20 Лістапада
20.11.2018

Прывітанне, сябры!

logo
Думкі ўслых
124 0 147
Памер шрыфта:
  • A
  • A
  • A

Шчыра вітаю ўсіх наведвальнікаў сайта! Рада магчымасці называць вас не таварышамі, не грамадзянамі і нават не панамі ды паненкамі, а цёплым словам “сябры”. І зрэдчас – шаноўным спадарствам. Дамовіліся?! Буду ўдзячна за каментары і абмеркаванні, за пытанні і прапановы, за актыўную жывую сувязь. Дзяліцеся, сябры, вашымі радасцямі і засмучэннямі, праблемамі і настроем.

Давайце разам зробім нашу суполку сонечнай і цёплай. Каб зранку, зайшоўшы сюды з тэлефона ці камп’ютара, ноутбука альбо планшэта, вы б мімаволі шчыра ўсміхнуліся і адчулі цеплыню сэрца іншага. Можа, далёкага, недасяжнага, і не толькі па геаграфічнаму прынцыпу. А можа, таго, хто зусім побач з вамі. Толькі вы пра гэта нават не здагадваецеся. Такое ж бывае, праўда?

Ці заўважалі вы, як нам апошнім часам не стае прыемных момантаў у жыцці? Разумею, што гэта далёка не арыгінальнае назіранне. Але ж акрэсліць праблему, прызнаць яе наяўнасць услых – хіба гэта не першы крок да яе вырашэння?!

А ці кожны з вас можа назваць сябе добрым чалавекам? Вось без усялякіх умоў? Добрым усюды і заўсёды, з усімі? А хто добры па вялікаму рахунку? Ці 50х50? У залежнасці ад абставінаў?

Асабіста ў мяне, прызнаюся, хутчэй спрацоўвае апошняе. Незнарок пакрыўдзіш чалавека, а пасля перажываеш, перажываеш. А папрасіць прабачэння ой як цяжка... Ці не так?!

А можна ж паспрабаваць проста стрымацца. Не адказваць грубасцю на грубасць. Не біць балюча словам. Слова ж таксама пакідае свае адбіткі... Не-не, гэта зусім не лекцыя! Разважанні, думкі ўслых. Мне прыемна будзе пазнаёміцца тут з сапраўды добрымі людзьмі. І калі ў вас ёсць якіясьці, скажам, прыёмы па стрымліванню сябе... Падзяліцеся імі, калі ласка, з усімі.

Гляджу на назву сайта, а ў галаве круціцца ўвесь час слоган: “Быць здаровым – здорава!” А што для вас значыць – быць здаровым? Толькі фізічна? Фізічна і маральна? Правільна харчавацца? Наведваць трэнажорную залу ці фітнэс-клуб? Вельмі хацелася б прачытаць вашы думкі і разважанні на гэты конт.

Дарэчы, абяцаю, што наступны пост будзе не такім... м-м-м... афіцыйным ці што. Гэта я яшчэ проста саромеюся. Даруйце... Але задаваць пытанні – маё захапленне па жыцці! Гатова таксама адказаць на зададзеныя вамі.

І на заканчэнне – крыху пра сябе. Мяне завуць Святлана. Я журналіст і блогер. Жыву ў горадзе Чэрвені Мінскай вобласці. Давайце знаёміцца?! І яшчэ хацелася б даведацца, чым зацікавіў вас наш сайт “Здаровыя людзі” і хто, як і я, карыстаецца беларускай мовай у паўсядзённым ужытку.

Усім – прыемнага дня і сонейка ў душы!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

124 0 147

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.