15 Снежня
15.12.2018

Радаваць... сябе

logo
Думкі ўслых
134 0 33
Памер шрыфта:
  • A
  • A
  • A

Адыходзячы з працы ў пятніцу, перастаўляю на календары пазнаку на новы працоўны дзень. Каб, зайшоўшы ў кабінет у панядзелак, адразу ўбачыць, так бы мовіць, адпаведнасць рэальнасці. 17 снежня... Штоо-о-о-о??? Ужо, лічы, 17-га?! Затым доўгі шасцідзённы працоўны тыдзень (субота ўваходзіць, памятаеце?!)... І... І... Што там астатнія дні і святы?! Вось ужо і Новы год! А мы ж яшчэ не паспелі парадавацца як след яго набліжэнню...

Асабіста мне здаецца, што ў сутках ужо не 24 гадзіны, а ўсяго 12. А ў вас няма такога адчування?! Бо так ляціць час... Суткі проста пракручваюцца перад вачыма, як стужка кінаплёнкі. І ніякай магчымасці адкруціць іх назад, каб зрабіць, дагнаць, паспець... Дзе ж тут ужо месца радасці?!

Апошнім часам бачу ў сеціве і не толькі шмат парад, як радаваць іншых. Дзяцей, бацькоў, мужа ці жонку, сяброў, калег... Усё правільна, усё робім. Стараемся... Але... ці часта мы радуем саміх сябе?! Ды не з нагоды свята, а проста так?!

А часцяком пра гэта не задумваемся. І нават саромеемся падумаць. Бо, напрыклад, за савецкім часам лічылася, што свае інтарэсы трэба ставіць на апошняе месца. І многіх з нас выхоўвалі менавіта так. Усё – для іншых, радуемся іх радасці... А што для сябе, сапраўды любімых і адзіных?! Нават калі што і зробіш, могуць палічыць... эгаісткай (эгаістам). Ці не так?!

Але калі жывеш у шалёным рытме, перапынкі на сябе проста неабходныя! Бо калі ўсім і вакол абавязаны 24 гадзіны ў суткі... Нічым добрым такое не закончыцца. Будзе незадаволенасць (і ў першую чаргу, як ні дзіўна, сабой), паднятыя нервы, якія ніяк не атрымліваецца супакоіць, бяссонніца, праблемы са здароўем... А можа, усяго толькі трэба знайсці магчымасць, а галоўнае – жаданне парадаваць сябе?! Хіба мы не заслужылі?!

Я, вядома ж, ні разу не псіхолаг. Проста стараюся давяраць уласным адчуванням. І прыслухоўвацца да парад іншых. Таму калі хочацца парадаваць сябе хвілінамі цішыні, знайсці ўласны рэлакс – у ванным пакоі, у кубачку свежазваранай духмянай кавы, шклянцы гарачага глінтвейну, смачным пірожным, прыемным набытку... Дык чаму б ні арганізаваць гэта, не чакаючы, пакуль хтосьці парадуе цябе і не азіраючыся на нейкае там пачуццё вінаватасці?!

Клопат пра сябе часцяком нават не патрабуе вялікіх матэрыяльных выдаткаў (я зараз не пра набыткі накшталт новай шубы!). Затое ў маральным плане, безумоўна, акупіцца! А вось чым канкрэтна сябе парадаваць, кожны выбірае сам. І пачынаць можна проста з прыемных дробязяў, якіх нам так не стае...

Дык няхай усё згаданае вышэй будзе, і часцей. Пяць хвілін цішыні, гадзіна ў ванным пакоі, дэфіле ў прымерачнай краме з сэлфі, абсалютна забыўшыся на час... А пасля мы хутка пабяжым прыбіраць, гатаваць і радаваць іншых. Праўда-праўда! Яшчэ з большым жаданнем і большым імпэтам. Але напачатку дазвольце сабе... парадаваць сябе! І жыццё абавязкова расквеціцца ўсімі колерамі вясёлкі!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

134 0 33

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.