці да такога зыходу:

  • гарманальныя парушэнні ў арганізме маці;
  • інфекцыі, якія перадаюцца палавым шляхам;
  • імуналагічныя фактары (несумяшчальнасць па групе крыві і рэзус-фактары);
  • цяжкая экстрагенітальная паталогія;
  • пухліны і парокі развіцця маткі;
  • генетычныя дэфармацыі і анамаліі развіцця плоду ды інш.

Але ў некаторых выпадках будучыя бацькі абсалютна здаровыя, і цяжарнасць спачатку развіваецца нармальна. Няма падстаў для турботаў і трывог. Тым цяжэй прыняць і перажыць раптоўную страту.

У апошні час галоўным фактарам, які вядзе да звыклых выкідышаў без устаноўленых прычын, прынята лічыць спадчынную тромбафілію.

 

 
Ірма Масэ
Загадчыца лабараторыі генетыкі чалавека Інстытута генетыкі і цыталогіі НАН, д.б.н., прафесар
Генетычныя парушэнні сістэмы гемастазу выяўляюцца пры надыходзе і па меры развіцця цяжарнасці. У плацэнце ўтвараюцца мікратромбы, якія закаркоўваюць пупавіну, адпаведна, плод не атрымлівае кіслароду, пажыўных рэчываў і гіне. Цяжарнасць перарываецца. Але пакуль жанчына не цяжарная, яна цалкам здаровая: аналізы ў норме, каагулаграма не дае падстаў для трывогі.

Вызначыць, ці ёсць схільнасць да спадчыннай тромбафіліі, якая можа стаць прычынай звыклага невыношвання цяжарнасці, у шэрагу выпадкаў можна пры дапамозе малекулярна-генетычнага аналізу.

Генетычнае даследаванне дазваляе дакладна ўстанавіць, ці ёсць рызыка невыношвання цяжарнасці. З улікам гэтай інфармацыі ўрач-гінеколаг прызначае медыкаментозную тэрапію, якая дапаможа захаваць і вынасіць цяжарнасць.

 
Ірма Масэ
Загадчыца лабараторыі генетыкі чалавека Інстытута генетыкі і цыталогіі НАН, д.б.н., прафесар
У Інстытуце генетыкі і цыталогіі НАН мы пратэставалі больш за 3,5 тысячы жанчын са звыклымі выкідышамі, у якіх у анамнезе дзве і больш страчаныя цяжарнасці па невядомых прычынах. У адной жанчыны, якая прыехала да нас з глыбінкі, 15 выкідышаў за 20 гадоў сямейнага жыцця! Цяжка ўявіць, праз які душэўны боль ёй давялося прайсці. Практычна ва ўсіх абследаваных жанчын былі выяўлены гены фактараў рызыкі невыношваемасці цяжарнасці.

Больш чым у 90% жанчын устаноўлена ад 1 да 4 фактараў рызыкі з 10 магчымых. У 8% – 5, 6 і нават 7 фактараў! У такім выпадку рызыка страты цяжарнасці без медыкаментознай карэкцыі вельмі высокая.

Калі трэба праходзіць абследаванне?

На гэты конт існуе некалькі пунктаў гледжання.

  • Сусветная агульнапрызнаная практыка паказвае на тое, што генетычнае абследаванне мэтазгодна праводзіць пасля 3-х выкідышаў па невядомых прычынах.
  • Расійскія спецыялісты па акушэрстве і гінекалогіі рэкамендуюць генетычны аналіз нават пасля 2-х спантанных абортаў.
  • Некаторыя навукоўцы зараз схіляюцца да таго, што аналіз на выяўленне генетычнай схільнасці да спадчыннай тромбафіліі трэба праводзіць пасля 1 самаадвольнага перапынення цяжарнасці.
  • Сучасныя, высокасвядомыя маладыя жанчыны аддаюць перавагу рашэнню загадзя праверыць свой генатып, каб не страціць ніводную цяжарнасць.
 
Ірма Масэ
Загадчыца лабараторыі генетыкі чалавека Інстытута генетыкі і цыталогіі НАН, д.б.н., прафесар
Мы апыталі адну тысячу жанчын, якія праходзілі генетычнае абследаванне 2 гады таму. Аб'ектыўна гэты час пасля аналізу трэба быў на тое, каб зацяжарыць і нарадзіць дзіця. Аказалася, што 86,6% апытаных жанчын сталі шчаслівымі мамамі. Некаторыя нават вынасілі двойню, а да гэтага не маглі захаваць і аднаплодную цяжарнасць.

Прайсці генетычнае абследаванне на вызначэнне фактараў рызыкі невыношвання цяжарнасці можна ў Рэспубліканскім цэнтры геномных біятэхналогій на базе Інстытута генетыкі і цыталогіі НАН Беларусі: г. Мінск, вул. Акадэмічная, 27. Тэл. 8 (017) 385 97 39. Абследаванне праводзіцца на платнай аснове. Арыенціровачны кошт 171 BYN.

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 18

Журналіст. Вышэйшая адукацыя. Сябра Беларускага саюза журналістаў. Стаж працы ў прафесіі – 20 гадоў. Беларуска. Нарадзілася ў г.Ганцавічы Брэсцкай вобласці. У 2001 годзе скончыла факультэт журналістыкі Беларускага дзяржаўнага ўніверсітэта па спецыяльнасці «Журналістыка». Працавала спецыяльным карэспандэнтам аддзела эканомікі газеты «Беларуская ніва», аглядальнікам аддзела пісьмаў, аглядальнікам аддзела сацыяльных праблемаў газеты «Савецкая Беларусь» (зараз – «Выдавецкі дом «Беларусь сёння»). З 2016 года – карэспандэнт уласны аддзела інтэрнэт-праектаў РУП «Рэдакцыя газеты «Медыцынскі веснік». З 2000 года з'яўляецца сябрам Беларускага саюза журналістаў (БСЖ). У 2002 годзе стала лаўрэатам прэміі БСЖ за лепшую журналісцкую працу. У 2017 годзе – лаўрэатам прэміі БСЖ «Залатое пяро».
Глядзіце таксама