7 Снежня
07.12.2018

Пушыстая казка

logo
Думкі ўслых
154 040
Памер шрыфта:
  • A
  • A
  • A

Вяртаючыся ўчора ўвечары дахаты, мы ехалі прама ў туман. І раптам падумалася: «А пасля гэтага ж ранкам можа быць шэрань!» І што ж атрымалася ў выніку?! Бы жаданне Дзеду Марозу загадала… Выйшла сёння з дому – і дыханне перахапіла ад такой прыгажосці! Літаральна ўсё, ад травы да самых высокіх дрэваў, было такім пушыстым і серабрыстым!

Сказаць, што наваколле змянілася да непазнавальнасці, – гэта не сказаць нічога. Усё сапраўды стала дзівосным і казачным. І звычайны куст шыпшыны з чырвонымі ягадкамі на ім…

І бярозы з доўгім голлем, якое пакрылася іскрынкамі. А пры бліжэйшым разглядзе аказалася, што гэта дробныя зубчыкі.

Самае цікавае, што і Мінск сустрэў такім жа хараством! Выйшла на станцыі метро «Каменная Горка» – і таксама захоплена ахнула! Такія ж бярозы, як і ў маім горадзе, з такім жа шчыльным слоем крышталікаў ільду на іх. Праходзячы пад адной, не вытрывала: падняла руку і пакратала галінку. Зубчыкі імгненна асыпаліся. Але адчуванне дакранання (у прамым сэнсе) да казкі засталося.

Так, гэтую пушыстасць, на жаль, не пагладзіш, як  цёплую поўсць коткі.

Затое паназіраць захопленымі вачыма – колькі заўгодна! І вось жа дзіва… Размова ідзе пра халодную зімовую прыгажосць, а на сэрцы ад яе цяплее… І настрой такі цудоўны! А ў вас?!

Нават звычайная памытая бялізна, якая сушыцца (сушыцца?! ці вымярзае?) на вуліцы, апранулася ў шэрань. І кадр атрымаўся стыльным. Ці не так?!

А калі ўзнялося сонца і зайграла, заіскрылася промнямі праз махнатыя лапы ялін, выдаўшы цэлы спектр, адчуванне радасці сталася такім поўным!

Праўда, гэтае ж сонца і лёгкі ветрык паціху абцярушваюць шэрань з дрэў…

І ўсё ж менавіта сёння так добра адчуваецца, што Новы год ужо дзесьці блізка… І Дзед Мароз правярае сваю запрэжку з аленямі. А тады разам са Снягуркай садзіцца чытаць чарговы шэраг лістоў ад дзетак і спакоўвае ў свой мяшок заяўкі-падарункі…

Пушыстая казка перад вачыма. Яна так патрэбна ўсім – і дзецям, і дарослым. І дзякуй таму, хто даслаў нам сёння такое ільдзіста-снежнае зімовае прывітанне…

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

154 0 40

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.